horat quurampayt nayqanne hiyaytet
18
1 lamm yesusett tashsha male lashsh mitt Mooha dinkamatta ikkim fadusinniyyu kollisaass paahnat sed iyyaa lell.
2 "sapara shakkan qalle horat quurampayt shokku iyy Mooha tura huraanne,
nam tura lilimatta diinniyyu kiyy.
3 saparaan qalle hiyayitet irishatidd qarin toy kiyy;
itanno horat quurampayt se kapop deyin,
'deeh se antu nam se innu orrdeehinkinnu olle qapu ani kaysiyy' iyyi kidin.
4 iyyat lamm deehaadd iti kaysisa male helpa lek oladd;
ukkannakul asset kidd qaapad,
'etin Mooha naf huura diinniyyu,
nam tura lilimaatta diinniyyu koddonno,
5 hiyayytet hin oot it an payyahitt maalla,
deehaaddess horatin all iquurina;
etin sedep koda diiyyo lamm,
lashsh min deyint an kap koknint.' "
6 ukkannassenno Yesus poldat asset kid,
"hin horat qurampayt hin nayq ishaam immashshi qapadaa.
7 Moohot siipayy se awadanne kallap ullupittin iyy dinkamanniyyoss horat quurinomu kat?
shikaarsattan qarqaarisaayy iyyaa qara all olashinninamu?
8 olisisa male esseteeh iyyaa kayisinnin hen inni kidin.
hekoddu male meet nam helpaan iyyat mitaatiyyu deyiyyo,
husslah qara amaantet akkanninamu kat?"
foojampayt farasishshanne qarats quurampayt
9 ukkannass Yesus orr se,
"innu tsillampayya" kidiyy foojiyy illo orr shokku tuffanniyyass paahnat sed lell.
10 "nam lakk dinkamatta man miilotatep aan;
shokku farasishsh iyy shokku lamm qarats qurampayt.
11 "farasishsh hexel sedep kidd mutsurooyalli dinkamad,
'moohaallo!
oot antu qum orr pilatep,
ponqampaytanne nayqampaytanne arpalayitishsh kodda diiyy maalla hedin aypisannin.
oot antu qum qarats quurampayyaynetep kodda diiyy maalla hedin aypisannin.
12 antu tappaalle lashsh lakinin damot kapa dupannin;
hin antu akkanniyyu dahenn qara hark hundalle hark shokkun sohashnnin daannin' kid.
13 "qarats quurampayt lamm por sekass ell,
erreel paha moontallel lak tooya nafessenno amm hefottemu;
hekoddu male tompossa shoomattaann,
'moohaallo!
antu juppampayt,
all ani diiyy!
' kid.
14 iyy tsillampayt kodd manayyep mitaatt qarats quurampayt male,
amm farasishshemu hen inni kidin;
nam ikkaaninniyyu dahenn tinnaisamina;
nam itinnainniyyu dahenn kaanisamina."
Yesus medda qor
(mati. 19,13-15; mar. 10,13-16)
15 ikkim Yesus medda qari hark qapinos,
orrat meddan iyy kapop deyen;
helpaan soolleshiyy sed akkenekuless orr sett tushen.
16 Yesus lamm meddanett ikapop hemb illo sedep kid,
"oot daamum Mooha orr medda hinep kikkiyyi kodd maalla,
medda dawura diiyyaa,
he an kapop deyenii."
17 shaakketin inni lelin,
'nam daamum Mooha qum meeddaatep qeedatta diinniyyu,
amm apure daamum Mooha qallep kalinamu."
shorokum husslahatenne daamum moontall
(mati. 19,16-30; mar. 10,17-31)
18 kaadayya ayhuta ila iyy shokku yesusess,
"kollisampayt dikkallo,
kiyyat parpar akkattaass,
maana koda an fadusinnin?"
kid kaassad.
19 Yesus illo sedep kid immitaattiy,
"maanaass iddikk ani kidin?
Mooha shokkooh male nam dikk amm hekiyyamu.
20 acacadda heuftapa;
iyyaanno 'arpaluma diiyii;
ikasa diiyii;
hasha diiyii;
maanyet eerpa kodda diiyii;
appaytenne inkotayt serkiyii' hin kidiyy kida."
21 nam settenno "acacadda hin meumawon hir luushad" he ikid.
22 helpaan Yesus hin dakayekuless nam settess,
"sedeeshsh akkan shokkooh hate;
aanii iyyaan att qaftu dahenn kashii illo hiyyayya dayyii;
shorokum moontalle akkanninta.
sekannakul hooyii an kanni deyii."
ikkid.
23 nam hin lamm oot iyyat shorokum lek qapu maalla,
helpaan iyyat sed dakayye ikkaaness dappiyy.
24 helpaan iyyat dappet nam sett akkekuless sedep kid,
"shorohtass daamum Mooha qallep kalot rakkot ashshann kishsho!
25 shorokitt daamum Mooha qallep kala kapa,
kaalaass ura milmet qallin luumot hoshilaay."
26 orr ishaamayy dakay lamm,
"kat aynu dina fottina" hekiden.
27 iyyat illo,
"iyaan nami fottama diinniyy moohaass fottamiyyan" kid.
28 betsiroos lamm,
"toare,
innu iyaan innu qafnu dahennin alldiinn hed kanni antaalle kinn" heikkid.
29 Yesus illo sedep iyyaa kid,
"shaakketin inni lelin,
nam daamum Mooha minin manayy shoke dakusotayy shoke insharaddooyyanne ankasaddooyy shoke lemmooyy shoke meddooyy alldiinniyyu,
30 ammann are husslah qarass hark lek qeeddannina;
sapan se deyiyyonno kiyyat parparat akkannina."
Yesus oot toxshayyetenne toxt ila sohattaayyet halpattiyya lel
(mati. 20,17-19; mar. 10,32-34)
31 Yesus soolleshayy hundann lakka set ikapop hemb illo ass iyyaa kid,
"toare!
innu yerusaalemepin annin;
hin oot meet namat himampayyan tsaafam dahenn ullass kaysaanninan.
32 iyyat orr se ayhuta kodda diiyess tarpisamina daassamina;
iyyaanno qari beejjiyanninan;
otinan;
ambushsh qari shuhanninan.
33 litsootin kaypinan;
ikanninan;
hekoddu male lashsh halpattiyyaate toxt ila sohannina."
34 lamm ishaamaayy ila shakkanooh naf soolleshayyess amm hekalenemu;
oot furila ishaamanett iyyaa tura all dekaden maalla,
hin iyyat kidiyyu amm heufunaadenemu.
Yesus iyaarikoss indamala shakkan diniyy
(mati. 20,29-34; mar. 10,46-52)
35 helpaan Yesus iyaarkop dehaade indamalishsh shokku qasiyatta paana kapi laiyy;
36 helpaan iyyat nass orr lek hin iyy kapin tarpiyy dakaye,
"hin maaniyya?"
hekid kaassad.
37 orrat illo,
"toare!
Yesus naasratishsh arin tarpinipa" kiden ilelen.
38 helpaanette indamalaan,
"meet taawit yesusello!
tonhedess ani mutsuroodu!"
kidaann ullup.
39 orr iyy turi qatt antaalle kiyyonno,
"rui kidii!"
hekiden tushen,
iyyat lamm,
"meet taawit!
tonhedess ani mutsuroodu!"
kid lekiy ullup.
40 semmaalla Yesus ullass ell illo,
"an kapop indeyaa" kid acac.
helpaan indamalaan Yesus kapa paiyyene,
sedep kid kaassad,
41 "ikkimin maana hedi kodinoss fadin?"
indamalishsh settenno,
"polda,
akkan fadin" he ikkid.
42 Yesus illo,
"akkii!
amaanteshitt hed dinitte" ikkid.
43 iyyat illo esseteeh akka fott,
Mooha aypisattan Yesus kanni anta hir;
helpaan siipat sed akkene dahenn Mooha aypisaden.