kohayt nami kodda qara illushatta
(mati. 18,6-7;21-22; mar. 9,42)
17
1 Yesus soolleshayyess kide,
"kohayt deyaayy amm hatinamu;
hekoddu male nam se kohayt iyy minin deyiyyoss pelawu!
2 namat,
hin tittinax ila iyy shokkoss kohayt kodda kapa daka ombashsh ikkaan holmayy qudi ihiddam,
iyyat pakatet ilop allkasham kid iyyi hedikk.
3 semmaalla mashshayni ittooyadaa!
et kafittaatt hed qarkalo tushii!
lamm et hennayqiyy kido all iddiyyii
4 lashshalle et tappinn hed qarkalu illo tappin mimmitaatu,
'hennayqiyy' kido all iddiyyii."
5 orr hitaymatenno Yesus poldass,
"tonhedess amaantet innu padawii" ikkiden.
6 iyyat illo,
"amaantet qunda hakalaatep kishshu et qafnaattan illo,
daish sedi,
'are pushami illo pakatetall dihamii!
' kiditane innass acacamina" iyyaa kid
7 ukannaxash Yesus asset kid,
'inn ila nam erhayt ul peehiyu shoke helemma shikinniyu qapu et kinnaado,
helpaan erhaytaayy erkama ila mitaato esseteeh 'hoyyii lahi laii eetot damii' ikkidimu kat?
8 sekapeeshsh,
'kodd!
eetot ani dikiyy,
hak antu daminu ukinu kokkaadu ani erkayyii;
sekanna att lamm damint,
ukinta' ikkidiyyomu?
9 kat oot aylet hin iyyat acacam erkayy maalla afa poldaayy iyy aypisanninop inni kinnaannimu?
10 innanno settep hin inn acacanten helpaan inn erkatene 'innu aylammaan awuta dap;
hin innu erkann iyyaan innu qara fadamiyaahpa' kidaa."
Yesus orr paylot qapu hund diniyy
11 helpaan Yesus yerusaalemep anniyyo otant huss samaariyaatenne huss kelila qallenn tarpin;
12 helpaan iyyat paat shokko paiye,
orr paylot qap hund iyy kapop dey illo por seki ellen;
13 nassaddonno erri qeedden,
"Yesus,
kollisampaytallo,
tonhedess innu mutsuroodu!"
kiden ullupen.
14 Yesus lamm iyyaa toyy illo "aanaa!
dakinshayn suukamma man Moohaat akkiyyaa!"
iyyaa kid;
helpaan iyyaa anniyyane payloshiddu qara tawt.
15 iyyaa ila helpaan iyy shokku payloshiyy qara tawaadd akkekuless,
nassayy erriqeedd illo Mooha aypisattete mitaatt;
16 yesusessenno aypila daattan lukkayy keli kilp mashshayy lahan eskiyy;
nam settenno saamirishsh.
17 Yesus illo,
'orr se paylot qara tawt dinad nam hundpa makess?
nam tsinqot kat ahayla kiyyan?
18 pataytishsh se Mooha aypisatta arep mitaatt deyy pateeshsh amm nam shokkooh naf he akkaademu kidaamu?"
kid.
19 nam settessenno,
"sohadu aanii;
amaanteshitt hed dinite" ikkid.
dexema daamum Mooha
(mati. 24,23-28; 24,37-41)
20 faraset yesusess,
"daamum Mooha etanne deyina?"
kiden kaassaden;
iyyat illo,
"daamum Mooha amm qum se op qimiyyan lushanniyyanep deyinamu;
21 settep lamm daamum Mooha amm,
'toare kiyy' shoke 'todase kiyy' kidamiyyamu;
toare,
daamum Mooha otanshayn qalle kiyy" kid iyyaa mitaattiyy.
22 ukannaxash lamm Yesus soolleshayyess kide,
"lashsh meet nam ila lashsh shakk akkaass lashsh inn darayintan deyina;
hekoddu male amm akkihintanemu.
23 orrat,
'toare,
kristoos are kiyy!
' shoke 'todase kiyy!
' he inni kidinan;
hekoddu male anta diiyyaa;
iyyaa kanni oora diiyyaa.
24 qum paqana moontalle paqiyyane dahenn huss qari akkaanniyanep awuse meet nam deyiyyo settep koddint;
25 hekoddu male turqattaass meet nam rakkot lekit qeeddatta,
dalashot sedennenno tuffashama iyy fadusinnin.
26 qum it sapan noohe kodditep helpa dexema meet namatenno koddint.
27 hak lashsh se nooh konkaallep kalinotess orrat damaann ukaann orrqeeddaanne orrxaatumisaalle kiyyan;
helpaanette haq patetat dey dahenn all iyyaa patiyy.
28 settep lamm qum se it sapan lootse kodditep koddint;
helpaanette orrat damaann ukaann kashanann piddaann dihot dihaanne man dihaalle kiyyan.
29 hekoddu male lashsh se loots sotome sohade,
apittanne tiinyeta moontalleett roop illo dahetaddun all iyyaa patiyy;
30 lashsh se meet nam uqqari deyinonno sedep koddint.
31 "awusete nam faattalle kiyyu man talla mehadda qeeddatta lahop lekkatta diiyyu;
nam ulalle kiyyonno ikkanneesh mitaata diiyyu.
32 haypaat loots immashshxoorsadaa!
33 nam kiyyatayyin hatatta fadiyyu dahenn allpatinnina;
nam kiyyatayy allpatinniyu dahenn kiyyatayyenn hatannina.
34 awaddat sette nam lakk siret shakkaahalli peannina;
nam shokku qeeddamina iyy shokku hatina hen inni kidin.
35 iskatt lakk yooqa ollin yooqina;
it shakk qeeddamint;
it shakk hatint. [
36 nam lakk ulalle erkama ollin koyna;
nam shokku qeeddamina;
shokku ulli hatina."]
b hekid.
37 soolleshiyy illo yesusess,
"polda,
hin ahaylass koddint?"
kiden kaassaden.
iyyat lamm "por se lewot kishshop ayyapitt orqudiqapamin" hekid iyyaa mitaattiyy.