kaadayt amaanama diinniyyu
16
1 Yesus lamm qar orr soolleshayyi kide,
"shorokitt shokku erhamayy ila kaadayt manaayy peashinniyyu qapa;
orrat lamm,
'kaadayt hin kodashsheshayt all pulpulin ukull' hekiden shorokitt setti daramen.
2 shorokitt settenno iyy hemb 'hin antu hed kanna dakayiyyu maaniyya?
sedeeshsh oot att kaadayt manaawu kodda diinnintu maalla,
kodashsheshaw se helpa kaadumaaytete hed kapa kishshu ani dehayy' ikkid.
3 kaadayt hin lamm,
'ammanneeshsh poldaawu erkamaawu qalle all an sohashshinnina;
kat maana koda an fadusinnin?
ul peehaass amm peesh henqapamu;
qasaanno lamm an liilin;
4 eli!
iyaan antu koyinu henxupa;
helpaan antu erkamaawu ila sohado,
moyshadaan manaddop an qeeddannina ikkimin qafnaaninosin kodina' hekid qaapad.
5 "semmaalla kuurampayya poldaayyet shokkushokko hemb illo se turiqatta paess,
'kuur att poldaawu daanintu meeq hed qara kiyy?
' kid kaassad.
6 iyyat illo 'tif ekert harsa tseet an qara kiyy' ikkid.
kaadayt settenno 'toare firma att farrantt shakar kid lahi lai illo harisa hund hen kid tsaafii' ikkid.
7 erhayt lakkiyyaanno hemb,
'kuur hed qara kiyyu maana kayina?
' ikkid.
iyyat illo 'kaapa akal tseet an qara kiyy' kid immitaattiy.
kaadayt hinet lamm,
'toare firma att farrantt!
akal hund lakkushet kid tsaafii' ikkid.
8 poldaayyenno kaadayt se amaanama diinniyyu malampayt kodaayyenn heyeesh;
hin lamm orr Mooha kapaashsh,
orr husslah kalaashaddu hekat husslahatenn paasamppayya koddaaddu akkinnin kida.
9 "semmaalla kodashshet husslahatin moyshada kodadan inni kidin;
et sedep koditan kid,
helpaan kodashsheshinn raawto man kiyyat parparatess inn qeeddanninan.
10 nam iyaan qojin amaanam iyaan kaanennenno iyy amaanam koddina;
nam iyaan qojin amaanama diinniyyu lamm iyaan kaanennenno amm amaanaminamu.
11 kat et shorokum husslah qarin kaadayyaan amaanama diinniyy kodditane,
shorokum moontall aynu amaanina inni daannina?
12 lamm et iyyaan kodashshet nam pil qari amaanama diinniyy kodditane,
shorokum se inni koddinu aynu amaanina inni daannina?
13 "nam shokkooh amm pold lakkess erhayt kodda fottiyyamu;
shokku hittinnin shokku hoixsaannin;
shoke iyy shokku serkinnin,
shokku tuffannin;
innanno lamm helpa shakkanooha amm moohaanne kodashshetass erhama kodda fottihintanemu.'
14 oot faraset iyyaan kodashshet hoxsaanniyy kodden maalla,
ishaama Yesus dahenn dakayen illo qari beejjiyaden.
15 iyyat lamm asset iyyaa kidd,
"inn nam turass tsillampayya ippaahnaytinnin;
Moohot lamm mutsuraann heup;
hin nam turi afa serka qapop kinnaannin akkaanniyyu,
Mooha turass iyy qar hittisam kida."
16 Yesus,
"matsaafadda halttatenne heka himampayya haka yewannis ahlisampaytatess helelantete oladen;
sekanneeshshanno lel masmasunt heka daamum Mooha lelamiy;
namanoo dahenn irrotin uqqallep kala fadin.
17 hekoddu male,
halitt ila fitala shokkooh naf hata kapa hussanne moont et tarpane hoshillaat.
18 "nam dakusotayy purrinniyyu illo iskattet pilt qeeddiyyu dahenn nyauuriy;
settep lamm nam iskattet purrit qeeddiyyonno nyauuriy."
shorokittanne alaasaar
19 "shorokitt uuwaat room qahnat herayatidd tsor uuwwanniyyu kiyy;
iyat lashsh min naalaann kalaannin.
20 lamm hiyyayt shokku alaasaar kidamiyyu dakntiyy dahenn all peesawt man shorokitt sett alti peanniyyu kiyy;
21 hiyyayitishsh hin damaan man shorokitt settete lahi yeiyy dama hadanin;
heradaanno deyin peesashayy qar loqin.
22 "sekkannakuless hiyyayitishsh hin hetoy;
hitaymiyya Mooha aprihaam kapop inxaanen;
settep lamm shorokitt settenno hetoy illo mookam.
23 helpaan iyyat por orr raawete rakkataalle kiyyo,
erreel pah illo aprihaamenne alaasaar iyy kapi elle por sekaashsh akk.
24 illo nassayy erri qeedd,
'aprihaam appoyye!
tonhedess ani mutsuroodu!
are haalayt apitt ila rakkatallen kiyya;
ikkim harkayy haq ilin qapanninu illo arapaawun ani qappannaaninu alaasaar ani hittii!
' kid.
25 "aprihaam lamm asset ikkid;
'meetoot!
att sapan kiyyashayt hekat husslahate iyaan dikk akkattan masmasaayt immashshi oorisadu;
alaasaar lamm rakkotann kallaad;
semmaalla ammann iyyat are masmasiyy att rakkannikkishsh.
26 sed dahenn qareell otanshayinonne otanishayin ila tekel kaan kiyy;
semmaalla,
innu kapaashsh inn kapop,
inn kapaashshanno innu kapop tarpaass nam fottinu amm hekiyyamu.'
27 shorokitt hin lamm asset kidd,
'appollo,
sedep et koddito,
tonhedess,
ikkim alaasaar man appaawotep hitintosin hed dinkamannin;
28 kaf an olle dalad henin qapa,
ikkim iyyaa lamm are por rakkot sedetep indeyin heaanu iyyaa lelu.'
29 "aprihaam illo,
'iiyaass matsaafadda muusenne heka himampayyaat kiyy;
iyyaa kapa dakayen' he iyyi kidd.
30 shorokitt hin lamm,
'iyyekku!
aprihaamm appolo,
et nam shokku toxtalle hayu aanu iyyaa lel kid qallqaapannaayen jupposhaddu qara mitataayen' he kidd.
31 aprthaam illo,
'hin matsaafadda muusenne heka himampayya leliyyan et dakaya diyyane toxt ila et nam shokku hayu iyyaa lelono amm ammaaninanemu' ikkidd."