paahnat helemmat se tawaatt akkaatt
(mati. 18,12-14)
15
1 qarats quurampayyaanne jupampayya dahenn kollila Yesus dakayaass orqudiqapamen iyy kapop deyen.
2 farasetanne kollisampayya halitt lamm sed akken illo,
"nam hin juppampayya qeeddannin iyyaa ollenno damin" kidan Yesus qari kumuliyaden.
3 semmaalla Yesus paahnat sed iyyaa lel:
4 "inn ila nam helemma tseet qapu et shakkaah tura tawwatto,
iyy helemma hund tsinqotann tsinqot murall alldiitta illo shakkaah se fada anta diinnaay ayno?
5 helpaan iyyat akkadekuless,
masmasuntann hashittayy qari haisannin inkalin.
6 helpaan iyyat manayye pae katooyyanne qahittayy hembin illo,
'helemmashawu se tawwatt henxakkade an olle masmasaa!
' iyyaa kidin.
7 settep lamm tsillampayyaan juppot qara mitaattot iyyaa fadusisa diinniyyu hund tsinqotann tsinqot qareell,
jupampayt shokkooh se juppot qara mitaattiyu minann moontalle masmasunt koddinta hen inni kidin."
paahnat pirret se patt illo akkaat
8 ukkanna Yesus asset kid,
"iskattet pirret taamunet,
hund qaftu;
taamunet se hund ila et shakk tura tawatto,
ispa opawusannishshu,
manadd uushuqishshu hak taamunet se patt akkaannintu lakku fadishshomu?
9 helpaan it akatt kanna lamm kataadane qahitaadd dahenn hembin,
'taamuneshawu se patt henxakkade an olle masmasaa!
' he iyyaa kidin.
10 settep lamm juppampayt shokkooh se juppot qara mitaatiyyu minann moontalle hitaymiyya Mooha kapass masmasunt koddint hen inni kidin."
paahnat meet se tawadd mitaatt
11 ukkannaxash Yesus asset kidd,
"nam shokku immada lakk qap;
12 hin inshar kodd appayyess,
'aappo!
shorokumayitt qara ian min kaynu qoot ani dayy' ikkid.
semmaalla appaayy shorokumaayy meddaayy lakki qott.
13 lashsh qojji kanna insharat kodashshet sett orqudop qapadd illo huss sekap aan;
huss sette kodasheshayy aypoti all patiyy.
14 helpaan iyyat kodashsheshayy rawiyy kanakul,
huss sete laaot qint koddit illo iyyat rakkotall sunkk.
15 semmaalla orr huss sett ila nam shokku kettop kidd;
nam settenno shinkayt maashatat iyy kodd.
16 iyyat illo puunnaan maashatadda damiyyanin kardayy inaaka hadannin;
hekoddu male nam se naf iyy daanninu amm hekiyyamu.
17 helpaanete meet hin patindapaayy immashshi oorisadd illo ass kidd qaapadd,
'man appaawote erhama kalisot lashshatin erkanniyyu hak dutaninaness dama damin,
iyyaa ukela all hatinpa!
antu lamm are tufetannin toyin;
18 sohadonu appaawu kapop aanonu illo aappo,
hedenne Mooha turass dapatin kode;
19 sed kanneeshsh meetaayit kidama amm ani fadusinniyyamu;
hekoddu male erhamaayt hin kalisot lashshatin erkanniyy ila qum ishshokkotep an tooyi,
ikidina' hekid.
20 semmaalla sohadd appaayy kapop aan.
"appaayyenno por sekass meet se akk;
imutsurood illo kapop feell;
holimaash qapp dinkk.
21 meet hin illo 'aappo,
moohaanne hed turass dapatin kode,
sed kanneeshsh meetaayt kidama amm an fadusinniyyamu' ikkidd.
22 appaayy lamm erhamayy hemb illo,
'shakar kida uuwaat sommatin ideyaa uuwashshiyyaa!
harkayyess tsuqa,
lukkaayy kelass hopa ikodaa!
23 horm se kappin deyaa qalaa!
innu dannu!
masmasinu!
24 meet hin hetoyy makess,
ammann kiyyat qap;
he tawadd makess;
ammann he akaadd kid.
iyyaa illo masmasa hiren.
25 "essete imm kaan erkamaass ulallep aan;
helpaan iyyat mitaatiyyu manayy dehaade,
nass laaletatenne hirip dakay;
26 erhama ilanno iyy shokku hemb,
'hin maaniyya?
' kid kaassad.
27 erhayt illo,
'oot insharaat kal,
appaatt andotin iyy akkad maalla,
horm iqal' ikkid.
28 "ankasat lamm ikaaness jiiadd,
'amm tallop kalinihinamu' kid.
semmaalla appaayy altop sohadd illo ikkim tallop luminu dinkamad;
29 iyyat lamm appaayess ass kidd mitaatiyy,
'toare!
antu par sed dahenn ayletapin hedi erkayy;
acacaayt qaranno amm hentarp upamu;
kat apure peat shakkaah naf ani hedaatt antu kataawu olle henmasmasemu!
30 meetaatt hin lamm arpalayya olle kodashsheshayt allpulpul mitaate,
horm iqqalt.'
31 appaayy illo,
'meetoot,
att lashsh min an olle kishsh;
hin hekaawu kodd dahenn hekaat.
32 insharaat hin hetoy makess;
ammann lamm kiyyat qap;
hetawwadd makess;
ammann he akkaad;
semmaalla ikkaani masmasa innu fadusinnin.
' " heikkid.