Yesus sampata qarass nam shokku diniyy
14
1 lashsh sampataate Yesus kaadayya faraset ila man nam shokkotep dama dama aan;
farasetanno iyaan iyyat erkanniyyu tooyan lushannin.
2 helpaanette nam baaqin dakintiyy dahenn eettatt Yesus tura kiyy.
3 Yesus illo kollisampayya halittatenne faraseti kide,
"kat lashsh sampata qari nam dinisot halitt qari hedaassamemu shoke daassama diyy?"
4 iyyaa lamm iyyi oorisa male dahenn rui kiden;
Yesus illo baaqampayt sett qap diniyy illo hayyad.
5 essete Yesus,
"inn ila nam lashsh sampata qari meetaayy shoke hormaayy et hawulalli pexe kid,
esseteeh allqeedda dinnaay ayno?"
hekid kaassad.
6 iyyaa lamm amm akkan shokkooh naf mitaatisa hefottenemu.
Yesus oot dippatumat kolliyy
7 Yesus helpaan orr keessummum hembam por serka qattisanniyyane oot iyyat akk maalla paahnat sed iyyaa lel;
8 "helpaan namat sarketi hed hembo,
por serka qari laxa diiyii.
saapapaass nam hed qareell serkisam hembama fottina;
9 nam hin inn hemb hed kapop deyina illo 'por sed nam sedi allhayii' hedi kidina;
helpaanette lamm deesot kaantenn por se tuffashamep lekkanint lainnint.
10 hekoddu male et man namatep hembanto aann,
por se tuffashami laiyy;
essete nam hin hed hemb hed kapop deyina illo,
'moyshe!
hooyii por serkaat laiyyii' hed kidina;
att illo orr se hembam dahenn turass serka akkanninta.
11 nam ikkaaninniyyu dahenn tinnaisamina;
nam itinnainniyu dahenn kaansamina."
12 Yesus lamm appa se iyy hembess sedep kid,
"et pihaas shoke eetotass orr hembishsho moyshadaattanne,
insharaddaattanne ankasaddaattanne kafaytenne qahittaayt shorohota iyyaan haarot hedi oorisa fottina hemba diiyii;
13 hekoddu male et serkaass dama ulli dikkinnishsho hiyayyaanne,
shoopayyaanne orr muluhiluhenne indamalaanno hembii.
14 et sedep kodito,
oot iyyaa haarot hedi oorisa fotta diinninan maalla,
iyy hartood koddinta.
helpa toxt ila sohatta tsillampayyaate Mooha haarot hedi oorinnina."
paahnat hembanta damot kaantet
(mati. 22,1-10)
15 orr se dama dama laiyy ila iyy shokku ishaamaan Yesus ishaam dakay illo,
"nam dama dama daamum Mooha qalli laisa fott,
iyy ashshann hartoode!"
kid.
16 Yesus lamm asset iyy kid,
"nam shokku eetot kaant ulli dikkiyy illo orr lek hemb;
17 helpa hembanta sett paiyene 'toare heikk hedikkisamene hooyaa!
' ikkim kidinu orr se hembami lelinoss ayleshayy hit.
18 hekoddu male orr hin hembam lamm mashmashaddoss hembanta se kela allhataass iyaan iyyaa qari marmanninan lela hiren;
iyy shokku illo,
'oot antu ul pidd maalla,
anta tooya an fadusinnin;
semmaalla amm deya fottinhinamu allhattot ani dayyii' ikid.
19 iyy shokku,
'oot antu hormada kinta hen pidd ekkasa fadiyyu maalla,
amm deya fottinhinamu,
allhattot ani dayyii' hekid.
20 iyy shokku lamm,
'oot antu haypanish kodd maalla,
amm deya fottinhinamu' hekid.
21 "aylet settenno tallop mitaat illo hin dahenn poldaayyi lel;
essetekul appa man sett hejiiad illo aylet sett kide,
'shakar kid,
paana sapara qalleeshanne qisilladalleesh aanii;
hiiyayyaanne shoopayyaanne indamalaanne orr muluhluhenno hemb indeyyii' ikkid.
22 aylet hin qalleeshsh mitaat dey illo poldaayy kide,
'polda!
toare,
hin att an acacit dahenn henkaysiyy;
hekoddu male ammannenno porat hekiy' ikkid.
23 semmaalla appa man sett ayleshayyess kide,
'hak manaawu innaakonnoss paana kakkaanenne qisilladdallep aanii illo orr pil ikkim deyinani kodii!
24 innassin lelin,
orr se turiqatta hembam ila nam shokkooh naf damot se antu ulli diikkiyy amm kapin koyinamu!
' ikkid."
Yesus kanni antot laaqqa kodda kaassusinnin
(mati. 10,37-38)
25 siip lek Yesus olle antaalle kiyy;
iyyat lamm poraddoosh mijirr kidd illo ass iyyaa kid,
26 "nam an kapop deyiyyu et appayyenne inkotayyenne haypatayyenne meddooyyanne insharaddooyy shoke ankasaddooyyane alawutaddooyyanne kiyyatayy nafenno an qara tawunisan hoxsaanniyyu koddo amm soolleshawu kodda fottinamu.
27 nam masqaletayy haisatta an kanni anta diinniyyu amm soolleshawu kodda fottinamu.
28 "inn ila nam man diha fad,
turaqatta man settin diha kodashshet ifadusinnishshu qaapatta diinniyyu ayno?
29 et namat man diha hiru illo dihimaayy kaysisa fotta diiyo,
nam man sett akkiyyu dahenn,
30 'toare,
nam hin man diha hir illo amm kaysisa hefottemu' kidaann qari beejjiyannin
31 "Daam,
orr adant kum hund qapu,
et Daam se orr adant kum hund lakk qapu olle orr ada fado,
turiqattaass ikkim ashshann olishshayy iqara oorininu ufunaatta laiyu qaapanniyyomu?
32 et fotta diittaayy ufnaado lamm,
Daam se iyy ada deyiyyu olle senaass helpaan iyyat dase por seka kiyyo,
orr araarsinu iyy hittin illo ikkim olle araaraminu kaasawusannin kida.
33 settep lamm inn ila nam iyaan iyyat qapu dahenn an maalla kida alldiitta diiy,
amm soolleshawu koda fottinamu."
sookitt sena diinniyyu
(mati. 5,13; mar. 9,50)