juppot qara mitaata diittot toxt
13
1 helpaanete,
orrat Yesus kapop deyyen illo,
"orr kelila laaqqa dehanniyyane bilaatsoos all iyyaa rawiyy;
diikaadonno laaqqaadu olle lahh" kiden iyyi lelen.
2 Yesus illo sedep kid iyyaa mitaatiyy,
"orr kelila hin,
patet hin qari paitt,
kat orr kelila hin shakkan dahenn qareell oot iyyaa jupampayya koden maallaap,
inni kinnaannimu?
3 erraytu;
et juppot qara mitaata diittane,
innanno qumaadop all patinitan hen inni kidin.
4 oot nam hundan lakushet hin salihomme hana dakala qari dershamen iyyaa raawenetess maana qaapannin?
iyyaa orr se yerusaaleme kallaanniyyu dahenn qareell afa jupampayya koddenep inni kinnaannimu eesk?
5 erraytu;
et juppot qara mitaata diittane,
innanno qumaaddop all patintan hen inni kidin."
paahnat peleset se dalot daft
6 essete Yesus paahnat sed iyyaa lell,
"nam shokku ul woynetayy qalle peleset shakkaah it ulli dihanitt qap;
helpaan iyyat peleset se ila dalot akkatta aane,
akkatta male hatt.
7 semmaalla erkamampayt ulatess kide,
'toare,
peleset sed ila dalot akkattaasin par halpatt mimmitaat;
hekoddu male amm dalot qara henxakkademu;
amann all it quurii!
maanaass ayipoti por qapannin?
' ikkid.
8 erkamampayt ul setti lamm,
'poldaawo!
initu par sed ulli diiyye;
kapin peehin poonet kapop haadina;
9 et parimate dalto hokkaletadd;
hin inkininekuless alliquuramint' " hekid immitaattiyy.
Yesus iskattet patalli koorawt sampata qari diniyy
10 Yesus lashsh sampataate man dinkam ayhuta ila por shokko kollisaalle kiyy.
11 ulla iskattet shakka it par hundann lakushet laaffot baaqatin qapanit kiyy;
oot it patalli koorawt maalla,
amm erreel qall paha fottishshamu.
12 helpaan Yesus it akke hehemb illo,
"yenta,
baaqayit ila hedinatt!"
ikkid.
13 harkayyenno qari qap it illo esseteeh erreel qall pahit ellit;
moohaanno aypisatt.
14 oot Yesus sampata qari iskattet se diniyy maalla,
kaadayt man dinkam sett he jiiad illo siipi kide,
"tappaalle lashsh erkama lehh kiyy;
lashsh erkama qari deya dinadaa male lashsh sampata qari amm koddintamu" kid.
15 Yesus poldat lamm asset kidd iyyi mitattiyy,
"meeddu ipeepampayya,
inn ila nam lashsh sampataate por se hormatiyy ulli tur duhame sohashshisa,
shoke harretayy por se it hiddante furisa illo haq ukkisa inianniyyu inikiyyomu?
16 toare,
it hotta aprihaam kodditete par hundann lakusheti seetsanin hidant;
kat hidan se ila lashsh sampata qari furisamot it fadusinniyomu?"
17 ishaamaayy hinen Yesus orr se iyy shiittiyyu dahenn liiliyy;
siipat lamm hin nam shamusinniyy Yesuset erkay dahennenn masmasen.
paahnat hotta hakala
(mati. 13,31-32; mar. 4,30-32)
18 Yesus sedep kid,
"daamum Mooha maanannin pahanaytinnina?
shoke maanannin qapinna?
19 qunda hakala hin namat ul dihot qalli seiy paahnaannin;
hotta settenno hedeeh kamm qorya kaan kodd;
hampiraanno haarraayy ili manaddu dihaden."
paahnat jaraytat
(mati. 13,33)
20 Yesus lamm,
"daamum Mooha maanannin qappina?
21 daamum Mooha jarayt iskattet qeett ikkim hayinninu daamma kaappa qunna halpatt olle donshoort paahnaannin" hekid.
kaalt hipawt
(mati. 7,13-14;21-23)
22 Yesus yerusaalemep antaalle kiyyo,
saparadaanne paattaaleesh kolila kollisan tataripin.
23 helpaanete nam shokku,
"polda,
orr dinaninu kat iyyaan qojemu?"
hekid kaassad.
Yesus illo asset kidd iyyaa mitaattiyy,
24 "kaalt hippawt qallin kala kokkaadaa;
kaalt se qallin kalaass orr lek fadin makess;
hekoddu male amm kala fottinanemu,
hen inni kidin.
25 appa man sett sohannina kaalt allduhina;
innanno altass ellintan karfa kokkoyisan,
'polda!
polda!
tonhedess innu tura qahiyii!
' kida hirintan;
iyyat illo 'ahayla ikkim inn deiten amm henxupamu!
' inni kidina.
26 helpaanette inn,
'damaannon hed olle daminipa;
ollennennon ukinipa;
mooraaynu qallessenno kollittipa' iyyi kidintan.
27 iyyat qar oorina,
'ahayla ikkim inn deiten amm henxupamu!
inn iyyaan nayqunt erkanniyy dahenn an kapa sekaadaa!
' inni kidina.
28 helpaan inn aprihaamenne,
isaaqenne,
yayqoopenne,
himampayya dahenn daamum Mooha qalle akkishshan;
inn lamm altapatin allhatishshane;
pooytanne ila ollin qum koddint.
29 orr lek dind lashsh yaamishshooshshanne peishshooshshanne tapupenne semeneshshanno deyinan;
daamum Mooha qalle dama kapi lainan.
30 semmaalla orr kann ooriyy ila iyyaan turi qattina kinnaannina;
hin turi qatt ilanno iyyaan kann oorinnina kinnaannina."
Yesus yerusaalem pooyy
(mati. 23,37-39)
31 helpaanete faraset ila karatiddu Yesus kapop dehaaden illo,
"herootis hed ikasa fadine,
are sohadu all aanii" ikkiden.
32 Yesus lamm sedep iyyaa kid,
"aanaa illo kaxalt setti kidaa,
'awwenne parre qayyin sohashshinnina;
baaqampayyaanno dininnina;
awi halpattiyyaate erkamaawu kayisinninhina' hekidin ikkidaa.
33 hekoddu male awwenne parrenne parshaanenno yerusaalemep anta hira an fadusinnin;
himampayt yerusaalemes male por pili toya amm iyy fadusinniyyamu.
34 "yerusaalem,
yerusaaleme!
hed se himampayya ikannishshu!
orr se hed kapop hitam dakan reepishshu ikannishshu!
qum lukkalittet jujitoodd karpalloodd kelop qapannishshop,
ananno meddaatt ikkettop qapaass helpa meeqan fad!
inn lamm amm hefaditenemu.
35 semmaalla,
man miiloshayn enayt koddina.
innassin lelin,
'nam mahh poldatin deyyu iqoram' hak kidintaness sedeeshsh amm an akkihintanemu."