Yesus ippeepa qara illushada kidaayy
(mati. 10,26-27)
12
1 helpaanette siip kumadda lekin dihamiyyu orqudi qapam;
lekussaaddu minin orrtuttuquuran orrallixixiqannin.
Yesus illo turisqattiy soolleshayyess sedep kida hir,
"jarayt faraset kela illushadaa;
sedenno ippeepa kida.
2 iyaan qar shushuqisam qar akkaatta male,
amm hatinanemu;
iyaan dekamenno ufunashama male amm hatinanemu.
3 semmaalla iyaan inn poorinnat pati ishaanten dahenn atumat ilass dakayisamanninan;
iyaan inn man duham talli hashshashin lapaalli olli ishaanten moora qarass patpahinan ishaamaminan.
aynu huura ikkim fadusinniyyu
(mati. 10,28-31)
4 "inn moyishadaawu asetin inn kidin,
soha ikasa patashsh hin hepil erkasa fotta diinniyy hura diiyyaa.
5 hekoddu male aynu hura ikkim inn fadusiniyun inni lelina;
toare Mooha se helpa ikayu kanna kahanam qallep all kasha hayyotum qapu huura;
heye iyyeeh huuran inni kidin!
6 "pumupunnayya hen santimet shakkass kashaminipa?
iyyaa ila shakkaanooh naf amm Moohot immashshi hepatisademu.
7 hekoddu male rifant mashshayn naf dahenn it dihant kida;
semmaalla,
huura diiyyaa!
inn lamm pumupunayya lek qara tawutan."
maanyet kristoos kodda
(mati. 10,32-33; 12,32; 10,19-20)
8 ukkannass Yesus asset kidd,
"nam se nam turi ani maanyet koddiyyoss an meet namatenno lamm hitaymiyya Mooha turass iiyasin maanyet koddin hen inni kidin.
9 nam se nam turi an marmanniyyu lamm ananno hitaymiyya Mooha turasin iyy marmannina.
10 "nam meet nam qari lelad dahenn all iyyi diissamint;
nam laaffot miilot qar otitta leliyyu et kinnaado lamm,
amm all iyyi diissamintamu.
11 "helpaan op kaadayya man dinkamatenne peashisampayaanne hayyot turop horati inn dehanniyane 'maanan mitaatinninna?
ashshannin ishaaminna?
' kidan baaqura diiyyaa.
12 helpaanete iyaan ishaama inn fadusinniy laaffot miilot inn lelina."
eepum shorokittat
13 siip se ila nam shokku yesusess kide,
"kollisampayt,
amaytet appaannu innu amayy ikkim ankasaawu ani qootinu ilelii" ikkid.
14 Yesus illo,
"yema,
ikimin otanshayn qalle maaka horat quriyyu koddinu amaytet inni qootinoss aynu an maakumiy?"
kid immitaattiy.
15 ukkanna lamm orr se ulla kiyyu dahenness,
"kiyyat nam amm lekusa shorokumatenemu;
semmaalla illushadaa;
yeexema qaranno mitaataa."
kid.
16 sekanakuless Yesus paahnat sed iyyaa lell,
"nam shokku iyy ulaayy uunt palihayy kiyy;
17 iyyat illo,
'uunt sed dahenn por antu ulli naqinu oot antu dapp maalla,
maana koda an fadusinnin?
' kidin qaapanin.
18 sedepanno kid,
kootaraddaawun allpaqinina illo kootaradda pil iyaan kakaan sorumina;
illo uunshawonne shorokumawu dahenn ulli orqudi qapina naqanina.
19 sekkannakul iissesin kidina,
toare,
shorokum par leki hed kayinu qafita;
sedeeshsh hayisadu naali!
dami!
uki!
masmasii!
kidina' hekid.
20 Moohot lamm,
'yem eepayt,
aw awadd nafiseshitt hed qalle qeedaminit;
kat shorokum hin att ulli tuulitt dahenn ayinoss koddina?
' iyyi kidd.
21 "nam husslah qari shorokum mashshayy oriqari tuulanniyyu,
Mooha kapa lamm shorokitt kodda diiyy kiyyashiyy sedep koddinit."
amaantet Mooha qar kashatta
(mati. 6,25-34)
22 sekkanna Yesus soolleshayyess sedep kid,
"semmaalla kiyashayness,
'maanan daminna?
maanan uuwannina?
' kidan baaqura diiyaan inni kidin.
23 kiyyat dama qara,
dakintanno uuwaat qara intawtomu.
24 intu urrupayaa tooyaa,
iyyaa amm uunt seysanniyan orqudi qapanniyaanemu;
amm por uunt ulli naqatta shoke unkula heqapanemu;
hekoddu male Moohot iyyaa dansinnin;
inn lamm hampira qara intawtanemu?
25 inn ila nam baaquran paraayy qari lashsh shakkaah a naf padawatta fottinu ayno?
26 inn et iyyaan sedep qoji naf erkasa fotta diiniyy koditene,
maana maalla hepil baaqurin?
27 pulal shoqqa ikkim ashshann kammiyu intu tooyaa;
amm erkaman tashshiyanemu;
amm shipiriyanemu;
hekoddu male salamon b Daam naf serkaayy hin kaanenn amm qum ishshokkotep heuuwademu hen inni kidin.
28 inn hin amaantet inn qoje,
kat Moohot shoqqa se aw akkaannin paarre apitt ili kashaminu et sedep siriyu koddo,
ashshann shoqqa se qara tawunisan inn uuwashisa diinnina!
29 "semmaalla 'maanan daminna?
maanan ukinna?
' kida qaapan baaqura diiyyaa.
30 hin akkattaass orr husslahatenno sootinpa;
hin dahenn ikkim inni fadusinniyaness appaann,
appa moontall heup.
31 inn lamm se kapeeshsh daamum Mooha fadadaa;
hinenno dahenn innass padawaminan.
husslah qari shorokum orqari tuulata amm fadusinniyyamu
(mati. 6,19-21)
32 "inn siip heelt qoqojj kodd,
huura diiyyaa;
appaan appa moontall daamum inni daataass hinashayy kida.
33 iyaan inn qaftan dahenn kasha illo hiyayya dayaa;
okolet kerda diinnishshonno mashshayni soorumadaa illo kodasheshayn por kerot ipaisa diinninu,
pilet nayqisa diinnintonne por kodasheshinn ulla raawa diinninto daamum moontall qalli haayadaa.
34 por se kodasheshinn kishsho mutsuraannanno kinnaanninane."
erkamampayt qim
35 sekana yesusett asset kid,
"helpamina erkama dikisadaa,
apittaynenno iyy opawiyu kodu.
36 paana sedenn erkamampayyaan man sariketate mitaata poldaadu lushanniyy paahnaadaa;
et poldaaddu paiyu karifa kokoyinniyyo iyyaan shakar kidiyy harat iqqahisa dikisadd koddaa.
37 erkamampayyaan helpaan poldaaddu painniyyo haya lushattaalle kiyy iyyat qari paiyyu,
iyyaan hartood!
shaakketin inni kidin;
iyyat uuwaat oohanina,
iyyaa laxashshinina dama iyyaa dehanina.
38 erkamampayyaan helpaan poldaadu awadd jooppe shoke parashot kela kale,
hayin kokanniyy lushanniyy iyyat qari paiyyu,
iyyaan hartood kida.
39 hekoddu male sed ufunaadaa;
et appa man helpaan kerot uqqalli deynu ufunaad kid,
ikkim manaayy inqoshaminess lushannaay.
40 oot meet nam saatet inn qaapatta diitten qall deynu maalla dikkisada luushadaa."
paahnat erhayt dikkatenne iyy nayq
(mati. 24,45-51)
41 betsiroosenno,
"polda!
paahanat sed att ishaamishshu kat innoseehamu?
shoke orr heikketesse?"
hekid Yesus kaassad.
42 Yesus poldat lamm sedep kid immitaattiy,
"peashilampayt amaanamenne mutsura qapu,
poldat ikkim iyyat helpa ili orr manaayet dama daanninu kaadumusiy ayno?
43 helpaan poldatin mitaatiyyo aylet erkamaan iyy daassam erkanniyyu iyyat qari paiyyu iyy hartood.
44 shaakketin inni lelin;
aylet sedep kiyyu poldat shorokumaayy dahenn qarass kaadumusinnina.
45 et aylet hin 'poldaawu olannina,
amm shakar kidina kalinamu' kidan damanne,
ukanne,
taarottaanne erhama diiddaanne iskatt dokosa hiro;
46 poldaayy lashsh iyyat lushatta diiyyenne helpaan iyyat ufunaatta diiye paina,
aylet sett ikkaaness horsinnina;
ikkim hitsaayyenno ippeepampayya olle koddinu kodina;
47 "aylet has poldaayy heuffunaatete dikkisatta diiyy,
shoke acac poldaayy kaysisa diiyy ikkaaness horannina.
48 hekoddu male nam has poldaayy uffunaatta diittan iyaan horatin qara deyina erkay,
horashiyy iyyass hoshilint;
nam se iyaan lek iyy daassamen qara iyaan lek fadamin;
nam op iyaan lek kapi haayaden kapa iyaan lek lushamin."
Yesus amaana minann rehaytet deyina
(mati. 10,34-36)
49 ukkannaxash Yesus asset kid,
"toare!
antu husslah qarop apittannin dey;
et esseteeh ani opaw kid ashshannin hoxsaannaay!
50 hekoddu male ahlila rakkot iyaan antu ahlisaminun qap;
hin hak kaysannintoss ashshannin baaqurina!
51 antu kat husslah qarass afan andotin deyep inni kinnaannimu?
innasin lelin,
antu indey,
rehaytet male amm andotemu.
52 ammanneeshsh hiran orr man shokkooh talla ollin kalu nam hen orr reehinan;
nam halpatt nam lakk qarass,
nam lakk nam halpatt qarass sohanninan ollin jiixinan.
53 appat meetayy qarass,
meet appayy qarass,
inkot inantadd qarass,
inant inkotadd qarass,
haypaat haqitotadd qarass,
haqitotanno haypaashadd qari sohattaann orr rerreehinan."
helpa ufunaatta
(mati. 16,2-3)
54 lamm Yesus siipass asset kid,
"et soort dind lashsh peishshu qari akkishshane esseteeh,
'toare!
aww roopa hint!
' hekkidin;
it illo shaakketi roopin.
55 settep lamm et haayyot tapupeesh haayyawiyyo 'aww heparit' hekkidin;
it shaakket koddin.
56 meeddu ippeepampayya,
paahnat hussatenne hekat moont tooyan iyaan koddina ufunaannikkishshan;
kannate iyaan sapan sede koddina ashshann ufunaatta diinnin?"
orr nam qar hittinniyy olle sena
(mati. 5,25-26)
57 ukkannaxash Yesus asset kidd,
"inn illo maanaass mashshayn iyaan pah ufunaattan woka diin?
58 helpaan nam inn orrfadishshan hed kasasu inn por horat quuraatep paanaalle annishshane,
iyy olle ararama fadadu;
et sedep koda diitto,
horat quurampayt turop hed tishina;
horat quurampaytanno waartiyyaass hed tarpinnina daannina;
waartiyyaanno man hidanatep hed kalinnina.
59 kodashshet horat se hed qar quurant sikkinot hed qari hata male hak daannintu kaysinnintoss man hidan talla ikkim sohatta diinnintossin hedi lelin."