Yesus oot dinkamat kolliyy
(mati. 6,9-13; 7,7-11)
11
1 lashsh shakka Yesus por shokku ila dinkamataalle kiyy.
helpaan iyyat dinkamayy kaysiyy kanna,
soolleshayy ila iyy shokku,
"polda,
qum yewannis soolleshayy dinkam kolliyyep,
hedenno dinkam innu kolliyii."
he iyy kid.
2 Yesus illo,
"et dinkamannishshane sedep kidaa,
'appaaynu [hed se moontalle kallaanniyyu!]
a
mahhaayt hemiilawu,
daamumaayt hedeyu,
[qum hasaatt moontalli koddep,
hussallessenno hekoddu.]
3 dama lashsh lashmin innu dayyii.
4 qum innu dapat orr innu qar kal all iyyaa diinninkinnop,
jupposhaynu all innu diiyyii.
ekkawsamaallep innu kalisa diiyyii,
' [se nayq kela innun hati male.]" b
5 ukkannass lamm Yesus soolleshayyess sedep kid,
"paahnatass inn ila nam shokku et mooyshsh qafnaad illo awadd jooppe man moyshayyetep aan illo 'moyshoot!
tonhedess laaqqot halpatt ani pirkaatiyy.
6 moyshaawu huss sekaashsh an kapop deyy antu illo iyaan antu iddaanninu dap' ikkido,
7 kat moyshaayy talleeshsh,
'pelaayt an rakkusisa diiyyii!
kaalt heduhant,
meddoyyonno an olle siretalli peaden.
semmaalla amm haya laaqqot se att faditt hedi daatta fottinhinamu.
' he ikkidimu?
8 et oot moyshumayy maalla haya iyyi daatta fada diiyyu nafe,
oot iyyat kaassiyin iyy payyahinniyyu maalla kidin hayina hin iyy fadusinniy iddaanina hen inni kidin.
9 "semmaalla iyaan antu inni leliyyu hin iyaa,
dinkamadaa innass daassamintta,
fadadaa akkannihhintane,
karfa kokkoyiyaa innass qahisamina.
10 nam dinkamanniyu dahenn qeeddannina,
nam fadanniyonno akkannina,
nam karfa kokkoyinniyossenno qahisamina.
11 inn ila iyy appa kodd,
meetayy [et laaqqot fadanniyyo daka iddaanniyu ayno?]
c helpa qurtsummet fadanniyyo maakot iddaassamiyyamu?
12 shoke et bubba fadanniyyo kishsh iddaassamiyamu?
13 inn iyyaan nannayq kodditete,
et meddaanni iyaan dikk daatta ufunaattene,
appaann heka moontall ashshann seqara tawunisan laaffot miilot orr se iyy dinkamanniyu daatta diinnina!"
yesusenne pielsepul
(mati. 12,22-30; mar. 3,20-27)
14 lashsh shakka Yesus qayy ishaama nam dawriyyu nam kaptucam qara sohashshiy.
helpaan qayyatin qara sohad kanna,
nam hin kaptucam hewaar.
siipanno sedin shammaden.
15 orr shakkan lamm,
" pielsepul,
sheela qayyatenn qayy sohashshinnin" hekiden..
16 orr shakkan lamm iyy ekkasa faden illo Moohot iyy hitaayy hin iyyaa inxishaakinan ikkim moontalle iyyaa akkinninu kaassaden.
17 Yesus lamm qaapaaddu uffunaad illo sedep iyyaa kid,
"daamum orrqall qootiyu dahenn all patin;
settep lamm orr man shokkooh et orqall qootiyane sunkiyan.
18 semmaalla daamum seetsan et orral qootyu koddo,
daamumaayy ashshann qima ella fottina?
innat lamm,
'iiyat qayy sohashinniyyu pielsepulenn!
' he ani kidin.
19 etin antu pielsepulin qayy sohashshinniyyu koddo,
meddaann maanaann sohashinninan?
semmaalla meddaann horat inn qari quurina.
20 etin antu irrot moohaatin qayy sohashshinniyyu koddo,
daamum Mooha inn kapop deyaayy ufunaadaa.
21 "nam irrampayt,
et mehadda toratin manayy lushanniyyu kodo,
mehaddoyy iyyass lushamin.
22 hekoddu male irrampayt iyy qara tawu et deyu iyyin pusho,
mehaddaan iyyat inqimiyu qara qeeddannina;
hin iyyat qaponno dahenn ponqina,
orrayi qootina.
23 "nam an olle kiyyaatta diiyy dahenn an shiittin,
nam lamm an olle orqudiqapama diinniyyu allpulpulin.
laaffot oshshittet nam qarop mitaatin
(mati. 12,43-45)
24 ukkannass Yesus sedep kid,
"helpaan laaffot oshshittet nam qara sohatto por haysatta fadattaann por haqat ulla teeke lak kok ili mimmitaatin;
hekoddu male amm akkannishshamu.
semmaalla,
'manaawu se antu ulla sohadepin mitaatina annina" hekidin.
25 helpaan it mitaatishsho lamm,
man hin ushuqamiy,
senin it akkin.
26 sekannakuless annishsh qayyada tapp iyyaan it qareell nannayqin iolle deyin;
man se it turin ulla kishshop inkalin ollo iyya ulli kallaannin.
kiyyat nam settetenno hekat turaqatta qareell hekat ukkanneeshsh it nayq koddin kida."
qoran shaakket
27 helpaan Yesus sed ishaamiyyo,
iskatett shakk otant siip ila nass erriqeeddit,
"inkot hed hayt,
luukitt,
it qorant" kidit.
28 Yesuset lamm,
"orr qoran akkad,
orr se lel Mooha dakayiyyu illo erkama qara nakanniyu" he iti kid.
ishshaak yoonaas
(mati. 12,38-42)
29 helpaan siip lek iyy kapop deyen orqud qapamene,
Yesus hekide,
"dalashot hin dalashot nayqat;
ishshaak fadin;
hekoddu male ishshaak himampayt heka yonaas pateesh ishaak pil amm daassaminamu.
30 qum yoonaas himampayt sapara nenewet ishshaak koddep,
antu meet namatenno,
dalashot sedess ishaakin koddina.
31 haaet asep d dalashot sed olle sohannint illo lashsh horatate iyyaa qari horat quurinta.
it ufunat salamoon dakayaass muutasha huss mina deitt.
ammann iyy salamoon qara tawu are kiyy.
32 settep lamm orr sapara nenewi lashsh horatate dalashot sed olle sohanninan horat iyy qar quurinan;
maana maalla,
iyyaa lel Mooha se yonaas ishaam dakayen illo jupposhaddu qara mitaaten;
ammann lamm iyy yonaas qara tawu are kiyy.
Yesus oot attumatat kolliyy
(mati. 5,15; 6,22-23)
33 ukkannaxash lamm asset kidd,
"amm nam ispa qapusinniyyu illo all dekiyyu shoke qunna uqqari qupaappinniyyu hekiyyamu.
sekapeeshsh et namat tallop luumiyyo ikkim akkaanninoss akkan kaan qarass haayin.
34 ispa dakint iilt.
et iilt iddikk koddito,
dakinshitt dahenn it attumatin innaakoott koddint;
et iilshitt baaqishshu koddo lamm,
dakinshitt dahenn poorinnat koddint.
35 semmaalla attumat hin hed ila kishshu ikkim it porinat inkodin illushadu.
36 semmaalla,
et dakinshitt dahenn poorinnat jawuhadd naf qafnaatta male it attumatan innaakoott koddito,
dakinshitt dahenn qum attumat haahisa haahinnishop it attumannishshu hedi koddint."
kollisampayya halitt muusetenne faraset tuuhamaaddu
(mati. 23,1-36; mar. 12,38-40)
37 helpaan Yesus hin ishaamiyyo,
farasishsh shokku piha iyy hemb;
illo iyyat man faresish settetep aan illo dama dama laiyy.
38 oot Yesus piha dama tureeshsh harka jiqatta diiyy maalla farasishsh hin heshaamad.
39 semmaalla Yesus sedep iyyi kidd,
"inn faraset,
kuppayyaanne shomb pat jiqikishshan;
iyaa lamm tallann ponqantaanne nayquntann innaakooden.
40 eepayya!
Mooha hin iyaan patallin akkaanniy uum hin tallin kiyyanno inxuminemu?
41 hin kuppayyaanne shombaayn qalle kiyy hiyayya dayyaa;
sekannakul heikk dahenn iyaan miili inni koddinan.
42 "inn faraset,
pelawu innass!
por shokkonn qimametanne fooltotanne hepila iyaan qoqoj op hana kanneesh dihanniyan qara hark hund qara hark shokku daannin;
illo tsillotanne horat quraanne Mooha hoxsaatta alldiitten;
helpaan inn hin erkannishane,
hin inn alldiittenenno erkasa inn fadusinnin kida.
43 "faraset,
pelawu innass!
man dinkam talla sheedda serka qapatta,
settep lamm kapiyaalle ikkim namat paanussa serka inni dehanninoss fadin.
44 oot inn poosaan inxishaaka dap,
op qar anniyyan pahanaannishshan maalla,
pelawu innass."
45 kollisampayya tampet ila lamm iyy shokku yesusess,
"kollisampayt,
sedep kidaatt innonno otaaytipa."
he ikkid.
46 Yesus lamm asset kid,
"inn iyyaan kollisampayya halitt kodd pelawu innass!
haisot hursaatt,
nam rakkusinnishshu nam qari hausinnin;
inn lamm haisot sett harkayn nafen amm qappannikkishshanemu.
47 settep lamm oot inn himampayyaan appadaann rawiyeness poosaaddu sirishan soorumishan maalla,
pelawu innass!
48 oot inn himampayyaan appadaann rawiyeness poosa soorunten maalla,
erkamaaddu hin nayq olle hessenten,
maanyetunten.
49 seminan ufnat Mooha asset kidin,
'himampayyaanne orr hitaymatin iyyaa kapop hitina;
iyyaa orr shakkan ikanninan;
lamm orr hat kann arinninan;
50 hak husslah uumameeshsh hiran oot diik himampayya se tiiqametess,
dalashot hin kaassawsamint.
51 shaakketin inni lelin,
apeleeshsh hiran hak sakkaariyaas se otant man miilotatenne por laaqqaat ikawusameti diik se tiiqamess dalashot hin kaasawusamint.
52 "kollisampayya halitt pelawu innass!
Mooha ufunaattaass qulfet kaalt heqapatten;
hekoddu male amm inn mashshayness ullop hekkaltenemu;
orr ullop kala fadiyyonno dawrikkishshan."