Yesus soolleshayy hund tappann lakk lel masmasunt kollisa hit
10
1 sekkannakuless Yesus poldat,
orr pil nam hund tapann lakka pahiyy illo paataanne saparaddaan iyyat ullop anta qaapadep ikkim iyy tureesh anninani lakk lakke ollin hit.
2 sedepanno iyyaa kid,
"toare uunt palhit helekit;
erkamampayya lamm heqoj.
semmaalla ikkim erkamampayya uunt sett hitinu appa uunt sett dinkamaa.
3 ammann aanaa;
qum helemmaatepin otant sessepa ilopa inn hitina.
4 paanaass,
okolet kodashshetatenno koddo,
karatsitetanno koddo,
hopaanno koddo qeeddatta diiyyaa.
paanaalle paanussa nam olle ellan helpa rawisa diiyyaa.
5 por heikkete et man tallop luumishshane turiqatta,
'andot man sedi kodditu.
' kidaa.
6 nam andot hoxsaanniyyu et ulla kiyyaado andoshinn iyy qarann paint;
hin inkinnekul,
andoshinn qalleeshsh all inni mitaatint.
7 erkamampaytass kalisot fadusinnine,
man se inn ullop luuntene iyaan iyyaa inni daanniyan damaanne ukan ulli oladaa,
man shokkooshsh man shokkop anta diiyyaa.
8 saparaan inn uqqallep antene et siipat inn qeeddado iyaan iyyaa inni daanniyan damaa.
9 baaqampayyaan saparaan qalle kiyyanno diniyyaa.
siipassenno,
'daamum Mooha inn kapop dehaad.
' kida ishaamaa.
10 hekoddu male saparaan inn ullop antene,
et orrat inn qeeddatta diyyo,
moora qarop sohadaa sedep iyyaa kidaa,
11 'toare,
tsura saparaayn se lukkaannu pata kiyyu nafenno allin inni hissisin.
hekoddu male daamum Mooha dehaattaayy ufnaadaa.'
12 lashsh horatate sapara hin kapa sapara sotomatess horat hoshilint hen inni kidin."
amaana diittaaddu maalla saparadaan soqqam
(mati. 11,20-24)
13 ukkannan qap illo Yesus sedep kid,
"pelawu hedess kuraasen!
pelawu hedess petesayta!
shammot inn qalli kokkodant tsiroosenne sitoona kodam kid,
olo uuwaat dappet uuwannin tardat pulannin juppoot qara mitaattaayenb.
14 semmaalla inn kapa tsiroosenne sitoonass horat hin hoshilint.
15 att lamm qifirnaahom all kaant moont qapattemu?
sixoolepi mitaatint!"
16 lakkiyaass lamm Yesus soolleshayyess,
"nam inn qara dakayiyyu an qara dakayin;
nam inn qeeddatta diinniyonno amm an qeeddanniyamu;
nam an qeeddatta diinniyyu amm se an hitenno qeeddanniyamu."
iyyaa kid.
mitaata orr hitaym hund tappann lakket
17 orr hitaym hund tapann lakk por se iyyaa ullop hitameneesh masmasuntann mitaaten.
Yesus kapop dehaaden illo,
"polda!
mahhaytenn qayy naf innu acacam."
ikkiden.
18 Yesus lamm sedep iyyaa ki;
"seetsanatc qum paqanaatep moontalle torpamiyyu peiyyon akk.
19 toare!
maakaanne kishshall ikkim iqannintan,
irrot olishshatessenno dahenn ikkim qimintanessin hayyotum inn dayy.
iyaan inn miidinanno amm he kiyyanemu.
20 hekoddu male oot mahhaann maskapa moontall qari tsaafam maalla,
masmasaa male,
oot qayyat inni acacam maalla masmasa diiyyaa."
Yesus masmasunshayy ufunaytiyy
(mati. 11,25-27; 13,16-17)
21 helpaanette Yesuset laaffot miilotann masmas illo sedep kid,
"pold moontatenne heka huss,
appollo,
oot at hin orr se ufnat qaponne orr se qall ishshaakiyu tura all dekit illo orr ufnat dapi ufnaytitt maalla hedin aypisannin.
owo appollo,
hin erkasaass hasayt se dikk kodd.
22 "heikk dahenn appaw kapa an daasamen.
immat aynu ikkim koddess Mooha appa pateeshsh nam upu amm hekiyyamu;
settep lamm Mooha appat aynu kodaayy imm pateeshsh shoke nam immat iyyi ufnusisa hoxsaad pateeshsh,
nam upu amm hekiyyamu."
23 ukkannaxash Yesus por soolleshayyetep mijirr kid illo iyyaasseeh,
"hin inn akkishshan orr akkiyy iyyaan hartood.
24 lamm innassin lelin,
himampayyaanne daamada lek hin inn akkishshan akkaass hadaden,
hekoddu male amm heakkenemu.
hin inn dakayishanenno dakayaass hadaden,
hekoddu male amm hedakayenemu."
samirishsh se nami mutsuroonniyyu
25 lashsh shakka kollisampayya halitt ila ishokku Yesus ekkasa fad errop ell illo,
"kollisampayt!
kiyyat parpar akkattaass maana koda an fadusinnin?"
kid kaassad.
26 Yesus illo,
"halitt qarass maana tsaafam?
et waarusinnishsho ashshannass hed kalin?"
ikkid.
27 nam settenno,
"halitt,
'mooha,
poldaayt mutsuroot dahenenn,
nafseshayt dahennenn,
irroshayt dahennenn,
qaapayt dahennenn hoxsaadu.
' settep lamm 'nam dahenn qum att ihoxsaannishshop hoxsaadu.
' hekidin."
he iyyi kidd.
28 Yesus illo,
"shaakket lelt;
hedenno sedep kodii!
kiyyat parparatenno akkanninta."
ikkid.
29 kollisampayt halitt lamm mashshayy tsillampayt ikoda fadd illo,
"qum antu ihooxsaanniyop aynu hoisatta an fadusinn kat?"
kidd kaassad.
30 Yesus illo sedept kidd immitaatiyy,
"nam shokku helpaan iyyat yerusaalemeett iyaarikop lekkanniyyo,
ewwa aken tolen uuwaat pata ponqaden otant toxtatenne kiyyat ili diiyyen qarin tawen.
31 sapaapaas lamm suka man miilot ulin tarpin illo helpaan iyyat nam se tolam ulli sunkk akke,
qariqaara male porpilin tarip all aan.
32 settep lamm hotta lewi ila nam shokku paana settin anin;
iyyanno helpaan iyyat nam se akke qariqaara male porpilin tarip all aan.
33 hekoddu male samaarishsh shokku paana se qallin tarpiyyo akk idapiyy;
34 kapopanno dehaadd illo tifanne woynet pesashayy qari ikod,
kajaran qar hidd,
harretayy qari hayy,
man keessumot ulli hayisanniyop iniaan illo ulli urusadd.
35 paareshadde tinaaretd lakk qeedd appa man kesuma setett dayy illo,
'nam sed urusadu.
et sed qareell kodashshet sohashshitto,
helpaan antu mitaatiyyon hedi mitaattinnina.
' ikkid.
36 kat,
orr se halpatt ila,
nam se ewwan tolamm ulli sunkk iyy qum mashshayetep hoxsad hekane?"
37 kollisampayt halitt illo,
"nam se iyy mutsurodd qariqaarr."
he kid immitaattiyy.
Yesus illo,
"seedeeshsh hedenno aan qum settep erkayyii."
ikkid.
Yesus man maritap aan
38 Yesus soolleshayy olle antona sohad illo paat shokko paiyy.
ulla inant shakk mart kidamishshu manaddep keessumum iyy qeeddatt.
39 itanno ishart maariyaam kidamishshu qafta.
hin maariyaam koddishshu Yesus kapass laitt kollilayy dakasan kida.
40 mart lamm ikkaaness dama inqilan tashshin.
semmaalla Yesus kapop deitt illo,
"poldaawo!
isharishiyyu hin erkama dahin an qari alldiinnishshu anaah intashshiyyo heakkitete rui kidimu?
tonhedess ikkim an qarqaarintu illelii."
he ikidit.