Yesus soolleshayy hundann lakk kollila hit
(mati. 10,5-15; mar. 6,7-13)
9
1 Yesus soolleshayy hundann lakk ikapop hemb illo qayy dahenn sohashisaanne baaq dinisa irrotanne hayyotum iyyaa dayy.
2 oot daamum Mooha ikkim nam lelinan baaqampayya dininninan hit.
3 sedepanno iyyaa kid,
"halittanno koddo,
karatsitetanno koddo,
dama koddonno,
okolet kodashshetatenno koddo,
tsippuqot lakkenno qeeddatta diiyyaa.
4 por heikkete man inn ullop luuntene hak sohannintani ulli laxaa.
5 et orrat inn qeeddatta diinniyaan,
inn illo saparaan qalle sohannishshane tsura lukkaann pata allihissisadaa sohadaa;
sedenno maanyet iyyaa qari koddinta."
6 semmaalla orr hitaym,
ulla sohadene lel masmasunt kollisaanne baaqampayya dinisaann paattaallin dahenn tattarpin kida.
herootis torrot Yesus dakay
(mati. 14,1-12; mar. 6,14-29)
7 oot herootis hin peashisampayt kelila kodd,
iyaan Yesus erkayy dahenn dakay maalla,
halutta iyyi koddit.
maana maalla,
oot orr shakkan,
"yewannis ahalisampayt toxt ila sohad."
kidiyyan maalla kida.
8 orr shakkan lamm,
"himampayt eliyaas mitaat deyy."
kidiyyane orr pil lamm,
"himampayya olu ila ishokku toxtalle sohad."
hekidin kida.
9 herootisenno porayyeeshsh,
"an mashsh yewannis quurusiyye,
nam ootayy hin ishaamamiyan kat ayno?"
kidaann nam se akka fad.
Yesus nam kum hen dansiyy
(mati. 14,13-21; mar. 6,30-44; yewa. 6,1-14)
10 orr hitaymatenno por se iyyaa ullop hitameneeshsh mitaatene iyaan iyyaa erkayyen dahenn yesusi lelen.
iyyanno por se sapara petesayta kidamiyyu kapa kiyyo lak tahawa kiyyop iyyaanneeh aan.
11 siipanno por se iyyat ulla kiyyu oot iyyaa ufnaaden maalla,
iyy kannass aanen.
yesusenno iyyaa qeeddad illo oot daamum Mooha kolliyy.
baaqampayyaan dinattot iyyaa fadusinniyyonno diniyy.
12 helpaan lashsh pea dehaatte,
soolleshiyy hundann lakk Yesus kapop dehaaden illo,
"lak hin innu are ulla kinnu oot iyyat tahaw kodd maalla,
siip hin arkapaash paattaanne mannaan ullaalle kikkiyyap anta damaanne por peot akkatta ikkim fottinan all hayyadu."
iyyi kiden.
13 Yesus lamm,
"iyaan iyyaa daminan inn iyyaa dayyaa."
he iyyaa kid.
iyyaanno,
"innu qafnu laaqqot henenne qurtsummet lakkeheepa;
etin annu dama piddinu male siip sedess amm kaynanemu."
he iyy kiden.
14 lekusa siipatenno diidda patt kum hen mini kiyyu kida.
Yesus soolleshayyess,
"siip sed nam hund hen,
hene,
ikkim hala,
hala lainninan kodaa" kid.
15 soolleshayyenno qum se iyyat iyyaa acacep siipat ikkim qaainninan kodusiyyen.
16 iyyat illo laaqqot hena settenne qurtsummet lakka sett qeedd moontallel tooy illo aypila dehay.
laaqqot se qall mooss illo ikkim orr qootinan soolleshayy dayy.
17 siipanno dahenn damen quuhen.
soolleshayyenno moossansanaan siip se kela hat qunna hundann lakk qeedden.
betsiroos Yesuset kristoos koddaayy lel
(mati. 16,13-19; mar. 8,27-29)
18 lashsh shakka helpaan Yesus haw dinkamattaalle kiyyo,
soolleshiyy iyy kapop deyen.
iyyat illo,
"kat orrat aynu ani kidin?"
kid iyyaa kaassad.
19 iyyaa illo,
"orr shokku,
'yewannis ahlisampayt' hekidin;
shakkan,
'eliyaas.
' hedi kidin.
'himampayya olu ila iyy shokku toxtalle sohad.
' iyyaan kidiyyanno kiyyan."
kiden iyyi mitaattiyen.
20 iyyat lamm,
" 'inn illo aynu ani kidin?"
kid iyyaa kaassad.
betsiroos illo,
"att kristoos heka Moohaat."
kid immitaattiy.
21 Yesus lamm ikkim iyyaa sed namass inlelin qimiy iyyaa acac.
Yesus kanni antot mashshiqa kodda kaassannin
(mati. 10,38-39; 16,24-28; mar. 8,34-38; luqaa. 14,25-27)
22 Yesus soolleshayyess kide,
"meet nam rakkot lekit qeeddatta qimaayyaanne kaadayya suukamma Moohaatenne (qeesawaanne) kollisampayya halitt muusetenno iyy tuffatta,
ikasa,
illo iyyat lashsh halpattiyaate toxt ila sohatta iyy fadusinnin."
23 ukannass lamm iyyaa dahennes kide,
"nam an kanni anta fadiyyu et kiyyaado ihaimu;
lashmin masqaletayyenno haisadu illo an kanni deyu.
24 nam kiyyatayyin hatatta fadiyyu dahenn allpatinnina;
nam ootaawu maalla kiyyatayy allpatinniyu dahenn kiyyatayyenn hatannina.
25 namat et shorokum husslah dahenn akkadu illo nafsetayy allpatiyyo,
maana ikkoyna?
26 nam ananne lelaawun lilmaanniyu dahenn helpaan meet nam serkooyyanne serka appayyetenne serka hitaymiyya miilampayyaatin deyiyyo,
iyyann lilmaannina.
27 shaakketin inni lelin,
orr ar ell ila karaddu iyyaan daamum Mooha akka male raawa diinnin kiyy."
ohama piss Yesus
(mati. 17,1-8; mar. 9,2-8)
28 Yesus ishaama hin ishaame lashsh lakkushetap kishshu kanna betsiroosenne yewannisenne yayqoopenneeh iolle dinkamatta utet qarop fayyad.
29 helpaan iyyat dinkamanniyyo pissayy ooham;
uuwashayyenno ataatt,
haahisa haahitt.
30 esseteeh lamm nam lakk deyen illo iyy olle ishaamannin;
iyyaanno muusenne eliyaas kida.
31 iyyaa serkaan akkaaden,
oot toxt Yesus se yerusaalemi kaysinnintot ishaamin.
32 helpaanette betsiroosenne katayy peotann tashshen peaden.
helpaan iyyaa hayenekuless,
serka yesusenne nam lakka se iyy olle kiyyu akken.
33 helpaan nam lakkotin iyy kapa reehanniyane,
betsiroos yesusess kide,
"kollisampayt!
etin ari olann kid innu hedikk,
semmaalla taaset halpatt,
shakk hedess,
shakk muusess,
shakk eliyaasi dihinu?
helpaan betsirooset sedep kidiyyo,
iyaan iyyat ishaamiyyu amm heupamu kida.
34 helpaan betsiroos sed ishaamiyyo,
urrashshet deit iyyaa pat uwashitt.
helpaan urrashshet iyyaa pat uwashitte,
kerra betsiroos hehuuren.
35 urrashshet se ilaashsh lamm nass,
"hin meetaaw,
antu pahisad;
iyy qara dakayaa!"
kidiyyu dakaysamaad.
36 helpaan nass hin dakaysamaade,
Yesuset iyyeeh kodd akkaad.
soolleshayyenno hin iyyaa akken dahenn nami lela male rui kiden.
Yesus, meet laaffot oshshittet qara kishshu diniyy
(mati. 17,14-18; mar. 9,14-27)
37 paarreshadde helpaan yesusenne soolleshayy halpatt utet se qareett lekkanniyane,
siip lek Yesus mini paiy.
38 siip se ilanno nam shokku asset kid ullup,
"kollisampaytallo,
oot meetaawu iyy shokkooh kodd maalla,
ikkim ani dininnintossin hed dinkamannin.
39 toare,
laaffot oshshittet ullaxash qapin illo ullupusinnin,
lahan qain rampashsh kapin kafarusinnin tsitsirusinnin;
tirrayyenno allipepeesannin ikkaan miiditu kanna hayyin.
40 ikkim laaffot oshshittet sett qara sohashinninanessin soolleshayt kaassad iyyaa illo amm sohashisa hefottenemu."
41 yesusenno sedep kid immitaattiy "dalashot amaantet daft,
kellate!
hak awametesin inn olle kallaannina?
hak awametessin inn duupannina?
intu meetaaytin areesh deye."
he iyy kid.
42 helpaan meet hin Yesus kapop dehaade,
laaffot oshshittet hin lahann qait tsitsirusitt.
Yesuset lamm laaffot oshshittet sett tush illo meet settenno diniyy appayyi dayy.
43 siipanno dahenn irrot Mooha se kaant akkaaddonn heshammaden.
Yesus oot toishayyet lakkiyya lel
(mati. 17,22-23; mar. 9,30-32)
helpaan iyyaa, hin Yesus erkayy qara shammatalle kiyane, Yesus soolleshayyess kide,
44 "lel se ammann antu inni leliyyu dikkiyyaa qalltaysada!
toare antu meet nam hark orr qallessin tarpisamina daassamina."
45 iyyaa lamm amm ishaamayyin qall hetaysadenemu;
ikkim iyyaa qallxintaysanninessenno qunda ishaamaanett iyyaa tura dekaden.
ikkim iyyaa iyy inkaassanninessenno hehuuren.
innu ila nam dahetaynu qara tawu ayno?
(mati. 18,1-5; mar. 9,33-37)
46 soolleshayyenno,
"innu ila nam dahetaynu qara tawu ayno?"
kidaann orrshiitta hiren.
47 Yesus lamm qaap mutsuraaddot ufunaad illo medda tinnax qeed ikapi ellashshiy;
48 illo,
"nam meet sed mahhaawun qeeddanniyyu dahenn an qeeddannin;
nam an qeeddanniyyu lamm se an hit qeeddannin.
otanshayn ila iyy dahetayn kannaatt kiyyu,
iyy dahetayn qara tawu koddina."
iyyaa kid.
orrshiitta diittot ollin kinnaatta koddin
(mar. 9,38-40)
49 sekanna yewannis yesusess,
"kollisampayt,
nam shokku mahhaaytin qayy sohashinnin innu akkin illo oot iyyat nam innu olle kiyyu kodda diiy maalla dawrin."
ikkid.
50 Yesus lamm,
"nam inn shiitta diinniyyu dahenn oot iyyat nam inn olle kiyyu kodd maalla,
dawra diiyyaa!"
ikkid.
orr samariya Yesus qeeddatta diittaaddu
51 helpaan lashsh moontallep qeedamaayy dehaatte,
Yesus yerusaalemep antaass kutad sohad.
52 orr iyy tureeshsh anninonno hit;
iyyaanno iyy turin heikk dikkisaass paat se samariyaalle kiyyo ishokkop aanen.
53 hekoddu male oot iyyaa ullin tarpa yerusaalemep antaayy ufnaaden maalla,
orr huss sett amm iyy qeeddatta hefadenemu.
54 soolleshiyy yayqoopenne yewannis helpaan iyyaa sed akkenekuless,
"polda!
[qum eliyaas kodep]a ikkim apitt moontalle lekkanninu siip sed doohininu ikkimin acacinnoss hehinntamu?"
he ikiden.
55 Yesus lamm poraaddoosh mijir kidd illo iyyaa tush,
[illo,
"inn lamm por laaffot hekanteeshsh ikkim kodditen amm heufutanemu;
meet nam iyyat maalla dey,
kiyyat nam dinisaass male,
amm allpatisassemu."]
b ikkid.
56 ullanno sohaden illo paat pilap aanen.
rakkot orr Yesus kanni anniyy qari paishshu
(mati. 8,19-22)
57 helpaan yesusenne soolleshayy antona qara kiyaane,
nam shokku yesusess,
"por se att annishopa dahenn hed olle aanonu" ikid.
58 Yesus illo,
"kaxalt qaaw qafta,
hampiraanno ays qapan,
antu meet nam lamm por antu mashshaw ukkeli qapanninu naf amm henqapamu."
kid immitaattiyy.
59 nam pilass lamm,
"an kanni hooyyii!"
he ikid.
nam hin lamm,
"polda,
turaqatta aanonu appaawu mookonu."
hekid kaassad.
60 iyyat illo,
"raawet pukkaddu mookadenii att lamm aanii illo oot daamum Mooha lelii!"
he kid immitaattiyy.
61 nam pil lamm,
"poldaawo,
antu hed kanni anta fadinkiy.
hekoddu male turaqatta ikimin anninu orr manaw olle waarnu helpa ani dayy;"
he ikid.
62 Yesus illo,
"nam peehanaas irifet qapiyu illo ikannaash mitaatiyyu lak toyiyu daamum moohaati amm koddiyyamu."
hekid immitaattiyy.