iskatt se Yesus kanni anniyy
8
1 sekkannakuless Yesus saparaddaanne paattaaleesh lel masmasunt heka daamum Mooha lelan mimmitaatin;
soolleshayy hundann lakk settenno iyy olle kiyyan.
2 settep lamm iskatt laaffot oshshittet qara sohattene iyyaan baaq ila dinad Yesus kanni anniyy kiyy.
iyyaanno,
maariyaam se qayy tapp qara sohadd mektelishshet kidamishshonne,
3 yohaana haypaat kuss,
se man herootise kaadum qapotenne,
soosinanne hepilanno iyyaan lek kiyy;
iskatt hin yesusenne soolleshayyess kodashetaddun erkannin.
paahnat hotta seyisampayt
(mati. 13,1-9; mar. 4,1-9)
4 helpaan siip lek saparaddaalleeshsh iyy kapop deyen orqudiqapamene,
paahnat sed iyyaa lel,
"toare peehampayt shokku hotta seisa sohad.
5 helpaan iyyat seinniyyo hotta karatiy paana kapeesh pei qall iqawsam illo hampira deyen damen.
6 hotta karatiy lamm onk qarass pei;
helpaan hottotin deehekuless,
oot hussat japant dap maalla,
hekok.
7 hotta karatiy lamm otant huushsha quddet ilass pei,
huushsha quddet settetenno sakkattaan qari kaanen illo sakkattaan nyiren.
8 hotta karatiy lamm ul somm qalless pei illo deh;
sakkattaanetteno hekammen illo mashshimashsh hark tseet qareell qunda kodaden."
ukannass lamm Yesus,
"nam lappa dakayiyyu qapu hedakayu!"
hekid.
Yesus maalla paahnatin ishaam
(mati. 13,10-17; mar. 4,10-12)
9 lamm soolleshiyy yesusess,
"kat furila paahnat sed maana?"
hekiden kaassaden.
10 yesusenno asset kid iyyaa mitaattiy,
"hin dekam heka daamum Mooha ufunaattot innass hedaassam;
orr pilass dahenn lamm,
heakkitete ikkim iyyaa inxishaakiness,
hedakaytete ikkim iyyaa inqaapanniness,
paahnatann iyyaa lelamin."
furila paahnat hotta sett
(mati. 13,18-23; mar. 4,13-20)
11 furila paahnat sett hin iyyaa,
hottot lel Moohaat kida.
12 hotta hin paana kapi pei akkinniyyu,
orr se helpaaseeh lel Mooha dakayiyyu kida;
hekoddu male ikkim iyyaa inxamaanin illo indinanniness,
taapiloset deyin lel se iyyaa dakayen qalle qeeddin.
13 hotta hin onk qari pei akkinniyyu,
orr se lel Mooha masmasuntin dakayiyyu kida;
hekoddu male iyyaa amaniyan helpaaseeh kida;
oot iyyaa hittin dapen maalla helpa ekawsamaate marmanniyyan.
14 hotta hin quddet ili pei akkinniyyu,
orr se lel Mooha dakayiyyu kida;
hekoddu male qaap husslahatenne shorokumanne,
senussa kallat husslahatenno nyirin illo iyyaa qunda male hatinnin.
15 hotta hin ul somm qalli pei lamm akkinniyyu,
orr se qaap sommanne mutsura dikkin lel Mooha dakayiyyu lushanniyyu.
iyyaanno lamm iyyaan lel moohaatin qiman qunda daanniyy kida."
ispot opawiyyu attumat daattaass
(mar. 4,21-25)
16 lamm Yesus asset kid,
"nam ispa opanniyu illo qunna qari qupaappinniyu shoke siret keli haayiyu amm hekiyamu.
sekapeeshsh et namat tallop luumiyyo ikkim attumat akkinnoss akkan kaan qarass haayin.
17 "settep lamm hin qar uuwashshisam qar pulama male,
hin dekam ufnashama male hatin amm hekiyyanemu.
18 "semmaalla ashshann ikkim dakayishshan illushadaa;
se qaposs qarass padawamint daassamint;
se dap lamm se iyyat henqap kidiyyu naf qara qeeddamint."
inkot yesusenne insharaddaayy
(mati. 12,46-50; mar. 3,31-35)
19 inkot yesusenne insharaddaayy Yesus kapop deyen.
hekoddu male lekussa siip minann amm iyy kapop dehaatta hefottenemu.
20 semmaalla orrat,
"toare inkoshaytenne insharaddaatt altass ellen,
hed akka fadin."
hekiden iyyi lelen.
21 Yesus illo,
"orr se lel Mooha dakayiyyu illo inkallaanniyyu dahenn iyyaa inkoshawonne insharaddaawu" ikkid.
Yesus kota pakatetat rui kidusiyy
(mati. 8,23-27; mar. 4,35-41)
22 lashsh shakka Yesus soolleshayy olle konkaall lai illo,
"pakatet patop tarpinaa" ikkid.
iyyaanno antona sohaden.
23 helpaan iyyaa pakatet se qara konka settin anniyyane Yesus hepead.
essete lamm kota kaan pakatet se qara sohad illo oot haqat konkaaddu innaaka hirad maalla,
patet iyyaa paxa hirt.
24 soolleshiyy illo,
"polda!
polda!
patinkinna" kiden Yesus hayiyyen.
iyyat illo hay,
hayyaanne kaahatta pakatet sett tush;
hayya settenne kaahatta pakatet sett esseteeh ellen;
rux kida kaanenno kodd.
25 sekanakuless Yesus soolleshayyess,
"amaanteshinn ahayla kishsh?"
iyyaa kid.
iyyaa lamm ikaaness shammaden nahen illo olli kikkidene,
"hin hayyanne kaahatta pakatet acaciyyu iyyaa iyy kap dakayiyyan kat ayno?"
kiden.
Yesus nam laaffot oshshittet qara kishshu diniyy
(mati. 8,28-34; mar. 5,1-20)
26 pakatet se qara tarpen huss se kelila patin kiyyo kerasenoone paiyen.
27 helpaan Yesus lahop lekkade,
nam qayyin qapam saparaalle sohad illo iyy mini paiyy.
nam settenno hak iyyat uuwaat uuwatta alldiiyeeshsh heolad.
iyyat kallaanniyonno poosa qara male amm man tallaamu.
28 helpaan iyyat Yesus akke heullup,
Yesus turi sunk illo nass kaanin,
"meet rumma heka Mooha yesuse,
maana an olle qafta?
tonhedess an miida diiyyii!"
ikkid.
29 iyyat maalla sedep kid,
oot Yesus laaffot oshshittet sett ikkim nam se qara sohanninitu acac maalla kida.
oot laaffot oshshittet hinett helpaan leke nam se qaft maalla;
sansalanne silf lukkaatenn hidamin lushamin;
sansalanne silf lukka se iyyat inhidamiyonno allqqeqepinnin illo qayyatini por namat ulla kallaatta diinniyop iyyin annin.
30 Yesus illo,
"mahhaatt ayno?"
kid kaassad.
iyyat lamm oot qayy lek iyy qara kiyyu maalla,
"mahhaaw lekiyona" he kid immitaattiyy.
31 qayyadaan,
"tonhedess tekel didim se kelop innu hayya diiyyii" hekiden dinkamaden.
32 uila kamara ketta maashat lekit heelt hiikant kiyy.
laaffot oshshittet hinett illo,
"et innu sohashinnishshu koddo,
tonhedess,
heelt maashat sett qallep innu hayyii!"
kidit dinkamatt.
33 Yesus illo,
"aanaa!"
iyyaa kid.
semmaalla laaffot oshshittet hinett orr se qara hesohat illo heelt maashat sett ilopa kalt.
heelt maashat settetenno dahenn kamara qareett feelanta yaamen illo pakatet se ili limamen
34 shinkama maashat settetenno helpaan iyyaa hin kodd akkenekuless hefeeladen saparaanne paattaallep kalen ishaamen.
35 orranno hin kodd tooyaass mannooddu talla sohaden illo Yesus kapop deyen.
nam se laaffot oshshittet qara sohattenno mutsurooyy qalli ooren iyyat uuwaat uuwad lukka Yesus keli laiye akken illo huuren.
36 orr se tureeshsh hin kodd akk,
nam se laaffot oshshittet qara kishshu ikkim ashshann dinad siipi lelen.
37 sekannakuless orr huss kerasenoon kapeesh kiyyu dahenn oot iyyaa ikkaan huuren maalla,
ikkim Yesus hussaaddu qalle sohanninu all anninoss dinkamaden.
semmaalla Yesus konkaalless laiyy illo por se iyyat ullaash deyep qalleesh mitaat.
38 nam se qayyat qara sohadenno yesusess,
"tonhedess hed olle aanonu."
ikkid dinkamad.
Yesus lamm asset kid iyy hayyad.
39 "manaytep kalii illo Moohot ikkim akkan ashshann kaan hedi erkayy dahenn lelii" ikkid.
nam hinett illo iyaan Yesus iyyi erkayy saparaalleesh dahenn ishaaman aan.
inant iyairosenne iskattet se uuwaat Yesus qappatt
(mati. 9,18-26; mar. 5,21-43)
40 oot siipat dahenn iyy lushatta qara kiyyan maalla,
helpaan Yesus qalleeshsh mitaat deye masmasuntann iyy qeeddaden.
41 helpaanette nam iyairoos kidamiyyu kaadayt man dinkam ayhutaat dey lukka Yesus keli sunk illo,
"tonhedess hooyii manaawop annaa."
kid dinkamad.
42 sedep iyyat maalla kid,
meeshayy shakkaah it par hundann lakk kaysitt oot it baaqit toxt dehaatt maalla kida.
Yesus ullop anniyyo orrat orrtuttuquurin illo iyy dukkin.
43 ulla lamm iskattet shakk par hundann lakk diikat qara urqiyu kiyy;
itanno kodashetadd it qaftu orr qoricat rawitt.
hekoddu male amm aynono it dinisa hefottemu.
44 it illo patayyalleeshsh Yesus kapop dehaatt qema uuwaashayy qappatt.
esseteeh diik se it qara urqiyyonno ell.
45 Yesus illo,
"aynu an qappad?"
kid kaassad.
iyyaa dahenn,
"amm innu hed henqapanemu."
kiden.
betsiroos lamm,
"kollisampayt,
siipat sedep ortuttuqquuriyan hed kanni anniyyane heakkitete,
aynu an qappad kidimu?"
he ikkid.
46 Yesus illo,
"shaakketass nam an qappadd;
irrot an qara sohattaadd henxufnaad."
ikkid.
47 iskattet settenno dekatta diittaadd helpaan it ishaakitekuless,
helshuntan deit,
Yesus turi sunkit;
maana maalla ikkim it iyy qappattenne ashshann ikkim it esseteeh dinatt siip se turi dahenn lelt.
48 iyyat illo,
"meetoot!
amaanteshitt hed hedinitt,
andotin aanii."
iti kid.
49 sanu Yesus sed ishaamaalle kiyyo,
nam shokku man iyairoos,
heka kaadayt man dinkamateeshsh,
deyy illo,
"meeshitt hetoot;
sedkanneeshsh kollisampayt aypoti payyahisa diiyyii!"
ikkid.
50 Yesus lamm sed dakay illo iyairoosess,
''amaanii male huura diiyii;
inanshitt dinanninta."
ikkid.
51 helpaan iyyat man iyaairose paiyye,
betsiroosenne yewannisenne yayqoopenne appaanne inkot meet sett pateesh ikkim nam pil iyy olle tallop inluuminess kodd.
52 orr ulla kiyyu lamm dahenn ullupiyan meet se pooyin.
Yesuset illo,
"pooya diiyyaa,
meet hin hepeatt male amm hetoytemu."
iyyaa kid.
53 oot iyyaa toxt meet sett upan maalla,
deffeeqaass iyy qara holsaden.
54 iyyat lamm harkadd qap illo,
"yent meet,
hayii!"
it kid.
55 itanno,
laaffot qalli oort it illo esseteeh laha full kidit.
Yesus illo,
"iyaan it damintu iddayyaa!"
kid iyyaa lel.
56 leemma meet settetenno heshammaden;
iyyat lamm hin koddam nam lela diiyyaa hekid iyyaa acac.