Yesus erhayt sinkitt tseetatt diniyy
(mati. 8,5-13)
7
1 Yesus hin dahenn siip lel kaysiyy kanna qifirnaahomep kal.
2 ulla lamm sinkitt tseetat kiyy illo erhaytaayy iyyat qar hoxsanniyyu baaqin toxti dehaad.
3 helpaan sinkitt hin torrot Yesus dakayekules,
qimaayya ayhutaatess,
"ton innass Yesus ikkim erhaytaawu dinininu aanaa ani dinkamaa."
kid hit.
4 iyyaanno Yesus kapop aannen illo,
"qariqaarisa sed iyyi erkasa hed fadusinnin;
5 iyyat siipaayinnu hoxsaannin;
man dinkamateno innu dihh" kiden qimiyen dinkamen.
6 semmaalla Yesus iyyaa olle aan.
helpaan iyyaa manayy dehaadene,
sinkit hin moyshadaayy Yesus kapop hit,
"poldaawu,
manawu tallop lumaass amm hedi koddintamu,
manaawop deya payyaha diiyii.
7 an nafenno amm hed kapop deyaass henkiyyamu.
semmaalla att ayti ellii illo leleeh lelii;
erhaytaawu dinannina.
8 antu mashshawoss hayyot an qareell kiyy antu iacacamiyun qap,
wotattar antu ikannaatt acaciyyonno hekiyyan.
iyyaa ilanno etin iyy shokku 'aanii!
' kidiyyo anniyy;
etin iyy shokkossenno 'hoyyii!
' kidiyyo deyiyy;
etin erhaytaawossenno 'sed erkayyii!
' kidiyyo erkanniyy."
ikkid.
9 helpaan Yesus hin dakaye heshammade illo por orr se iyy olle kiyyoteesh mijir kid,
"israaelet naf ila amaantet sedep kishshu amm apure henxakkemu" iyyaa kid.
10 orr se hitameno helpaan iyyaa man sinkit settetep mitaatene,
erhayt hin hedinadd iyyaa akken.
Yesus meet hiyyaytet shakkat diniyy
11 paareshadde Yesus saparaan naayin kidamiyyap aan;
soolleshayyenne siip lekenno iyy olle aannen;
12 helpaan Yesus harat saparaanetete painniyyo,
orr pukka haiyy saparaan qalle sohanniyyu kiyy.
nam se toyenno inkoshayyess iyy shokkooh.
itanno hiyayitet irishshatidd qarin toyy.
orr saparaanett ila siip lekenno it olle kiyyan.
13 helpaan poldat it akkekuless,
itass mutsurood illo,
"pooya diiyyii!"
ikkidd.
14 lamm Yesus ittureesh antaap kodd rohaan qappad;
orr se rohaan haiyyenno ellen illo yesusett,
"yem kolikolit,
hayin hedi kidin!"
ikkidd.
15 meet se toyenno errop hay laiyy illo ishaama hir;
se kanakuless,
yesusett meet set inkotay dayy.
16 siip settenno dahenn huran qapamen illo,
"himampayt kaan otanishayinu ila sohadd,
Moohot siipayy dinisaass deyy."
kidan Mooha aypisaden.
17 torrot Yesus hin haft yihutaatene paat se ukapaash kiyyu qalles dahenn dakayisamatt.
yewannis ahlisampayt kapeeshsh orr Yesus kapop hitam
(mati. 11,2-19)
18 soollet yewannis oot hin koddet dahenn yewannisi ishaamen;
iyyat lamm soolleshayy ila nam lakk hemb illo,
19 "hin op deyina kidiyyan hedemu?
kat hepilin lushannina?
' kida kaassadaa."
kid Yesus pold kapop hit.
20 iyyaanno Yesus kapop aanen illo,
"yewannis ahlisampayt hed kapop innu hit,
'hin op deyina kidiyyan hedemu,
kat hepilin lushannina?
' kida kaassadaa hekid."
iyyi kiden.
21 esseteeh Yesus orr baaq hawhawi kikkiyyu qapu diniyy,
laaffot oshshittetanno sohashshiyy,
indamalaan lekess inda qahiyy.
22 sedepanno iyyaa kid,
"aanaa illo hin inn akkitenenne dakayten dahenn yewannisi lelaa.
toare indamala akkiyyan;
shoopayyaanno pahiyan annin;
orr paylot qapu dinanniyan;
dahayya dakayiyyan;
orr raaw hayyiyan;
hiyayaass lel masmasunt lelamiy.
23 nam anin shurshura diinniyyu iyy hartood."
24 helpaan orr hin yewannis kapa hitam tawen kanna Yesus siipass oot yewannis ishaama hir,
"maana tooyaass lak patpat kiyyu qallep sohatten?
shompoqot se haayyot seseyinniyu tooyaassemu?
25 shoke maanna tooyaass sohatten?
nam uuwaat sira uuwademu?
orr uuwaat sira uuwanniyu naalan kallaanniyyu et koddo,
man daamada talla akkaannin.
26 kat maana tooyaass sohatten?
himampayt tooyaassemu?
heyye,
se himampayt qara tawu tooyaass hen inn kidin.
27 hin it sedep kidant ootaayy tsaafant hin iyy,
'toare hitaymishshaawu se paanaayt uushuqinun hed turi qattinnina hitina.'
28 nam iskattet haayt ila iyy yewannis qara taw amm hekiyamu;
hekoddu male iyy daamum Mooha qalle nam heikk kanneett kinnaanniyyu iyy qara tawunaannina."
29 lamm helpaan siipat dahenn hin dakayene,
qarats quurampayya naf hata male yewannis iyyaa ahliy,
illo iyyaanno erkama Mooha iyaan pah koddaaddu qall ishaaken.
30 farasetanne kollisampayya halitt lamm,
"amm yewannis innu ahlininamu" kidaann has Mooha qar hittiyen.
31 ukkannass Yesus sedep kid,
"kat dalashot sed maanannin qapina?
maana paahnaann?
32 iyyaa meddaan mooraalli qaaiy paahanaannin.
iyyaanno katooddu hembin illo,
'kuluttatin inni dawin,
inn lamm amm hehirpitenemu;
saydaanno inni saydin,
inn lamm amm hepooytenemu!'
33 ahlisampayt,
yewannis dey dama damaanne ukot woynet uka male kallaade,
'qayy qara kiyy.
' he ikkiditen.
34 meet nam lamm dey,
damin ukiyyo,
'toare hin kardelayt,
damotanne ukot hoyu,
mooyshsh qarats quurampayatenne heka juppampayyaat' hekkiditen.
35 ufnaat,
shaakket koddaadd meddoddann ishshaahmannin."
iskattet shakk lukka Yesus shittotin roopitt
36 faraset ila iyy shokku Yesus piha hemb,
iyyat illo man farasishsh settetep aan piha dama lai.
37 saparaan qalle iskattet juppampaytet kiyy.
helpaan it Yesus man farasishatep piha hembamaayy dakayte,
fashkot daka alpastsiros kidamiyyu ila soorumant shittotin kishshonn deyt.
38 Yesus pateeshsh lukkaayy kapi ellit pooyin,
ilmamaaddan lukkaayy japinnin,
mashshaddin ushuqin,
lukkaayy diddinkin,
shittotin roopin.
39 farasishsh hin piha iyy hemb helpaan iyyat sed akkekuless,
"nam hin himampayt kodd kid,
iskattet hin iyy pat qaqqapannishshu,
aynu ikkim it kodditenne jupampaytet ashshann kishshu ikkim koddit ufunaannaay" he kid mutsuroyyalli qaapad.
40 Yesus illo,
"simoone,
iyaan antu hedi lelinun qapa."
ikkid.
iyyanno,
"kollisampayt,
owo ani lelii."
he ikid.
41 yesusenno asset kid ukkannan qap ishaam,
"nam pirkaata pirkaatinniyu qara nam lakk iyyaan kodashet qeeddad kiyy;
nam shokku tinaareta tseta hen,
iyy shokku lamm tinareta hund hen pirkaassaden.
42 lakkaddon,
helpaan pirkaataan oorisot iyyaan pushekuless,
nam hin iyyaa pirkaatiyy kuur set all iyyaa diiyy.
kat kuurampayaan lakk ila hekann ikkaan nam se pirkataan iyyaa dayy hoxsaannaayepa inn kinnan?"
he ikkid.
43 simoon illo,
"se kuur lek all iyy diissam ikkaan hoxsaannaayep an kinnaan."
hekid immitaattiyy.
Yesus lamm "mitaattilaatt hedikk."
he ikkid.
44 sekannakuless Yesus por iskattet settetep mijir kid illo simoon kide,
"iskattet sed akkikkishshamu?
antu manaytep deye,
att amm haq lukka naf an hedaattemu,
it lamm lukkaaw ilmamoddan jiqitt mashshaddin ushuqit.
45 helpaan antu manayte paiye amm an hedinkitemu,
it lamm hak antu manaytep luume hirt lukkaaw dinka amm allhexellashittemu.
46 att mashshaw naf amm tifann heroopitemu,
it lamm lukkaaw shittotin roopitt.
47 semmaalla oot it hoxsunt kaant akkitt maalla jupposhidd hin lekit all iti diissantin hed kidin.
nam jupposhiyy hin qoji iyyi diissamishshu lamm iyyat hoxsaanniyonno iqojesseeh kida."
48 lamm Yesus iskattet settess,
"jupposhitt all uushuqant."
he it kid.
49 orr se iyy olle dama qara kiyyonno,
"hin juppot naf alliushuqiyu ayno?"
kidan mutsurooddu qalleet qaapatta hiren.
50 Yesuset lamm iskattet settess,
"amaanteshitt hed dinitte,
andotin aanii."
he iti kid.