kaassiy oot lashsh sampatat dehaad
(mati. 12,1-8; mar. 2,23-28)
6
1 lashsh shakka sampata ayhutaate Yesus ul kaappa qallin tarpin;
helpaanette soolleshiyy shiyya kaappaat mitaden harkaddu qalli riishaden quma hiren.
2 faraset ila orr shakkan lamm soolleshayyess,
"oot maanatesse lashsh sampata qari iyaan erkawsama daassama diiy erkannin?"
hekkiden.
3 Yesus illo,
"tawitet helpaan iyyanne orrase iyy olle kiyyu tuffene,
iyyat ikkim maana kod inn inwaarusinnemu?
4 iyyat man moohaatep kal illo laaqqot daayy se suukamma pateeshsh orr pili daassama diitt dam illo orr se iyy olle kiyyossenno day" kid iyyaa mitaattiyy
5 ukkannass lamm,
"meet nam,
pold sampataat."
he iyyaa kid.
Yesus nam harkaayy muluhluh diniyy
(mati. 12,9-14; mar. 3,1-6)
6 aww sampata pilate Yesus man dinkam ayhutaatep kal kollisaalle kiyyo,
nam harkayy miskittishsh muluhluh ulla kiyy.
7 kollisampayya halittatenne faraset iyaan iyyaa yesusin kasasinan akkatta faden illo,
"lashsh sampata qari dinisaayy intu innu tooynu."
kidan lushattaalle kiyyan.
8 Yesuset lamm qaapaaddu ufunaadd illo nam se harkaayy muluhluhess,
"sohadu otantalli ellii!"
ikkid.
nam settenno hesohad otantall ell.
9 Yesus illo,
"intu an inn kaassadonu;
lashsh sampata qarass hin daassam iyaan dikk erkasaamu kat iyaan nayq erkasa?
nafset dinissamu shoke ikasa?"
iyyaa kid.
10 lamm helpaan iyyat orr se iyy kapa kiyyu tooy kannakuless,
nam settess,
"harkayt qall pahiyyii!"
kid.
iyyanno harkayy qall pahiy,
harkayyenno dinad.
11 kollisampayya halittatenne faraset lamm ikkaaness jiiaden illo Yesus qarass maana ikkim erkasa fottinan suladen.
Yesus orr hitaym hundann lakk pahiyy
(mati. 10,1-4; mar. 3,13-19)
12 lashsh shakka yesuse dinkamaataass utet qarop fayyad;
ullanno awaddat muumetass Mooha dinkamattaalle pead.
13 helpaan lashsh partekul,
soolleshayy ikkapop hemb illo iyyaa ila nam hundann lakk pahiyy,
"orr hitaym" kid mahh ikkod.
14 iyyaanno,
simoon se iyyat betsiroos kid mahh qara kodenne kafittaayy intiriyaas,
yayqoopenne yewannis,
filiboosenne pertelomoos,
15 matiyosenne tomaas,
imm ilfiyoos yayqoopenne simoon se hussayy maalla sootin kidamiyyonne
16 imm yayqoop yihutaanne yihuta asqortish se Yesus toxt tarpiyy dayy kida.
Yesus siip lek kolliyy diniyy
(mati. 4,23-25)
17-18 Yesus lamm orr hitaym olle utet qaraatt lekkad illo qershall ell.
soolleshayy ilanno iyyaan lek ulla kiyy;
settep lamm orr iyy qara dakayanne baaqaaddu ila dinatta fad iyyaan lek ullop dey.
iyyaa deyen,
huss yihutaate sapara yerusaalemetenne,
saparaddaan pakatet kapaash kikkiyya tsirosenne sitonnaash kida.
orr laaffot oshshittetin qapam rakkanniyanno deyiyyan dinannin.
19 oot irrot dinila iyy qara sohannin illo nam dahenn dininnishshu maalla,
orrat dahenn Yesus harkaddun qappatta fadin.
masmasuntanne dappet
(mati. 5,1-12)
20 Yesus soolleshayy tooy illo sedep iyyaa kid,
"inn hiyyayya,
oot daamum Mooha inn kodd maalla,
hehartootten.
21 inn iyyaan ammann tuffiy,
oot inn ukkanna duttannintan maalla,
hehartootten!
inn iyyaan ammann pooyiy,
oot inn ukkanna holsintan maalla,
hehartootten.
22 "hekaawu heka meet nam minan et orrat inn qar hittiniyan,
all inn reehiyan,
inn otiyan mahh inn qara patinniyane,
inn iyyaan hartood!
23 oot heriyaann moontalle ikkaan kodd maalla,
hin dahenn et inn qari deyiyyane masmasuntin onyaraa;
appadooddonno himampayya qarass nayqunt sedep kishshu erkayen.
24 "inn shoroht lamm,
iyaan senusa inni fadusinniy dahenn heakkattene,
innass pelaw!
25 "inn iyyaan ammann duttan,
ukkanna tuffihintane,
innass pelaw!
inn iyyaan amaan holsanniy,
ukkanna oot inn dappinnintan poyintan maalla,
innass pelaw!
26 "orrat dahenn ootayness iyaan dikkaah ishaamiyyane,
innass pelaw!
appadaaddonno himampayya eerpampayaass settep koden.
nam se nam qar hittinniyyu hoxsatta
(mati. 5,38-48; mati. 7,12)
27 "inn hin an qara dakayiyass lamm,
assetin inni kidin,
orr inn qar hittinniyy hoxsaadaa;
orr se inn qar hittinniyoss iyaan dikk erkayaa;
28 orr inn otiyyu qoraa;
orr inn qar kaliyossenno Mooha dinkamaa;
29 nam se aaddaatt shakkan paaliyoss,
ikkim aaddaan shakkananno paalinu immitaattiyy;
nam se kopportaayt qeeddanniyyu,
tsuppuqoshaytenno heqeeddadu.
30 nam hed qara fadanniyyu dayyii;
nam se mehaddaatt hed qara qeeddad ikkim hedi mitaatinninu qara kaassatta diiyyii.
31 iyaan ikkim namat inn erkanninu inn fadishshan settep lamm innanno nami erkayyaa.
32 "et orr inn hoxsaanniyooh hoxsaannishshane,
akkan hawi kiyyu inn akkannintan maaniyya!
juppampayyaanno orr se iyyaa hoxsaanniyyu hoxsaanninpa;
33 et orr iyaan dikk inni erkanniyyosseeh iyaan dikk erkannishshan koddo,
akkan hawi kiyyu inn akkannitan maaniyya!
juppampayyaanno sedep kodinpa.
34 et orr se inn 'innoss mitaattinninan' kidishaneseeh pirkaatittane,
akkan hawi kiyyu inn akkannintan maaniya!
se iyyaa pirkaattiyenneeh qar oora qeeddattaass et koddito juppampayyaanno juppampayyaass pirkaattinninpa.
35 inn lamm orr inn qar hittinniyy hoxsaadaa!
iyaan dikkanno iyyaa erkayaa!
'hin innu pirkaatin innu oorinninan' kida irraya male pirkaatiyaa!
et sedep koditane,
heriyaann ikkaan koddin;
medda Mooha heka rummaateenno koddintan;
iyyat orr se haarot oorisa diinniyyonne orr nannayq nafessenno hedikk.
36 qum appaann heka moontall nam mutsuroonniyyop,
innanno nami mutsuroodaa.
nam qari horat quura diiyyii
(mati. 7,1-5)
37 "nam qari horat quura diiyyaa,
inn qarassenno amm horat quuramintamo;
nam tuuha diiyyaa,
innanno amm tuuhamihintanemo;
allhattu kidaa,
inanno allhattot akkannintane;
38 dayyaa,
innassenno daassaminta;
hin inn inhurtenenn inni huramint;
settep lamm mehadda huraassa hin dikkann sholamint,
hissisamint,
patin paljusisan huramint inni daassamint."
39 lamm Yesus paahnat sed iyyaa lel,
"indamala lakk orrturqeedda fottiyyanemu?
et indamala indamala turqeeddan koddo,
lakkaddon ollin qaawallep peinan.
40 amm soollet kollisampayt qara tawnaannishshamu;
hekoddu male et kollinnashayy dikkiyu kollo,
qum kollisampaytayyetep kinnaannina.
41 qapayya se iilshaayt ila kiyyu akka male maanaass shoqqa se iilt kafittaayt ila kiyyu tooyin?
42 lamm qapayya se iilshayt ila kiyyu akka male ashshann kafittaaytess,
'kaafawu,
intu an shoqqa se iilshaayt ila kiyyu hed ila qeeddonu.
' kidin?
yem ipeepampaytu,
turaqatta qapaya se iilshaayt ila kiyyu allsohashshiyii.
sekkanna shoqqa se iilt kafittaayt ila kiyyu qeeddaass dikkinnihhint akkinta.
qoyrat dalotayyenn ishshaahamannin
(mati. 7,16-20; 12,33-35)
43 "qoyr dikk amm dalot nayq daliyyamu;
settep lamm qoyr nayqa amm dalot dikk daliyyamu.
44 qoyrat dahenn dalotayyenn ishaahmannin;
quddeet ila amm dalot pelesseti pohamishshamu;
settep lamm huushsha amarayt ila amm dalot woynet pohamishshamu.
45 semmaalla nam dikk hin dikk iyyat mutsurooyy qalle qapu qara iyaan dikk sohashshinnin;
nam nayq lamm hin nayq iyyat mutsurooyy qalle qapu qara iyaan nayq sohashshinnin.
man shilk qar dihamenne se shaahtalli diham
(mati. 7,24-27)
46 "iyaan antu inni leliyyu amm kaysinnikkishanemu;
kat maana maalla polda!
polda!
kidin an hembin?
47 nam poraawop deyiyyu lelaawu dakayin erkaman akkinniyyu aynu ikkim iyyat pahanaanniyyu an inni lelonu.
48 iyyat nam dikkiyy lak qosh illo shilk qari man dih paahnaannin.
malhaatanno deit man se tuqquurt;
hekoddu male,
oot man hin sheeht qint qapu maalla,
amm hesesseyemu.
49 nam lelaaw dakayin erkaman akkisa diinniyyu lamm nam sheeht male shaahattalli man dihanniyyu paahnaannin.
helpaan malhaat pait man se tuqquurte esseteeh sunk;
sunkantayyenno innayq kodd."