Yesus soollet turaqattaat hemb
(mati. 4,18-22; mar. 1,16-20)
5
1 lashsh shakka yesuse pakatet se kenseretsa kidamishshu kapi elle,
orr lek iyy kapop dey illo lel Mooha dakayya orrdukkin.
2 essete iyyat konkada lakk iyaan pakatet se kapi ell akk;
qurtsummet olampayya lamm konkadaaddu qalle lekkaden illo urkupaan iyyaa qurtsummetin oliyyan jiqaalle kiyan.
3 Yesus illo konkadaan ila se heka simoon kodd qallep fayyad.
simoonessenno,
"intoonn konka sed jawhayy pakatet qarash an annusiyye" kid.
sekannakul konka se qalless laiyy illo siip se kollisa hir.
4 helpa iyyat ishaamaayya kaysiyy kannakuless simooness,
"konka sed otant pakatet ilaash sekayii illo qurtsummeti urkupaann qaasaa" he ikkid.
5 simoon illo,
"kollisampayt!
awwaddat muumetassin qaasalle peann tashin illo amm qurtsummet henqapinemu.
hekoddu male att ass kidit maalla,
toare,
urkupaan qaasinhina."
he ikkid.
6 helpaan iyyaa urkupaan qaasenekuless,
qurtsummet lekit qapen;
urkupaaddonno hak mimmitaminannin paen.
7 semmaalla kataaddu hin konka pil qara kiyy ikkim iyyaa hesinaness noqqanttan hemben.
iyyaa illo deyen konkadaan lakkaddonn hak limama dehanninan qurtsummetin innaaken.
8 helpaan simoon se betsiroos kidamiyyonno sed akkekuless,
Yesus turass kilpiyad illo,
"poldaawo!
oot antu juppampayt kodd maalla,
an kapa all aanii."
ikkid.
9 iyyat sedep kid,
oot lekussa qurtsummet se kataayyanne iyy qapen iyyaa shammusitt maalla kida.
10 settep lamm medda saptiyoos hin kata simoon kodd,
yaiqopenne yewannisenno heshammaden.
Yesus illo simooness,
"haayy!
huura diiyyii;
sed kanneeshsh att,
nam orr ani hembiyyu koddinta."
heikkid.
11 helpaan iyyaa konkadaan huss qarop dehaayyene,
heikket alldiiyyen illo iyy kanni sohaden.
Yesus nam baaq paylot qapu diniyy
(mati. 8,1-4; mar. 1,40-45)
12 helpaan Yesus sapara shakkan qalle kiyyo,
nam dakintiyy dahenn paylotinb qapant iyy kapop dey.
helpaan iyyat Yesus akkekuless miintayy laahan qapad kilpiyad illo,
"et hinnaatto an dinisa fottihint."
kid dinkamad.
13 yesusenno harkayyin iyy qappad illo,
"henhinnaad dinii!"
ikkid.
iyyat illo esseteeh paylot se ila dinad.
14 Yesus lamm ukkannan qap illo nam settess,
"hin hed erkawsam namass inlelan;
sekkapa aanii suuka Moohaat ixakkiyyii;
ikkim siipi maanyet koddintu daayy se muuset acac oot dinayteti Mooha dehayyii."
kid.
15 hekoddu male torroot Yesus lamm heka turi qara tawoss dakaysamaatt;
orr lekenno lelaayy dakayaassenne baaqaaddu ila dinatta fadan orqudi qapamin.
16 iyyat lamm helpa min iyyeeh lak tahawa kiyyop annin dinkamannin.
Yesus nam muluhluh diniyy
(mati. 9,1-8; mar. 2,1-12)
17 lashsh shakka helpaan Yesus kollisaalle kiyyo,
farasetanne kollisampayya halitt muuset iyy kapi laiyy.
iyyaanno orr paatta kelilaatenne heka yihutaatenne sapara yerusaalem qalle dey kida.
Yesuset irrot pold,
it iyyat baaqampayyan dininniyyu qap.
18 essete orrat nam muluhluh rohan haxiyen Yesus kapop deyen;
por iyyaa man se Yesus ulla kiyyop baaqampayt settin luuminan iyy turi haayinan fadannin.
19 hekoddu male oot siipat lek maalla,
baaqampayt settin man tallop luuma amm hefottenemu.
semmaalla,
man se qarop baaqampayt settin fayyaden.
man se qareett ilin hokkiyyen,
baaqampayt sett afandan Yesus turop lekkiyyen.
20 Yesus lamm amaanteshaddu akk,
"yema,
jupposhitt all hedi ushuqant" ikkid.
21 kollisampayya halitt muusetenne farasetanno,
"hin Mooha otiyyu ayno?
Mooha shokkooh pateeshsh iyy juppot all ushuqa fottinu ayno?"
hekiden qaapaden.
22 Yesus lamm qaapaaddu ufnaad illo,
"maanaass mutsuroonn qalli hin qaapannin?'
23 kat,
'jupposhitt all hedi ushuqant' kidaanne 'sohadu aanii!
' kida ila hekann hoshilin?
24 hekoddu male,
antu,
meet nam husslah qara juppot nam alliushuqaass ikkimin hayyotum qapu ufunaadaa!"
hekid.
nam se muluhluhessenno,
"yema,
sohadu afandoott haxisadu,
manaytep kalii!"
ikkid.
25 nam settenno esseteeh siip se ileeshsh sohad afandooyy haxisad illo Mooha aypsattan manayyep kal.
26 orr ulla kiyyonno dahenn huurran,
"aww iyaan nam shamusinniyin akkin."
kidan Mooha aypisaden.
Yesus lewi se matiyoos kidamiyyu hemb
(mati. 9,9-13; mar. 2,13-17)
27 sekkannakuless Yesus ulla sohad anniyo,
qarats quurampayt lewi kidamiyyu qarats quura laiyy akk illo,
"hooyii an olle.
' ikkid.
28 iyyat illo fulli kid;
heikk all diiy iyy olle aan.
29 lewi lamm Yesus serkisaass manayyi damot kaant dikkiyy.
damot se qarassenno qarats quurampayyaanne orr pil iyyaan lek akkaad.
30 farasetanne kollisampayya tampet,
"maanaass inn qarats quurampayyaanne juppampayya olle damin ukin?"
hekiden soolleshayy qari kumulliyaden.
31 Yesus lamm sed dakaye,
"baaqampayyaass male orr dikkass amm akimishsh fadusinniyyamu;
32 antu dey,
juppampayya ikkim juppot qara mitaatinan hembaass male amm tsillampayya hembaassemu" hekid immitaattiy.
kaassiy oot dama kapa duupattat dehad
(mati. 9,14-17; mar. 2,18-22)
33 sekannakuless orr karatiddu yesusess,
"soollet yewannisenne soollet faraset helpa leke dama kapa duupannin,
dinkamannin;
soolleshitt kat maanaass lashshimin damin ukin?"
hekiden kaassaden.
34 Yesus illo sedep kid iyyaa mitaattiyy,
"helpaan haypanishsh iyyaa olle kiyyo paallet dama kapa duupatta iyyaa fadusinnin hekidin qaapannimu?
35 hekoddu male,
helpaan haypanish iyyaa kapa qeeddaminu deyina;
essete dama kapa duupanninan."
36 lamm Yesus asset kid paahnat shakk iyyaa lel.
"nam uuwaat kerdit qar erpet awshittet erpiyu amm hekiyyamu;
et eerpane lamm,
erpet awshittet kerdaytet sett allkakkaain;
erpet awshittetanno amm uuwaat kerdit qari senishshamu.
37 settep lamm nam akal kerdayt qall ukot weynet awshittet oorinniyu amm hekiyyamu;
et settep kodane lamm akal hin paqiyy,
weynet settenno alltiiqamin;
akal setteno aypotass allpatin;
38 semmaalla weynet awshittet akal awshittalli oorisama fadusinnin;
39 nam ukot weynet it palhit ukiyyu amm weynet op essete eeshiyan uka fadiyamu.
maana maalla,
'ukot weynet,
it palhit ulli olatt hedikkat' hekidin."