ekkawsama Yesus
(mati. 4,1-11; mar. 1,12-13)
4
1 yesuse laaffot miilotann innaakkood illo haq yortaanoseteeshsh mitaat.
sekkannakuless sinkuma laaffotaten lak patpatt kiyyop aan.
2 illo lashsh hund afuress taapiloosa iyy ekkayy,
helpaanette dama dama male olad illo muutayta kela tuff.
3 taapilos illo yesusi kide,
"et meet Mooha koddito,
intu daka sed ikkim dama koddinu acace."
4 Yesus lamm,
"namat amm damanneeh kallaanniyamu.
' hekidant tsaafant" hekid iooriyy.
5 ukkanna taapiloset yesusenn utet kaant qarop aan illo daamum husslah dahenn helpa qoji ilasseeeh iakkiyy.
6 taapilosenno,
"hayyotum sedenne serkayn dahenn hedessin daannina.
oot hin dahenn an daassamen maalla,
nam antu hiinu daattass fottinhina;
7 semmaalla et ani shoomatto,
hin dahenn hedessin daannina."
heikkid.
8 Yesus lamm,
"moohaayt poldaayt shoomado!
iyyeeh Mooha kodadu!
' hekidant tsaafant."
hekid immitaattiyy.
9 sekkannakuless taapilooset yesusenn yerusaalemep iolle aan,
hayna man miilot qari ellashiyy illo,
"et att meet Mooha koddito,
intu areett all ikkashe,
10 'ikkim hed qar lushinaness Moohot hitaymiyyooyy acacina,
11 iyyaa lukkoott dakan kohaytisama tura harkooddun hedi hesinan hed qapinan.
' hekidant tsaafante."
ikkid.
12 Yesus illo,
"moohaayt poldaayt ekkawsatta diiyii' hekidant tsaafant."
kid immitaattiy.
13 taapiloos Yesus ekkawsatta dahin kaysiyy kannakuless helpaass all iyy diiy taw.
Yesus huss kelilaatess kollisa hir
(mati. 4,12-17; mar. 1,14-15)
14 Yesus lamm irrot laaffot miilotatenn innaakkood illo kelilaap mitaatt.
torroshayyenno huss se ukkapeesh kiyyu qalless dahenn dakaysamaatt.
15 iyyat man dinkam ayhutab tallassenno kollinnin;
iyyaanno dahenn kollilayyin iyy aypisannin.
Yesus sapara naasreet qalless qar hittisam
(mati. 13,53-58; mar. 6,1-6)
16 sekannakuless Yesus huss se iyyat ulli kammep naasreetep aan,
qum kollinashayyet sampata ayhutaate man dinkamaaddotep kal matsaafa waarusisa ell.
17 illo matsaafa isaayaas heka himampayt iddaassam.
helpaan iyyat matsaafa se qall qahiyye por se lel sedep kidiyyu qalli tsaafam fad akk illo;
18 "laaffot Mooha an qara kishsh;
lel masmasunt hiyayya lelaass an pahisad;
orr hidamess fursama,
indamala ikkim akkinan eeshshaasenne
orr qar kalimaadenno aylum kela sohashisaass an hit;
19 settep lamm par daayy se poldat siipayyin dininniyu ikkiman ufnaytinninoss an hit."
20 sekkannakul Yesuset matsaafa sett allduh erkamampayti dayy illo lahi lai.
orr se ulla kiyyonno dahenn illisattan iyy tooyin.
21 iyyat illo,
"toare!
lel matsaafa se ammann waarusisamiyyo,
inn dakayten aww hekaysaad" iyyaa kid.
22 namat dahenn ootaayyess iyaan dikkaah ishaamin;
lel dikk iyyat ishaamiyun shammattannenno,
"hin imm yoosef inhinemu?"
kidin.
23 Yesus illo sedep iyyaa kid,
"paahnat se 'att akimishsh intu mashshayt idiniyye,
' kidishu ikkim an qari lelintaness henxup;
settep lamm,
'iyaan op qifirnaahomes erkatt kidiyyan innu dakayn dahenn are hussayt qallessenno erkayii' ani kidintan.
24 shaakketin inni kidin,
himampayt amm hussayy qalli serkisamiyamu".
25 "shaakket inni lelonu,
intu an qara dakayaa;
sapan eliyaas heka himampaytate par halpattann leha lehess oot roopat roopa diiyy maalla,
huss se qarass laaot nayq koddite,
huss israaelet qalle inkawwaan irish dap iyyaan lek kiyy.
26 hekoddu male eliyaaset inkot se irish daft huss siitona qalle paat se sarabita kidamiyyu qalle kallaanishshu shakkaah kapop hitam male,
inkot pilt kapop amm hehitamemu.
27 settep lamm helpa elsai,
himampaytate huss israaelet qalle orr lek iyyaan paylotin qapam kiyy.
hekoddu male,
niximaan nam sooriyya pateeshsh iyyaa ila shokkooh naf amm hedinademu."
28 orr ulla kiyyonno dahenn helpaan iyyaa ishaamaayy dakayenekuless ikkaanes jiiaden.
29 illo sohaden saparaaddu qalle altanhaat iyy tishen all sohashiyyen,
tekel keleetanno tuqquura all kasha faden illo utunnat se saparaaddu uqqara kiyyane kamara minop inxaanen.
30 iyyat lamm otanshaddu tallin tarp aan.
nam laaffot oshshshittet qara kishshu din
(mar. 1,21-28)
31 sekkannakuless,
Yesus saparaan haft kelila qalle kiyy qifirnaahomep aan;
ullanno sampata ayhutaate siip kollinnin.
32 oot iyyat hayyotumin kollinniyyu maalla,
dahenn kollilayyin shammaden.
33 lamm ulla man dinkam ayhuta talla nam laaffot nayqatin qapam kiyy illo nass kaanenn,
34 "pelawu!
nasretishsh,
yesusello!
maana innu olle qafta?
all innu patissaass deetemu?
ikkim att aynu kodditess antu henxup;
att miilampayt Moohaat."
kid ullup.
35 iyyat illo laaffot se nayqatess,
"rui kidii!
iyy qara sohadu!"
kid tush.
laaffot se nayqatenno nam sett siip ili lahan qaitt illo miida male qara sohatt.
36 orr se ulla kiyyonno dahenn shammattan,
"hin lel ashshann kiyyo?
hayyotumanne irrotann laaffot oshshittet acacin itanno idakayin sohannin."
he olli kikkiden.
37 torroshayyenno haft se qalli dahenn dakaysamaatt.
Yesus baaqampay lek diniyy
(mati. 8,14-17; mar. 1,29-34)
38 Yesus lamm man dinkam ayhuta talla sohad illo man simoonep aan.
ulla inkot haypaat simoon qefan paaqin ulli peatt iyaat akk;
iyyaa illo ikkim it dininninu iyy dinkamen.
39 Yesus illo it kapop dehaad kapi ell,
baaqaadd ikkim it hayinu acac;
qefaanettenno it qara tawen.
it esseteeh sohatt illo iyaan iyyaa fadusinniyy ierkasa hirt.
40 helpaan lashsh peite orrat baaqampayya baaq hawhawi kikkiyun qapamenn Yesus kapop deyen.
iyyanno shokkushokkotaddo harkayy qari qap iyyaa diniyy.
41 qayyat illo,
"att meet moohaatipa!"
kidan ullup orr lek qara sohad.
Yesus lamm oot qayyat iyyat kristoos koddaayy ufnaad maalla,
hetush,
akkan ishaama dawr.
Yesus huss kelilaate kolliyy
(mati. 4,23-25; mar. 1,35-39)
42 helpaan lashsh partekuless Yesus ulla sohad illo por hikkam kiyyop aan;
siipat illo iyy fadin;
helpaan iyyaa iyy akkenekuless,
"innu kapa reehatta all tawa diiyii" kidin iyy dawren.
43 iyyat lamm,
"antu maalla hitam,
anta illo lel masmasunt heka daamum Mooha lelass oot it koddit maalla,
sapara pilap anta an fadusinnin,"
he iyyaa kid.
44 semmaalla huss yihutaate manna dinkam dahenn tall mimmitaatan kollinnin kida.