lel Mooha se yewannis ahalisampayt lel
(mati. 3,1-12; mar. 1,1-8; yewa. 1,19-28)
3
1 Daam huss rooma hin tsipariyoos kidamiyyu daamume par hundann heniyyaate,
helpaan bentsinishsh bilaatsoos huss yihuta peashinniyyo;
herootisenno huss kelilaat peashinnin,
kafittaayy filiboosenno peashisampayt huss itsuriyaasetenne heka tsiraakontoos kodd,
liisaniyosenno peashisampayt huss appilen koddenne;
2 helpaan haannaanne qayyaafanno suuka suukamma koddene,
imm sakaariyaas yewannis lak patpatt kiyyu qalle kiyyo lel Mooha iyy kapop dey.
3 lamm yewannis huss se haq yortaanos kapaash kiyyu qall dahin mimmitaatan,
"juposhayness diissama ikkim akkannintaness juposhayn qara mitaataa illo ahalisamaa" kidan eeshshin.
4 hin sedep kodden,
qum matsaafa isaayaas heka himampayt qari oot yewannis it turaqatta,
"toare!
hin nass nam lak patpatt kiyyu qalle ass kidiyyu ullupiyyot;
'paana pold sorumaa
uushuqaayyenno pahiyaa!
5 tipawaanno dahenn ormini innaakoden pahenii!
utawaanne tarranno dahenn lahanhaat kiddenii!
paana kekkell hepahu!
paana tontolla kiyyu hesenu!
6 namanno dahenn dinila Mooha akku!
' " kidant tsaafant qarass kida.
7 orr se ahalisama iyy kapop deyiyyoss yewannis asset kidin,
"inn medda puushat!
jiiayta Mooha se deyiyyu kela ikkim passannintan aynu inni lel?
8 sedeeshsh erkamaan juppot qara mitaataayn akkinniyy erkayaa male,
'innu medda aprihaam' kidan fooja diiyyaa.
Moohot aprihaamess dakalla hin ila medda sohashshisa fottina hen inni kidin.
9 ammann qorayya qida allkashaass erkaddot kamant kelass hehaayam.
semmaalla qoyr qundaan dikk dala diinniyyu dahenn quuramina apitt ila allkashamina."
10 siipat illo,
"kat maana koda innu fadusinnin?"
hekiden yewannis kaassaden.
11 iyyat lamm sedep kid,
"nam uuwaat lakk qapu it shakk nam se uuwaat dapi dayyu,
nam dama qapu nam se dapi qootu."
12 orr se qarats quuriyonno ahalisamaass iyy kapop deyen illo,
"kollisampayt!
maana koda innu fadusinnin?"
kiden iyy kaassaden.
13 iyyat illo,
"se tampet qari haayant qara tawnisa kaassatta diiyyaa."
ikkid.
14 wotataradanno hedeyen illo,
"maana koda innu fadusinnin?"
kiden iyy kaassaden.
iyyat lamm,
"kodashshet nami ponqa qeeddatta diiyyaa,
nam eerpan kasasa diiyyaa,
heriy humunayneteeh inn kayu;"
iyyaa kid.
15 sapan sette siipat dahenn irraxatetann dexema kristoos lushattaalle kiyyan.
semmaalla oot yewannisess,
"nam hin kat kristoos koddinamu?"
kidaann mutsurooddu qalleet qaapannin kida.
16 yewannis lamm aset iyyaa kid,
"antu haqannin inn ahalinnin,
hekoddu male,
iyy ikkaaness an qara taw deyina,
amm antu suurra hopooyy naf furisaass henkiyyamu.
iyyat laaffot miilotanne apittann inn ahalinnina.
17 layta iyyat palaalle uunt ila puunnan reehinu harkayy qalle qap.
et orkela reehu kanna miiltot unkulaallep kalinnina;
puunna lamm apitt liqqa diinniyyu ilass alldoohinnina."
18 settep lamm yewannis paana hawhawi kikkiyyonn siip korsin lel masmasunt lelaalle kiyy kida.
19 yewannis lamm herootis se huss yihuta peashinniyu oot iyyat herootiyaata se haypaat kafittaayy hekat filibos qeedd maallaanne oot nayqunt pili iyyat erkayy dahenn maalla jiixiyi kida.
20 herootis lamm nayqunt qar nayqunt padawan yewannis man hidanatep kaliyy.
ahalisama Yesus
(mati. 3,13-17; mar. 1,9-11)
21 helpaan siipat dahenn ahalisam kanna yesusenno ahalisam;
helpaan iyyat Mooha dinkamiyonno moont qahisant;
22 laaffot miilotanno elelaap kinnaatt iyy qari lekkatt;
esseteeh nass,
"meetaaw antu hoxsaanniyyu,
hede;
antu hedennin masmasin."
kidiyyu moontalleett dey.
hittin dalashot Yesus
(mati. 1,1-17)
23 helpaan Yesus erkama kollilayya hiriyo paraayyat hund halpattap kiyyu kida.
siipat Yesus imm yoosef kiden;
yoosef imm eeli,
24 eeli imm maati,
maati imm lewi,
lewi imm miiliki,
miiliki imm yoona,
yoona imm yoosef,
25 yoosef imm maataatiyu,
maataatiyu imm amots,
amots imm naahom,
naahom imm eslim,
eslim imm naakk,
26 naakk imm maaxat,
maaxat imm maataatiyu,
maataatiyu imm semey,
semey imm yoosef,
yoosef imm yoot,
27 yoot imm yonaan,
yonaan imm rees,
rees imm sarupaapel,
sarupapel imm salaatiyal,
salaatiyal imm neer,
28 neer imm miiliki,
miiliki imm haad,
haad imm qosaam,
qosaam imm elimotaam,
elimotaam imm eer,
29 eer imm yosei,
yosei imm eliesaari,
eliesaari imm yoraam,
yoraam imm maatsaat,
maatsaat imm lewi,
30 lewi imm simoon,
simoon imm yihuta,
yihuta imm yoosef,
yoosef imm yonaan,
yonaan imm eliyaaqim,
31 eliyaaqim imm meeliy,
meeliy imm maayinaan,
maayinaan imm maatsaat,
maatsaat imm naataan,
naataan imm taawit,
32 taawit imm issey,
issey imm iyopet,
iyopet imm poesi,
poes imm salimon,
salimon imm naxason,
33 naxason imm aminaataap,
aminaataap imm raami,
raami imm arin,
arin imm hetsiron,
hetsiron imm faares,
faares imm yihut,
yihut imm yayqoop,
34 yayqoop imm isaaq,
isaaq imm aprihaam,
apirihaam imm taara,
taara imm naakorr,
35 naakor imm saruk,
saruk imm reu,
reu imm falek,
falek imm eper,
eper imm shelaah,
36 shelaah imm qaayinan,
qaayinan imm arfakisat,
arfakisat imm seem,
seem imm noh,
noh imm laameh,
37 laameh imm maatusaala,
maatusaala imm henok,
henok imm yaaret,
yaaret imm melaaliell,
melaaliell imm qaayinaan,
38 qaayinaan imm henos,
henos imm seti,
seti imm attaamm,
attaam imm Moohaat hekidin kida.