toxt ila sohatta Yesus
(mati. 28,1-10; mar. 16,1-8; yewa. 20,1-10)
24
1 iskatt settenno aww lashsh hirayta tappaate (uhute) etikel tuqqan shittot iyyaa dikkisaden qapaden poosaayy qarop aanen.
2 daka poosaan kapi duhammenno all kapa kattam iyyaa akken.
3 helpaan iyyaa poosaan tallop luumene lamm dakint Yesus amm heakkenemu.
4 iyyaa sed shammattaalle kiyyane,
nam lakk iyyaan uuwaat atat haahisa haahinnishshu uuwad iyyaa kendda ulli ell.
5 iskatt settenno nahaman lahaat lak tooyanniyyane,
orr hin sedep iyyaa kiden,
"iyy kiyyatin kiyyu maanaass otant orr raaw ila fadin?
6 iyyat amm are hekiyyamu;
hesohad;
helpaan iyyat kelila kiyyo,
se iyyat inn lel immashsh oorsadaa;
7 'meet nam juppampayya tarpisama daassama masqalet qari rahhaman toya;
lashsh halpattiyyaate toxtalle sohatta iyy fadusinnin' he iyyaa kid.
8 iskatt settenno lel Yesus immashsh oorsaden;
9 illo por poosaateeshsh mitaaten,
hin dahenn soollet hundann shokkonne orr pilassenno dahinn lelen.
10 iyyaan orr hitaymat sed lel,
maariyaam se mekitelishshet kidamishshonne yohananne inkot yayqoop maariyaamenne iskatt pilanno kiyyan.
11 orr ishaamaaddu dakay,
oot ishaamaaddu yepelap iyyaa kinnaaden maalla,
amm iyyaa kap hedakayenemu.
12 hekoddu male betsiroos por poosanettetep feel;
helpaan iyyat ulla pae lahaat kidd tooye,
uuwaat se qahna dakint Yesus insiranteeh akk;
hin koddin shammattan tallop mitaat.
Yesus soollet lakkess akkaad
(mar. 16,12-13)
13 awusette soollet Yesus ila nam lakk saparaan emahus kidamiyy yerusaalem ketteeshsh waaddot kilometret hundann shakkin sekap annin;
14 iyyaanno oot hin koddet dahenn ollin ishaamin.
15 helpaan iyyaa ollin ishaamanniyyane Yesus mashshayyess iyyaa kapop dehaad illo iyyaa olle anta hir.
16 hekoddu male inddooddun iyy akkitete,
aynu koddaayy amm ishshaaka hefottenemu.
17 iyyat illo,
"maaniyyaa hin inn antona qara kinnaattete sedep ollin ishaamannishshan?"
iyyaa kid.
iyyaa lamm dappetann ulli ellen.
18 iyyaa ila iyy hin shokku qelob kidamiyyu,
"tappayn qalle hin yerusaalem qalli erkawsam ufunaattaass att hayittemu?"
iikkid.
19 Yesus illo "maaniyya?"
iyyaa kid.
iyyaa lamm sedep kiden immitaattiyyen,
" hin Yesus nasreetishsh qari erkawusam inhinemu!
iyyat himampayt,
moohanne nam heikk turi lelanne erkaman qim kida.
20 kaadayya suukammaatenne sinkiyyaanno toxtass iyy tarpiyyen dayyen illo rahhen.
21 innu 'iiy israaelet dininnina' henkidin irrayin makess.
hekoddu male hin kaysadeneeshsh toare aww lashsh halpattiyya kida.
22 lamm iskatt innu olle kiyy innu shammusiyyen.
iyyaa aww etikel poosaayy qarop aanen;
23 hekoddu male dakinshayy amm heakkenemu.
hitaymiyya Mooha iyyaan,
'kiyyatann kiyy!
' kidiyy raaetin akkaaddu mitaaten innu lelen.
24 innu ilanno orr shokku por poosaayyatep aanen qum se iskatt hin lelenep akken;
hekoddu male amm Yesus heakkenemu."
ikkiden.
25 Yesus illo sedep iyyaa kid,
"inn iyaan immashsh oorsatta diinniyyane iyyaan himampayya lelenenno dahenn amaanaass mutsuronn shikaarsaden!
26 kristoos rakkot sed dahenn qeeddataanne serkooyy qallep kala iyy fadusinnishshomu?"
27 sekannakuless matsaafadda muusenne heka himampayyateeshsh hiran hin ootaayy lelam dahenn iyyaa lelelan kolliyy.
28 helpaan iyyaa paat se iyyaa ullop anniyyane paisa dehaadene,
Yesus afa nam tarpyu anniyyop iyyaa turi ikodd.
29 iyyaa lamm,
"heponnaatti,
lashshanno peishsha,
ari innu kapi peadu" hekiden qimiyyen dinkamen;
iyyat illo sed minann iyyaa kapi peatta tallop kal.
30 iyyaa ollenno dama lai;
laaqqot qeedd aypila Mooha dehayy qall mooss illo iyyaa daatta hir.
31 helpaanette indaaddu qahisamen illo iyyaa Yesus kodaayy ishshaaken.
iyyat lamm esseteeh turi teek.
32 iyyaa illo olli kidene,
"helpaan innu paanaalle kinno,
iyyat innu leliyyu,
matsaafa miilotanno innu ufunaytinniyyu innu kollinniyyo,
mutsura innu qalle fahh kidinpa!"
kiden;
33 esseteeh sohaden yerusaalemep mitaaten aanen.
ullanno soollet hundan shakk settenne orr se iyyaa ollin kiyyan olle iyyaa orqudi qapamene akken.
34 iyyaa essete,
" Yesus poldat shaakketass toxt ila sohad!
simoonessenno akkaad!"
heolli kikkidin.
35 soollet lak settenno,
iyyaan helpaan iyyaa paanaalle kiyyane koddenne helpaan Yesus poldat laaqqot moosse,
ashshann ikkim iyyaa iyy ishshaaken iyyaa torren.
Yesus soolleshayyess akkaad
(mati. 28,16-20; mar. 16,14-18; yewa. 20,19-23; erka. 1,6-8)
36 helpaan iyyaa sed ishaamaalle kiyyane,
Yesus otantaddu qalless ell illo,
"andot inni kodditu!"
iyyaa kid.
37 iyyaa lamm afa kaattayy akkenep iyyaa kinnaatt illo iyyaa nahen huurran innaakooden.
38 Yesus lamm asset iyyaa kid,
"maana maalla nahin,
maanaass mutsuronn qallinhaat shututin?
39 harkaawonne lukkaawu tooyaa illo antu mashshaw Yesus koddaawu ufunaadaa;
qappattannenno an tooyaa,
qum inn an akkishshanep kaattot amm sohaanne laft heqapamu."
40 sedepanno kid illo harkooyyanne lukkooyy iyyaa akkiyy;
41 oot iyyaanno masmasuntanne yeeshutta qara kiyyan maalla,
sanu amm heamaanenemu.
Yesus lamm "akkan op damiyyan heqqaftanemu?"
hekid iyyaa kaassad.
42 iyyaanno qurtsummet waatant jawshadd iyyi dayyen;
43 iyyat qeeddad illo iyyaa ilaashsh dam.
44 Yesus lamm,
"helpaan antu inn olle kiyyo halitt muusenne matsaafa himampayyaatenne heka laalet qalle hin ootaawu tsaafant dahenn kaysaatta fadusinnin antu kid inni lel,
hiniyya" he iyyaa kid.
45 essete matsaafa miilot ishaaka ikkim fottinaness qaapaddu iyyaa qahiyy.
46 assetenno iyyaa kid,
"kristoos ikkim rakkot qeeddanninu illo lashsh halpattiyaate toxt ila sohanninu turaqattaass tsaafant;
47 settep lamm mahhayyen juppot qara mitaatanne diissama juppot yerusaaleme hiraman siipass huss hussall dahenn ikkim lelaminu helelant.
48 innanno hin dahenness maanyet.
49 toare!
antu irraxatet se appaawu inn dayyin inn hitina;
innanno moontalle irrot hak akkannintaness sapara yerusaalem qall oladaa."
Yesus moontallep qeeddam
(mar. 16,19-20; erka. 1,9-11)
50 lamm Yesus soolleshayy yerusaaleme sohashshiyy illo hak pitaaniyaat inxaan;
ullassenno harkoyya qari qap iyyaa qor.
51 helpaan iyyat iyyaa qora qara kiyyo iyyaa kapa reehhad illo moontallel sohad.
52 iyyaanno iyyass shoomaden illo masmasunt kaantin yerusaalemep mitaaten.
53 moohaddossenno aypila daattan lashsh min man miilotate amm hereehadenemu.