paahnat hotta seysam
(mati. 13,10-17; Luqaa. 8,4-8)
4
1 helpa pila lamm,
Yesus pakatet kapass kollisa hir.
oot siip lek iyy kapop dey maalla,
konkaallep fayyad laiyy.
siipanno dahenn pakatet se kapeesh kiyyan.
2 iyyat illo paahnatin iyaan lek iyyaa kolliyy,
3 helpaan iyyat iyyaa kollinniyyo sedep iyyaa kid,
"toare peehampayt shokku hotta seisa sohad.
4 helpaan iyyat seinno hotta karatiy paana kapeesh pei illo hampira deyen damen.
5 hotta karatiy lamm onk hussat iqoji qarass pei;
oot iyyat huss merd kodda diyy maalla hottotin esseteeh deeh;
6 hekoddu male helpaan otot hirantte heruq illo oot iyat hittinna dap maalla kok.
7 hotta karatiy lamm otant huushsha quddet ilass pei,
huushsha quddet settetenno sakkattaan qarass kaanen illo sakkattaan nyiren;
iyat illo amm qunda hekodadmemu.
8 hotta karatiy lamm ul somm qalless pei,
deeh illo kaan,
qunda kodad.
karatiy hund halpatt,
karatiy hund leh,
karatiy lamm tseet kodad."
9 ukkannass lamm Yesus,
"nam lappa dakayiy qapu hedakayu!"
hekid.
Yesus maalla pahanaatin lel
(mati. 13,10-17; Luqaa. 8,9-10)
10 helpaan Yesus iyeeh kodde,
soolleshayy hundann lakkenne orr se iyy kapa kiyyu oot furila paahnat settet kaassaden.
11 iyyat illo sedep iyyaa kid,
" heka daamum Mooha hin dekam ufunaattot innass hedaassam,
orr pilass lamm akkanat dahenn pahanatann iyyaa lelamin.
12 maana maalla,
qum se it,
'ikkim iyyaa por moohaatep inmitaatin,
juppooshiddu all iyyaass indiisaminess,
heakkitete ikkim iyyaa inxilissanniness,
hedakaytete ikkim iyyaa qall inqaapanniness' kidantess kida."
furila pahanaat hottat
(mati. 13,18-23; Luqaa. 8,11-15)
13 Yesus lamm sedep iyyaa kid,
"innassenno paahnat hin amm kalishamu kidaamu?
illo kat paahnat pilt dahenn ashshannass ishaaka fottintan?
14 hotta seysampayt seyinniyyu lel Moohaat kida.
15 hotta hin paana kapi pei iyyat akkinniyyu,
orr se lel iyyaa dakayen seetsanat esseteeh deyyin illo lel Mooha se mutsuraaddu qall seysam iyy qalle qeeddanniyyu kida.
16 settep lamm hotta onk qari pei akkinniyyu orr se helpaan iyyaa lel Mooha dakayiyane masmasuntin qeeddanniyyu kida.
17 hekoddu male,
oot lel hin mutsuraaddu qall hittin torpatta diiy maalla helpaasseeh qeedannin;
lamm helpaan miidammaanne rakkot oot lel Mooha maalla qari paiyane esseteeh sunkin.
18 hotta hin quddet ili pei lamm akkinniyyu,
orr se lel Mooha dakayiyyu kida.
19 hekoddu male,
qaap husslahatenne,
hoxsunt shorokumatenne,
hadat hepilt se heriy daft mutsuraaddu qallep kalan,
lel Mooha se iyyaa dakayen nyiirin illo iyyaa qunda male hatin.
20 hotta hin ul somm qalli pei lamm akkinniyyu,
orr lel Mooha dakayiyyu qalli qaapattan qeeddanniyyu kida.
settenno shokku qunda hund halpatt,
shokku hund leh,
shokku lamm tseet kodad.
ispot opawiyyu attumat daataass kida
(8,16-18)
21 ukkannass lamm Yesus sedep iyyaa kid,
"et namat ispa qapusiyyo,
qunna uqqari qupaappinniy shoke siret keli haayyiyamu?
por attumat apitt sett akkaannintu qarass inhinemu,
iyyat hayyanniyu?
22 settep lamm iyyaan qar shushuqisam qar pulamaddu,
hin all dekam ufnaytisamaaddu amm hatinanemu.
23 nam lappa dakayiy qapu hedakayu."
24 ukkannass lamm sedep iyyaa kid,
"hin inn dakayishan qallixishaakaa.
hin inn inhurtenenn inni huraminta;
qarassenno inn padawaminta.
25 semalla se qaposs qarass iddaassaminta,
se dap qara lamm se iyyat qapu nefenno qara qeeddaminta."
paahnat hotta kaammiyyu
(mati. 13,31-34; Luqaa. 13,18-19)
26 ukkannass lamm Yesus sedep kid,
"daamum Mooha nam ulalle hotta seinniyu paahnaannin.
27 nam hin awwadda peanniy,
kallaap lamm hayiy,
ikkim hottotin ashshann kodd ufnaatta malenno hottotini dehin illo kaamin.
28 hussanno mashshayyess turiqattaass sakkatta,
ukkanna lamm fiit akkinnin,
fiit se ilass lamm qunda kodin.
29 helpaan uunt pallito,
oot it mooqet koddishu maalla,
appa ul esseteeh paaja dikkisannin."
paahnat qunda hakala
(mati. 13,31-34; Luqaa. 13,18-19)
30 Yesus sedep kid,
"daamum Mooha maana ollen qapinna?
shokkenne paahnat maanaatennin lelinna?
31 qunda hakalaatep kinnannin,
help qundaan seisamene qunda husslah qara kiyy dahenn ila heqoji kida.
32 et seiyan kanna lamm,
dihot heikk qara tawnaannin,
kaanin haarraanno sohashisannin,
hampiraanno manaddu uqqari dihannin."
33 Yesus paana siipat ishaaka fottinnu qarass pahanatada hinep kikkiyy lekin lelaayy iyy lell.
34 paahnat male amm hekolliyemu.
helpaan iyyaa iyyaaha koddene lamm akkan heiket soolleshayyi furinnin.
Yesus kota pakatetat rui kidusiyy
(mati. 8,23-27; Luqaa. 8,22-25)
35 awsette uldat Yesus soolleshayyess,
"pakatet patop tarpinaa!"
ikkid.
36 iyyaa illo siip kapa reehaden,
konka se iyyat qalli laiyy qallep fayyaden illo Yesus olle aanen;
konkada pilanno olle kiyyan.
37 essete kota kaan sohad illo hak haqat konka se innaakinu kaahatta pakatet sett konka se tuqquura hir.
38 helpaanette Yesus konka se qalle dase patalles dinaxasad pead;
soolleshayy illo iyy hayiyen seep ikkiden,
"kollisampayt,
innu patin att ulla rui kidimu?"
39 iyyat illo hay hayya se tush,
pakatet settess,
"rui kidii!
seseya diiyii!"
kid.
hayya settenno esseteeh rui kid.
rui kida kaanenno kodd.
40 Yesus illo,
"maanaass sedep nahin?
ashshannass amaantet daften?"
iyyaa kid.
41 iyyaa lamm ikkaaness nahen,
"hin haayyaanne pakatet naf iyy kap dakayiyyan kat ayno?"
olli kikkiden.