nam harkaayy muluhluh
(mati. 12,9-14; Luqaa. 6,6-11)
3
1 helpa pila lamm Yesus man dinkam ayhutaatep kal.
ullanno nam harkaayy muluhluh kiyy.
2 orr shokku Yesus kasasa fadan,
"into aww lashsh sampataate iyyat iyy dinisaayyin tooyinaa."
kiden illo lushataalle kiyyan.
3 Yesus illo nam se harkaayy muluhluhess,
"hooyiii are otantalil ellii!"
kid.
4 sekanna lamm sedep iyyaa kid,
"lashsh sampata qarass hin daassam kat iyaan dikk erkasaamu iyaan nayq?
nafset dinisaamu shoke ikasa?"
iyyaa illo rui kiden.
5 Yesus lamm oot shikkamot mutsuraaddu maalla hedappiy illo orr se iyy kapa kiyyu inda miiratin tooy illo nam settess "harkayt qall pahiyyii!"
ikkid.
iyyat harkayy qall pahiyy,
harkatiyy illo dinad.
6 esseteeh faraset ulla sohadene ashshann ikkim iyyaa Yesus ikanninan orr herootis olle suladen.
siip lek Yesus kapi orqud qapam
7-8 Yesus soolleshayy olle pakatet kelila kapop aan.
helpaan orr lek,
iyaan iyyat erkanniyyu dahenn dakayene iyy kannass sohaden.
orr settenno iyyaan huss kelilaateeshshanne huss yihutaateeshshanne yerusaalemeeshshanne huss etoomiyaateeshshanne huss se haq yortaanos patin kiyyooshshanne,
lamm sapara tsiroosetenne sapara sitoona kapeesh dey kida.
9 lekussa siip minan ikkim orrat iyy induukkin tura,
ikkim konka iyy dikkinninan illo idehanninaness soolleshayy acac.
10 orr lek baaqaddu ila oot iyyat diniyy maalla,
orr baaqin rakkanniyyu dahenn harkaddun iyy qappatta orr tuttuquurin kida.
11 orr laaffot nayqatin qapam helpaan iyyaa akkane kules iyy turass sunkin,
"att meet Moohaat!"
kidin ullupin kida.
12 iyyat lamm aynu koddaayy ikkim laaffot nayq inxufnaytinnin tura qimiy tush.
Yesus orr hitaym hundann lakk pahisad
(mati. 10,1-4; Luqaa. 6,12-16)
13 helpaan Yesus utet qarop fayyade,
orr se iyyat fadiyyu iyy kapop hemb,
iyyaanno iyy kapop deyen.
14 iyy olle ikkim kinnaanninan,
iyyat kollilaasenno hitinoss,
nam hundann lakki pahiyy illo "orr hitaym" kid mahh ikkod.
15 qayyanno sohashisass hayatumanno iyyaa dayy.
16 orr hitaym hundann lakk hin pahisamenno hin iyyaa:
simoon se iyyat betsiroos kid mahh qara kod,
17 meedda septsewos yayqoopenne yewannis,
hin iyyat poanerkes shokkenne meedda qaqawa kid mahh qara kod,
18 intriyaas,
filiboos,
partolomoos,
matiyoos,
tomaas,
yayqoop meet ilfiyoos,
tatiyoos,
simoon se hussayy maalla sootiyyu,
19 yihuta asqorutishsh se Yesus toxt tarpiyy dayyenno kida.
yesusenne pelsepuli
(mati. 12,22-32; Luqaa. 11,14-23; 12,10)
20 sekanna kuless Yesus man tallop kall.
yesusenne soolleshayy helpa iyyaa dama ullin daminan naf hak iyyaa dapnanessenno orr lek ammannenno orqud qapam.
21 oot kafaayy "Yesus heyaar" kidamaayy dakayen maalla,
iyy qapass deyen.
22 kollisampayya halitt muus iyyaan yerusaalemeett deyy,
"pielsepul iyy qara kiyy,
pielsepul,
sheela qayyatenn qayy sohashshinnin" hekiden..
23 Yesus lamm iissep iyyaa hemb illo paahnatin iyyaa kide,
"seetsanata ashshann seetsan sohashisa fottin?
24 daamum shokku et olli paaqqiyyo,
daamum hin amm qima ella fottinamu.
25 settep lamm orr man shokkooh et orriqootiyane,
amm qima kallaatta fottinanemu.
26 semmaalla daamum seetsan et olli paaqqo,
patina male amm qima ella fottinamu.
27 "nam shokku turaqatta irrampayt qapa allhida male man irrampaytatep kala mehaddaayy ponqa amm fottiyyamu.
28 shaakketin inni lelin,
juppot namat erkanniyyonne otitta namat otamanniyu dahenn all iyy diissaminan.
29 hekoddu male,
nam laaffot miilot qari otitta lel dahenn qarass kuur juppot parparat ikkoddinta male,
amm all iyy diissamintamu.
30 Yesus maalla hin ishaam oot iyyaa,
"laaffot oshshittet iyy qara kiyy" kiden maalla kida.
inkot yesusenne kafayy
(mati. 12,46-50; Luqaa. 8,19-21)
31 inkot yesusenne insharaddaayy Yesus kapop deyen illo alt ellen,
nam iyy kapop hiten illo altop iyy hembusiyen.
32 orr iyy kap laddiy lamm,
"toare,
inkoshaytenne insharaddaattanne alawtaaddaatt altass ellen,
hed fadin."
hekiden iyyi lelen
33 iyyat illo "inkoshiyyu ayno?
insharaddaawonno orrame?"
kid mitaattiy iyyaa kaassad.
34 por orr se iyy kapeesh laddeteesh tooyan,
"toare inkoshawonne insharaddaawu.
35 nam has Mooha kaysinniyyu dahenn,
iyy insharaawonne,
alawshawonne inkoshawu."
kid.