Yesus nam muluhluh diniy
(mati. 9,1-8; Luqaa. 5,17-26)
2
1 lashsh qoj kanna Yesus qifirnaahomep mitaat dey illo ulla man talla kiyyaattaay dakkaysamaad.
2 hak altat nafenno iyyaa qojinitoss orr lek orqudiqapamen illo Yesus lel Mooha iyyaa lel.
3 helpaanette nam afur nam muluhluh haxiyen iyy kapop indeyen.
4 oot siipat lek iyyaa nam sett Yesus kapop dehasa pushmaaden maalla,
oroot man settet por se Yesus kiyyon hokkiyen illo erreett nam sett afandooyyin lekkashshiyen.
5 Yesus lamm amaanteshaddu akk illo nam se muluhluh kide,
"meetaawo,
jupposhitt all hed ushuqant."
6 essete kollisampayya halitt muus ila shakkan ullass laen illo,
mutsurooddu qalless,
7 "nam hin maanaass sedep Mooha otin?
Mooha shokkooh pateeshsh iyy juppot all ushuqa fottinu ayno?"
kiden qaapaden.
8 Yesus lamm esseteeh qaapaaddu ufunaad illo,
"maanaass mutsuroonn qalli hin qaapannin?"
iyyaa kid.
9 nam muluhluhess,
'jupposhitt all hedi ushuqant' kidaanne 'sohadu afandoot haisadu illo aanii' kida ila hekann hoshilin?
10 hekoddu male,
antu meet nam husslah qara juppot nam all ushuqaass ikkimin hayyotum qapu ufunaadaa."
hekid illo nam se muluhluhess,
11 "sohadu,
afandoott haxisadu illo manaytep kalii" ikid.
12 nam settenno esseteeh erroop ell,
afandooyy haxisad illo orr se ileeshsh sohad.
semmaalla orrat dahenn shammaden,
"akkan sedep kiyyu amm apure henxakkinemu!"
kidan Mooha aypisaden.
Yesus lewi hemb
(mati. 9,9-13; Luqaa. 5,27-32)
13 Yesus lakkiyyaass pakatet kelila kapop aan.
siipanno dahenn iyy kapop deyen,
iyyat illo iyyaa kolliyy.
14 helpaan iyyat ullin tarpiyyo,
meet ilfiyoos lewi kidamiyyu por qarats quuraat laiyy iyyat akk illo,
"hooyii an olle!"
ikkid.
iyyat illo sohad iyy olle aan.
15 sekkanna kuless Yesus man lewe dama qara kiyyo,
oot orr lek iyy kanni anniyyan maalla,
iyyaa ila qarats quurampayyaanne juppampayya lek yesusenne soolleshayy olle dama damen.
16 farasetanne kollisampayyaa halitt muus Yesus qarats quurampayyaanne juppampayya olle damiyo akken illo,
"maanaass qarats quurampayyaanne iyyaan tampet lushatta diinniy olle damin ukkin?"
kiden soolleshayy kaassaden.
17 Yesus lamm sed dakay illo,
"baaqampayyass male orr dikkass amm akimishsh fadusinniyyamu.
antu dey,
juppampayya ikkim juppot qara mitaatinan hembaass male amm tsillampayya hembaassemu" iyyaa kid.
kaassiy oot dama kapa duupattat dehaad
(mati. 9,14-17; Luqaa. 5,33-39)
18 soollet yewannisenne faraset dama kapa duupannin.
semmaalla orr karatiddu Yesus kapop deyen illo "soollet yewannisenne soollet faraset dama kapa duupannin,
soolleshitt kat maanaass dama kapa duupatta diinnin?"
ikkiden.
19 Yesus illo sedep iyyaa kid,
"haypanish iyyaa olle kiyyo,
paallet dama kapa duupattot iyyaa fadusinniyyamu?
iyyokku,
helpaan haypanish iyyaa olle kiyyo,
dama kapa duupatta amm iyyaa fadusinniyyamu".
20 hekoddu male helpaan haypanish iyyaa kapa qeeddaminu deyina.
helpanette iyyaanno dama kapa duupanninan.
21 nam uuwaat kerdit qari erpet awshittet erpiyu amm hekiyamu.
et erpane lamm,
erpet awshittet uuwaat kerdaytet sett all kakkaain,
illo kaaxamunt settenno heka tureesh qara tawnaannin.
22 settep lamm nam akal kerdayt qalli weynet awshittet oorinniyu amm hekiyamu;
et settep kodane lamm akal hin paqiy,
woynet settenno alltiiqamin;
akal setteno aypotass allpatin;
semmaalla weynet awshitt akal awshittalli oorisama fadusinnin."
kaassiy oot sampatat dehaad
(mati. 12,1-8; Luqaa. 6,1-5)
23 lashsh sampata ayhutate Yesus ul kaappa qallenn tarpaalle kiyy.
helpaanette soolleshiyy shiyya kaappa mitatta hiren.
24 faraset illo,
"tooyii!
maanaass soolleshitt iyaan lashsh sampata qar erkawusama daassama diiy erkannin?"
ikiden.
25 Yesus lamm sedep kid iyyaa mitaattiy,
" helpaan taawitetenne orr se iyy olle kiyyu tuffen rakkadene,
ikkim iyyat maana kod inn inwaarusinnemu?
26 sapan se apiyataar suuka suukamma man Mooha kodde,
iyyat man moohaatep kal illo laaqqoot daayy se suukamma pateeshsh orr pili daassama diitt dam,
orr se iyy olle kiyyossenno day.
27 lamm seepanno iyyaa kid,
"sampatot nami erkawsam male,
amm namat sampata maalla heuumamemu.
28 semmaalla meet nam,
sampatassenno pold."