lel masmasunt
se marqoos tsaaf
eeshshanta yewannis heka ahalisampaytat
(mati. 3,1-12; Luqaa. 3,1-18; yewa. 1,19-28)
1
1 hin hirayta lel masmasunt heka meet Moohaa heka Yesus kristoos kida.
2 sedenno isaayaas himampaytenn
"toare hitaymishshaawu se paanayt uushuqinun
hed turi qattinnina hitina."
3 sedenno qum it nass,
"paana pold soorumaa,
uushuqaayyenno pahiyaa' kidiyyu
lak patpatt kiyyu qalle ullupiyu"
kidant tsaafant mittass kida.
4 semmaalla yewannis ahalisampayt,
"allhattot juppot ikkim akkannintaness juppot qara mitaataa illo ahalisamaa!"
kidaann lak patpatt kiyyu qalle eeshshantan dey.
5 orr huss yihutaatenne orr sapara yerusaalem qalle kallaanniyyu dahenn iyy kapop deyen illo juppotaddu puutsiyattan yewannis harki haq yortaanosin ahalisamin kida.
6 yewanniset uuwaat rifant kaal ila soorumant uuwannin;
surrayy qalleeshanno sheep hidannin;
damaayyanno torrayyaanne taammat kida.
7 iyyat sedep kidin,
"iyy ikkaan an qara tawu,
antu lahaat kidda surra hopooyya naf furisa kaya diininu deyina,
8 antu haqannin inn ahalinnin,
iyyat lamm laaffot miilotann inn ahalinnina."
ahalisamanne ekkawsama Yesus
(mati. 3,13-17; 4,1-11; Luqaa. 3,21-22; 4,1-13)
9 helpaanette yesuus sapara nasreet hin huss kelila qalle kiyaashsh dey illo yewannis haq yortaanos ili iyy ahaliyy.
10 yewannis,
Yesus haq ila sohatta olle esseteeh moont qahisamishu,
laaffot miilotanno elela pahanaattan iyy qari lekkannishsho akk.
11 helpanette nass moontalleett dey illo kide,
"meetaaw antu hoxsaanniyyu,
hede;
antu hedennin masmasin."
12 esseteeh laaffot miilot ikkim lak patpatt kiyyop anninu turqeeddit.
13 illo seetsanat lashsh hund afur iyy ekkawsad.
iyyat pinaana ilassenno olad,
hitaymiyya moohaatenno iyy hitamen.
yesuus qurtsummet olampayya afur hemb
(mati. 4,12-22; Luqaa. 4,14-15)
14 yewannis man hidanatep kale yesuus lel Mooha heka masmasunt leltete kelilaap aan.
15 illo "helpa hexushen,
daamum Mooha hedehaad,
juppot qara mitaataa,
lel masmasunt amaanaa!"
kidin.
16 Yesus pakatet kelila kapin tarpiyyo,
simoonenne insharaayy intriyaas,
oot iyyaa qurtsummet olampayya kodden maalla,
urkupa pakatet qara qaasiyane akk.
17 illo,
"an kanni hooyaa,
qum inn qurtsummet olishshanep ikkim orr an hembintanessin inn kodina!"
iyyaa kid.
18 iyyaa illo esseteeh urkupooddu alldiiyen illo iyy kanni sohaden.
19 sekkanna jawuhayyess antaap kodd illo orr pil medda saptiyoos ankasanne inshar,
iyyaan yayqoopenne yewannis kidamiy konkaalle urkupooddu il sussukanniyane akk.
20 esseteeh iyyaa hemb;
iyyaa illo appaaddu saptewos erkamampayya olle konkaall alldiiyen Yesus kanni sohaden.
nam laaffot nayq qara kishshu din
(Luqaa. 4,31-37)
21 iyyaa sapara qifirnaahometin paene,
essseteeh sampata ayhutaate yesuus man dinkam tallop kal illo kollisa hir.
22 orr dakay dahenn kollilayyan shammaden.
iyyaa shammaden,
oot iyyat kollisampayya halittatep kodda male hayyotap kollinniyyu maalla kida.
23 man dinkam settete nam laaffot nayqatin qapam ulla kiyy illo,
24 "nasretishsh,
yesusello!
maana innu olle qafta?
all innu patissaass deetemu?
ikkim att aynu kodditess antu henxup;
att miilampayt Moohaat."
kid ullup.
25 iyyat illo laaffot se nayqatess,
"rui kidii!
iyy qara sohadu!"
kid tush.
26 laaffot se nayqatenno nam sett lah kashsh tsitsirosit illo nass kaanin ullupan qara sohatt.
27 orr se ulla kiyyonno dahenn shammattan,
"hin maaniya?
hin kollila awshiyyaa ashshan kiyya?
laaffot se nayqat hayyotuman acacin,
itanno iyy acacamin."
hekiden mashshmashshaddu orr kakkaassaden.
28 esseteeh torroot Yesus por hehikkete huss kelila kapeesh dakaysamaatt.
Yesus baaqolayya lek diniy
(mati. 8,14-17; Luqaa. 4,38-41)
29 esseteeh Yesus man dinkam ayhuta talla sohad illo yayqoopenne yewannis olle man simoonenne heka intriyaasep aan.
30 ulla inkot haypaat simoonet qefan paaqin ulli peat iyaat akk;
iyyaa lamm baaqaadd iyy lelen.
31 yesuus illo it kapop dehaad harkaadd qap errop ellashshiy,
qefaanettenno esseteeh it qara tawen,
it illo sohatt iyaan iyyaa fadusinniy ierkasa hirt.
32 helpaan lashsh peit,
ponnaatte orrat,
baaqampayaanne orr qayyin qapamen dahenn Yesus kapop deyen.
33 orr saparaanettetenno dahenn altatalles orqudiqapamen kida.
34 Yesus orr lek baaq hawhaw kiyyun rakkanniy diniy,
qayy lekenno sohashiy.
Yesus lamm oot qayyat iyyat aynu koddaayy upo maalla,
hetush akkan ishaama dawr.
Yesus huss kelilaate kolliy
(Luqaa. 4,42-44)
35 parashot kela Yesus awwaddatann sohad,
por hikkam kiyyop aan illo ulli dinkamad.
36 simoonenne hin iyy olle kiyy,
iyy kann fada aanen.
37 helpa iyyaa iyy akkene,
"orrat dahenn hed fadin ukkuli!"
he ikkiden.
38 Yesus illo,
"antu dey,
kollisaass oot it koddit maalla,
ikkimin kollinninoss paatta pil iyyaan ar kapeesh dehap annu."
iyyaa kid.
39 semmaalla man dinkamaaddu talla kollittete qayyada sohashshittete,
huss kelila qall dahenn mimmitaata hir.
Yesus nam shokku paylotin paaqiyyu diniy
(mati. 8,1-4; Luqaa. 5,12-17)
40 nam shokku paylotinb baaqiyyu Yesus kapop dey lukkaayy keli kilpiyad illo,
"et hinnaatto an dinisa fottihhinta."
kid dinkamad.
41 Yesus illo idappiy,
harkayyin iyy qappad,
"henhinnaade,
dinii."
ikkid.
42 iyyat illo esseteeh paylot se ila dinad.
43 Yesus lamm sedep kid iyy kokkiyy hayyad,
44 "hin hed erkawsam namass illelani.
sekkapa aanii suuka Moohaat iakkiyyii.
ikkim siip maanyet koddintu daayy se muuset acac oot dinaytet Mooha dehayyii."
45 hekoddu male,
helpaan nam hin ulla sohade,
hin koddam nam heikketess ishaama hir.
seminan Yesus saparallep hasayy kala amm hefottemu.
semmaalla sapara patann por namat ulla teeke kallaatta hir.
orrat lamm por heiketeeshsh iyy kapop deyyin.