Yesus nam laaffot oshshittet qara kishshu diniyy
(mati. 8,28-34; Luqaa. 8,26-39)
5
1 pakatet kelila qara konkan tarpen illo huss kerkesenonin paiyen.
2 Yesus konkaallett lekkade,
nam laaffot oshshittetin qapam esseteeh poosa qara sohad iyy mina paiyy.
3 nam settenno poosa qara kallaannin illo amm aynonno sansala nafenn iyy hida olashisa fottiyyamu.
4 helpaan leka sansala harkatenne silf lukkaatenn hidamin,
hekoddu male sansala settenno all heekin silf lukkaatenno all moomosin.
amm nam iyy qapa fottiyyu hekiyamu.
5 helpa mitt kallapanne awwaddanno poosaanne utet qar mimmitaatin ullupn.
dakinitayyenno dakallan allpepeesannin.
6 helpaan iyyat Yesus por seka akke,
iyy kapop feel iyy turi kilpin qullad ishshooomad illo
7 nass kaanin ullupan,
"meet rumma hekka Mooha,
yesuse!
kat maaniya an olle qafta?
mahh moohaatennin hed dinkamannin,
tonhedess an miida diiyii!"
ikkid.
8 hin iyyat maalla sedep kid,
oot iyyat "att laaffot oshshittet,
nam sed qara sohadu!"
kid acac maalla kida.
9 Yesus lamm,
"mahhaatt ayno?"
hekid kaassad.
iyyat illo "oot innu iyyaan lek koddin maalla,
mahhaaw lekiyona" hekid immitaatiy.
10 iyyat illo ikkim iyyat huss se qalle all iyyaa inarinnin qimiyy dinkamad.
11 ulla kamara ketta maashat lekit heelt hiikant kiyy.
12 semmalla laaffot oshshittetadaanett,
"tonhedess,
heelt maashat sett qallep innu hayyii!"
kiden dinkamaden.
13 Yesus illo "aanaa!"
iyyaa kid.
semmaalla laaffot oshshittet hinett orr se qara hesohatt illo heelt maashat sett ilop kalt.
heelt maashat iyyaan kum lakk koddaayyenno kamara qareet feelanta yaamen illo pakatet se ili limamen.
14 shinkama maashat settetenno hefeeladen,
saparaanne paattaallep kalen ishaamen,
orrat illo akkan se koddam tooyaass mannooddooshsh sohaden.
15 Yesus kapop deyen illo nam se laaffot oshshittetin qapam settenno mutsurooyy qalli ooren,
iyyat uuwaatayyenno uuwad,
ulli laiyy iyy akkene,
henahen.
16 orr se tureeshsh hin kodd akk,
nam se laaffot oshshittet qara kishshosenne maashatada qar hin kodd dahenn iyyaa ishaamen.
17 orr huss sett illo ikkim Yesus hussaaddu qalle sohanninu all anninu iyy dinkamatta hiren.
18 Yesus konkaallep kala qara kiyyo,
nam hin laaffot oshshittet qara sohatt,
"tonhedess,
hed olle aanonu."
heikkid dinkamad.
19 Yesus lamm amm owwo hekidemu.
hekoddu male "manaytep kalii illo poldat ikkim akkan ashshann kaan hedi erkayyenne ashshannass ikkim hed jarahrah orr manaytet ishaamii."
heikkid.
20 nam hinett illo aan,
iyyaan Yesus iyy erkayy,
paat se "sapara hund" kidamiyyo ishaama hir.
orr dakayenno dahenn shammatta patt kodden.
meet iyaairosenne iskattet se uuwaat Yesus qapatt
(mati. 9,18-26; Luqaa. 8,40-56)
21 helpaan Yesus konkan dase pakatet se patop mitaate,
orr lek ammannenno iyy kapop orqud qapam.
essete iyyat pakatet sett kapa kiyy.
22 kaadayya man dinkam ayhuta ila lamm nam shokkku yaairos kidamiyyu ullap deyy,
illo helpaan iyyat Yesus akke,
lukka keli isunk illo
23 "meeshiyyu toysha,
ikkim it dininnintu it illo kiyyatin kinnaannintu,
tonhedess hooyii harkayt qari qapii!"
ikkid qimiyy dinkamad.
24 Yesus illo iyy olle aan.
orr lekenno kanni aanen illo iyy dukin.
25 lamm iskattet shakk it par hundanne lakkess diikat qara urqan rakkusinniyonno ulla kishsh.
26 akimishsh shokkoshsh shokkop antaann ileki miidant,
pasad dahenn allidikkitt nafenno qarass lekan ann male amm qara heahnaademu.
27 oot it torroot Yesus dakayt maalla,
otant siip ila iyy kanneeshsh deyt illo uuwaashayy qappatt.
28 it maalla sedep kodit,
amaantet,
"etin uuwaashayy nafeeh qappado,
dinanninhina."
kidishonn kida.
29 essetekul diikaadd se urqiyonno hexell,
baaqaadd ila dinattaaddenno tirradd ila idakaysamaad.
30 Yesus illo esseteeh ikkim irrot iyy qara sohatt ufnaad,
por siipateesh mijir kid illo,
"aynu uuwashawu qappad?"
kid kaassad.
31 soolleshiyy lamm,
"siipat sedep ortuttuqquuriyane heakkitete,
'aynu an qappad?
' kidimu?"
he ikkiden.
32 iyyat illo nam sed erkayy aynu koddayy toyaass iipateesh mijir kid.
33 iskattet hin lamm iyyaan iti erkawusam ufnaatte huuran hehelshattete iyy turi sunkit illo hin kodd dahenn iyy lelt.
34 iyyat illo,
"meetoot!
amaanteshitt hed hedinitt,
andotin aanii,
rakkooshayt ilanno passadu."
it kid.
35 sanu Yesus sed ishaamalle kiyyo,
man kaadayt,
man iyairooseeshsh orrat deyen illo ikkidene,
"meeshitt hetoot,
sedeeshsh maanaass kollisampayt payyahinnin?"
36 Yesus lamm sed dakay illo kaadayt man dinkam settetess,
"amaan male,
'' huura diiyii."
ikkid.
37 Yesuset betsiroosenne yayqoopenne kafitt yayqoop yewannis pateeshsh ikkim nam pil iyy olle inxanniness kod.
38 helpaan iyyaa man iyaairoose paiyene,
orrat jaappiyan,
pooyiyannenne ullupiyane akk;
39 tallop luum,
"maanaas jaapin pooyin?
meet hin hepeatt male amm hetoytemu" iyyaa kid.
40 orratin illo deffeeqaass iyy qara holsaden.
iyyat lamm orr se talla kiyyu dahenn allsohashshiyy,
appaanne inkot meet settetenne orr se iyy olle kiyyonneeh por se meet hin ulla kishshop luum.
41 hark meet sett qap illo,
"tsaliitta quumi" ikkid.
furila lel settetenno "yent meet hayyii!"
kida.
42 inant settenno meet par hundann lakket,
illo esseteeh sohatt anta hirt.
helpaan hin koddene,
orrat ikkaanes shammaden.
43 iyyat lamm hin koddam nam lela diiyyaa kid iyyaa acac.