orr naasret Yesus qar hittiyen
(mati. 13,53-58; Luqaa. 4,16-30)
6
1 sekanna Yesus ulla sohad illo hussayyep aan,
soolleshayenno iyy olle aanen.
2 lashsh sampata ayhutaate man dinkam tallass kollisa hir.
orr lek iyy qara dakayalle kiyy kida.
iyyaanno,
"nam hin akkan sed dahenn ayla qeedd?
ufnaata ashshann kishshu iyy daassam?
iyyaan nam shamusinniyu iyyat erkanniyyu ashshann kiyyan?"
kidan shammattaalle kiyyan.
3 sekannass lamm,
"hin soort manatin hinemu?
meet maariyaam inhinemu?
ankas yayqoopenne heka yoosefenne heka yihutaatenne heka simoon inhinemu?
alawtaddaayyanno are innu olle kiyyann inhinemu?"
kiden illo sed minan iyy qeeddatta diiyen.
4 Yesus illo,
"himampayt orr hussayyetenne,
kafayyenne,
orr manayyetenn sekisama diinnin male amm orr pilin serkisama diinniyamu" kid iyyaa mitaattiy.
5 ulla lamm baaqampayya qoj qari harkayy qapa dinisa pateeshsh,
iyyaan nam shammusinniy erkasa amm hefottemu.
6 oot iyyaa amaana diinniyyan maalla,
ikkaaness shammad.
sekannakuless Yesus paattaalleesh kollisan mimmitaatin kida.
Yesus orr hitaym hundann lakk erkama lel masmasuntat hit
(mati. 10,5-15; Luqaa. 9,1-5)
7 Yesus orr hitaym hundann lakk ikapop hemb illo lakk lakke ollin hit.
laaffot oshshittet qarassenno hayyotum iyyaa dayy.
8 ikkim iyyaa paanaddossenno halitt pateeshsh,
laaqqotanno koddo okoletanno koddo kodashshetannenno inxannannini acac.
9 sedepanno iyyaa kid,
"lukkaann keli hopa kodadaa male,
tsippuqot lakk uuwatta diiyyaa.
10 por heikkete et mana shokkop luntane,
hak inn ulla sohannintan ulli laxaa.
11 por orrat inn qeeddatta diinniyonne,
inn qara dakaya diinniyane dahenn,
et ulla sohannishane,
tsura lukkaann pata allihissisadaa illo sohadaa.
sedenno maanyet iyyaa qari koddinta."
12 iyyaa illo ulla sohadene,
siip dahenn juppot qara ikkim mitaatinan kolliyene;
13 qayy lekenno sohashshiyen,
baaqampayya lekenno tifin roopen illo diniyen.
toxt yewannis heka ahlisampayt
(mati. 14,1-22; Luqaa. 9,7-9)
14 oot torrot Yesus nam heikk kapin paitt maalla,
herootis daamanno torroshayy dakayy.
orr shakkan lamm,
"yewannis ahalisampayt toxt ila sohad,
semmaalla iyyaan nam shamusinniy iyyin erkawsamin."
hekiden.
15 orr shakkanaddu,
"eliyaasipa."
hekiden.
orr pil lamm,
"himampayya ila iyy shokkupa."
hekidin.
16 helpaan herootis hin dahenn dakaye,
"hin iyy se antu mashshayy qara quurusiy yewannisipa.
toare iyy toxotalle sohad."
hekid.
17 herootis oot iyyat heraotiyaata se haypaat kafittaayy hekat filibos qeedd maalla,
yewannis it minan qapusiyy,
mana hidanatep kaliyy kida.
18 sedenno oot yewannis herootisess,
"amm haypaat kafittaayt qeeddot hedi heddaassamemu."
kid maalla kida.
19 herootiyaat yewannis qarass hommat haayatt,
iyy ikasa fadit illo amm hefottitemu.
20 maana maalla,
herootis yewannis nam dikkanne imiil koddaayy upo maalla,
iyy tura huurin,
iyy lushin.
helpaan iyyat ishaama yewannis dakayu mitt nahiy kida.
hekoddu male masmasuntann qara dakayn.
21 lashsh iyyat qari dalad serkisaass,
herootis hayyot daamumayyetenne,
orr toratenne,
haft kelila ila orr ufnashamess hembanta damot kaant kod.
sedenno heraotiyaataass helpa dikk kodden.
22 essete inant heraotiyaata por damot settetep kalt illo hirpinin herootisenne orr se iyy olle kiyyu masmasusitt.
daamat illo inant settess,
"iyaan att fadishu dahenn an kaassadu,
hedessin daannina.
23 daamumaaw qara pakayy et koddu nafenno,
iyyaan att an kaassannishshu dahenn hedessin daannina!"
kidan iti ashkad.
24 it lamm inkoshadd kapop ant,
"maanan kaassannina?"
kidit.
inkoshidd illo,
"mashsh yewannis heka ahalisampayt an daassamu.
' kidii kaassadu."
iti kidit.
25 meet settenno esseteeh huketin Daam se kapop mitaatt illo,
"mashsh ahalisampayt heka yewannis shomball ikkim haayaminu illo ammann ani ddaassaminun fadin."
kidit kaassatt.
26 Daam hin illo ikkaani dappiy;
hekoddu male,
oot ashkoshayy maallanne orr se iyy kapa kiyyu maalla,
se it kaassatt dawrass amm hefottemu.
27 esseteeh wartiya ila nam shokku mashsh yewannis quura indeya hit,
wartiyish settenno man hidanatep aan illo mashsh yewannis quur.
28 mashsh se quuram shomballi haay illo indey,
inant setti dayy.
inant hin illo inkoshadd daatt.
29 helpaan soollet yewannis sed dakayene,
heaanen dakint yewannis qeedden mooken.
Yesus nam kum hen dansiyy
(mati. 14,13-21; Luqaa. 9,7-9; yewa. 6,1-14)
30 orr hitaymatenno por se iyyaa ullop hitameneeshsh mitaaten,
Yesus kapi orqudiqapamen illo,
iyyaan iyyaa erkadenenne kolliyen dahenn iyy lelen.
31 iyyat illo kide,
"innaah ootayni por tahaw kiyyop aanaa illo jawhayy haysadaa."
iyyaa kid.
sedep iyyata maalla kid,
oot orr iyyaa kapop deyyiyonne anniyyu iyyaan lek kodden maalla,
helpan iyyaa ullin dama daminan oot iyyaa akkatta diiyen maalla kida.
32 semmalla konkalless qaaen,
por se tahaw kiyyop iyaah all xaanen.
33 hekoddu male iyyaa anniyaane orr lek iyyaa akken ishaaken illo sparooddu dahenn qalle sohaden,
lukkan hefeeltete turin qatten illo iyyaa kapop deyen.
34 helpaan iyyat konkaalle lekkanniyo siip lek akk.
oot iyyaa qum helemma shinkayt dap baaquriyanne por uqqari mitaata dapep kinnaaden maalla iyyaass mutsurood.
akkan lekenno iyyaa kollisa hir.
35 helpaan lashsh poonnaattan annishsho,
soolleshiyy iyy kapop dehaaden illo,
"lak hin tahawass kiyy,
lashshanno hepoonnatt.
36 iyaan iyyaa daminan amm heqapanemu,
ikkim ar kapaash paattaanne orr ullaalle kallaanniyyu kapop anninan dama piddanninan,
siip sed all hayyadu."
iyy kiden.
37 Yesus lamm,
"iyaan iyyaa daminan inn iyyaa dayyaa."
hekid iyyaa mitaattiyy.
iyyaa illo,
"kat anninhinna laaqqot tinareeta tseet lakkin piddinna illo iyyaa daminanemu?"
hekiden.
38 iyyat lamm,
"laaqqot meeq qaftan?
intu aanaa tooyaa!"
iyyaa kid.
iyyaa aanen tooyen illo kidene,
"laaqqot henenne qurtsummet lakk kiyy."
39 iyyat illo ikkim siip lak raad qalli hala hala laxashinani soolleshayy acac.
40 semmaalla siipat tseet tseetanne,
hund hen hene kodden orkapa qaen kida.
41 yesusenno laaqqot hena settenne qurtsummet lakka sett qeedd,
moontallel tooy illo aypila dehay;
laaqqot se mooss,
illo ikkim orr qootinan soolleshayy dayy.
qurtsummet lakka settenno nam daheness qoot.
42 iyyaa dahenn damen quuhen.
43 soolletanno moossansana laaqqotatenne heka qurtsummet hin ukkela hat qunna hundann lakk innaakot qeedden.
44 orr laaqqot se dam,
diidda patt,
dihasaaddu kum hen mini kiyyu kida.
Yesus pakateet qaraash aan
(yewa. 6,15-21)
45 lamm esseteeh soolleshayyess,
"hak antu siip hayyanninu shakar kida konkan dase pakatet pata petesaytaap an turi tarpaa!"
kid acac.
46 sekkanna kuless helpaan iyyat siip kapa reehade,
utet qarop dinkamatta fayyad.
47 helpaan lashsh ponnaatte konka settenno otant pakatet qalle kiyy kida.
iyyat lamm iyeeh dase pakatet pata qershaalle kiyy.
48 iyyanno soolleshiyy haayya se iyyaa minaashsh haayawiyu minan konka se annusisa rakkaniyaane akk,
awadda helpa lushayt wartiya arfiyaate pakatet qaraash lukkan antan iyyaa kapop dey illo iyyaa kapan tarpa fad.
49 hekoddu male helpaan iyyat pakatet se qaraash lukkan deyiyyo oot iyyaa akken maalla,
afa ehotap iyyaa kiyyaad iyyaa illo ullupen.
50 helpaan iyyaa dahenn iyy akkene kuless,
ikkaaness nahen huuren kida.
iyyat lamm esseteeh,
"haayy!
huura diiyyaa!
anpa."
iyyaa kid.
51 helpaan iyyat konkaallep fayyade,
haayya settenno ell,
soolleshiyy illo ikkaani shammaden.
52 oot mutsuraaddu shikkamooden,
iyyaa illo shammot se iyyat laqqoot lekiyy,
qall qaapatta diiyen maalla male,
hin amm iyaan iyyaa shammusinnayemu.
53 helpaan iyyaa pakatet se qara tarpene huss se kenserets kidamiyyo paene,
konka sett huss qarop dehayen illo hidden.
54 iyyaa konkaalleett lekkadene esseteeh orrat Yesus koddaayy ishaaken;
55 paattaan ukaapeesh kiyy dahennep fefeelen por se Yesus ulla kiyyop baaqampayya dahenn afandan haada indeya hiren.
56 por iyyat ullop aane dahenn,
por orrat ulla kallaanniyonne,
saparaanne,
paattaallenno baaqampayya mooraallep qeedden,
iyy turop dehayen.
qema uuwaashayy naf qappatass iyy dinkamannin.
orr qappadenno dahenn dinannin.