Yesus tampet appada qar all hittiy
(mati. 15,1-9)
7
1 farasetanne kollisampayya halitt muus ila shakkanu yerusaalemeeshsh deyen illo Yesus kapi orqudiqapamen.
2 soollet Yesus ila shakkanaddu harka jiqatta male laaqqot damiyyane akken.
3 farasetanne orr ayhuta hin hat,
halitt qimaayya lushattan harkooddu dikkisa jiqatta male,
amm dama damiyyanemu.
4 et kapiyyaalle mitaatannenno,
jiqatta male amm damiyyanemu.
qum kuppayaanne,
okkootanne mehadda silifatenne siret jiqaatep tampawwa lekk hepilanno lushannin kida.
5 semmaalla farasetanne kollisampayya halitt,
"soolleshitt maanaass halitt qimaayya qar tarpin illo harka jiqatta male dama damin?"
hekiden kaassaden.
6 iyyat lamm sedep kid iyyaa mitaattiyy,
"inn ippeepampayya!
isaayaas himampayt ootayn,
'siip hin kapayyenneeh an serkinnin male,
mutsurooyy an kapa hesek;
7 tampet namat soorumadeeh qum tampet moohaatep kollisan,
aypoti an shoomannin."
hekid shaakket him lel.
8 semmaalla innat acac Mooha aldiinnin halitt nami lushin."
9 ukkannass lamm Yesus sedep kid iyyaa mitaattiy,
"inn tampeshayn lushatta maalla acac Mooha allipaqinnin"
10 pahanatass muuset,
'appaytenne inkotayt serkiyii,
lamm,
nam appayy shokke inkotayy otiyyu hetoyu,
' hekid.
11 inn lamm,
"et namat appayyenne inkotayyess,
'qarqaarsa inn an qara akkannishshan daayy moohaatessin kodina' kido,
12 appayy shoke inkotayy qarqaara amm iyy fadusinniyyamu hekkidinninpa.
13 seden tampeshayn lushattaas kidin lel Mooha allipaqinnin.
settep lamm iyyaan lek hinep kikkiyyanno erkannin."
akkan nam oshumusinniyu
(mati. 15,10-20)
14 ukkannass Yesus orr sett ikapop hemb illo sedep iyyaa kid,
"an qara dakayaa!
qallqaapadaa.
15 iyaan nam oshuminniy iyaan kap nam qalle sohanniy male amm iyaan kapallin kardallep kaliyamu!a"
16 [nam lappaan dakayiy qapu hedakayu!]
17 helpaan Yesus siip aldiy illo tallop kale,
soolleshiyy oot paahnat settet iyy qara kaassaden.
18 iyyat illo sedep iyyaa kid,
"inn lamm iyyaan qallqaapatta diinniyamu?
iyyaan altaashsh nam qallep kaliy ikkim nam oshumusisa diinniyyan inn kala diinnimu?
19 kardallen tarpin illo altop sohannin male,
amm mutsurallep anniyanemu."
semmaalla Yesus paana sedenn dama dahenn iyyaan miili koddaaddu ufunaytiyy.
20 ukannass lamm sedep kid,
"iyaan nam oshumusinniy,
iyyaan mutsura nam qalle sohanniy kida.
21 iyyaanno,
qaap nayq,
arpalum,
hashant,
nam ikasa,
22 nyauur,
shooqum,
nayqunt,
nam paasa,
erraalum,
toqaytila,
kexema,
fooj,
melkalum kida.
23 nayqunt hin dahenn mutsura nam qalle sohannin illo nam oshumusinnin kida."
amaantet dakusot shakkat
(mati. 15,21-28)
24 Yesus ulla sohad illo huss se sapara tsiros kapa kiyyop aan;
man shokkop kal illo ulla kiyaattaayy ikkim namat inxufnaannin fad.
hekoddu male amm dekatta hefottemu.
25 dakusot shakk it meeshidd laaffot nayqatin qapant oot Yesus dakayt,
esseteeh deit illo lukka Yesus keli sunkit.
26 dakkusot settenno it huss soriya qalle paat finq kidamiyyo dalat kirikishshetb kida.
itanno ikkim inanshadd qara qayy sohashinninoss Yesus dinkamatt.
27 Yesus lamm,
"dama medda qeedda,
herrada kashot amm hedikkamu,
intu turqattaas medda quuhene."
it kid.
28 ita illo,
"poldaawo!
heyye shaakket,
herrada nafenno et medda dama damiyyane,
lukka kelass lain illo damaan medda kapeett peiy daminpa."
kidit immitaattit.
29 semmaalla Yesus it kide,
"lelayt sed minan qayy hin meeshayt qara hesohade,
ammann manaytep mitaatii."
30 helpaan it illo manaddep mitaatte,
qayyatin inanshadd qara hesohad,
it andotin afandaalli peat qari pait.
Yesus nam se dahhayt koddene ishaama diinniyyu diniy
31 ukkanna Yesus huss se tsiros kapeesh kiyyu alldiiyy aan,
huss sitoonaatin tarp,
huss se sapara hund kidamiyyun pakatet kelilaatep deyy.
32 ulla lamm nam shokku dahhaytanne iyy kapatucamenn iyy kapop deyen;
ikkim harkayy qari qappinu dinininu dinkamaden.
33 Yesus illo siip kapeeshsh haww all nam settin kidd illo qumaajooyy laappa nam sett tallop kaliyy,
tui kid illo arrap nam sett qappad;
34 erreel moontallel tooy,
hinhimodd illo,
"effatah!"
ikkid.
furila lel settetenno "qahisamii!"
kida.
35 lappaayy illo esseteeh qahisamen,
kapayyenno furisam,
illo iyyat rakkatta male pahisa ishaama hir.
36 Yesus orr se ulla kiyyoss ikkim hin erkawsam namass iyyaa illeliness acac.
hekoddu male ikkim iyyaa inxishaaminess iyyaa helel male iyyaa lamm seqareell tawniyen ishaamen.
37 orr dakayenno dahenn ikkaani shammattan,
"heikket dahenn dikkiyy soorum!
dahhayya ikkim dakaynan,
iyyaan kaptucam ikkim ishaaminaness kodusinnin!"
kiden.