Yesus nam kum afur dansiy
(mati. 15,32-39)
8
1 helpaanette lakkiyaass orr lek orqudiqapamen.
oot iyyaa iyaan iyyaa daminan dapen maalla,
Yesus soolleshayy hemb illo,
2 "siip hin,
toare,
lashsh halpatt an olle kaysiyen.
oot iyyaa iyyaan iyyaa daminan dapen maalla,
an yeyiyen;
3 etin tuffet sedin manaddop iyyaa hayyado,
oot karatiddu por ska deyen maalla paanaalless dootoonninan ikkid.
4 soolleshiyy lamm,
"are qershaalle dama siip sed dahenni kayn aha akkaaninan?"
he kiden immitaattiyen.
5 iyyat illo,
"laaqqot meeq qaftan?"
kid iyyaa kaassad.
iyyaanno "laaqqot tappin qafn" ikkiden.
6 iyyat illo ikkim siipat lah lainu acac,
laaqqot tapp settenno qeedd,
Mooha aypisad illo qallmooss;
ikkim siip sett qootinninan soolleshayyi dayy;
iyyaa illo siip setti qooten.
7 settep lamm qurtsummet titinnaxat jawshaddenno qapan.
iyyat lamm oot qurtsummet settetessenno Mooha aypisad,
ikkim siip setti qootinninan soolleshayy acac.
8 siip settenno dahenn damen quuhen,
moossansanaan ukkela hat qunna tapp haaden.
9 orr damaan damenno nam kum afur koddaayyen;
Yesus illo iyyaa hayyad.
10 sekkannakuless soolleshayy olle konkaalli laiyy huss se talmanuta kidamiyop aan.
faraset ishshaak kaassaden
(mati. 16,1-4)
11 faraset Yesus kapop deyen illo iyy olle shiittamatta hiren.
iyy ekkasaassenno faden illo Moohot iyy hitaayy hin iyyaa inxishaakinan ikkim moontalle iyyaa akkinninu kaassaden.
12 Yesus lamm kardalleet taajam illo,
"dalashot hin maanaass ishaak fadin?
shaakketin inn lelin,
dalashot sedess amm ishaakat erkawsaminamu!"
kid.
13 ukkanna lamm all iyyaa diiy illo lakkiyya konkaall laiyy,
dase pakatet patop tarp.
jarayt farasetatenne heka herootis
(mati. 16,5-12)
14 oot soolleshiyy laaqqotin annatta immashshipatisaden maalla,
konkaalle laaqqot shakkaah pateesh amm hepil heqapanemu.
15 Yesus illo,
"ittooyadaa:
jarayt farasetatenne heka herootis kela illushadaa."
kid iyyaa acac.
16 iyyaa lamm,
"sedep kidaayy oot innu laaqqot dafn mallaamu."
hekiden ollin ishaamaden.
17 Yesus illo qaapaaddu ufunaad,
"maanaass 'oot innu laaqqot dafn maallapa' kidin ollin ishaamannin?
sanu inn iyyaan qalliqaapatta diinniy kidaamu?
amm inni kalishamu kidaamu?
sanu mutsuraann iij koddenemu?
18 inda qafnaatete,
akkishshanemu?
lappa qafnaatete,
dakkayshanemu kat?
ashshannass inn mashsh ioora diinnin kat?
19 helpaan antu laaqqot hena se nam kum hen qall moosse,
moossansana qunna meeq haaditen?"
iyyaa illo,
"qunna hundann lakk."
ikkiden.
20 "settep lamm helpaan antu laaqqot tapp nam kum afuress qallmoosse,
qunna meeqa ukkela hat inn haaditen?
hekid kaassad.
iyyaa lamm,
"qunna tapp."
ikkiden.
21 iyyat illo,
"sanu qalliqaapatta diittenemu?"
he iyyaa kid. ,
Yesus petesaytaass indamalishsh diniy
22 helpaan iyyaa peetesayta paiyene,
orrat nam indamala koddenn deyen illo ikkim qappanninu dinkamaden.
23 iyyat illo hark indamalish sett qap paat se patin allsohashiyy,
illo indaayy ili tui kid,
harkayy qari qap illo,
"akkan akkikkishshamu?"
kid kaassad.
24 indamalishsh settenno qarinhaash tooy illo,
"heyye,
orr ani akkaannin,
hor qorayyaan anniyaap kiyyan."
kid.
25 Yesus lamm qarxoor inda nam sett qari harkayy qap.
helpaanette nam hin heillissad tooy;
dinattaassenno dinad illo heikk akka hir.
26 sekanna kuless Yesus,
"paat se qallep kala diiyyii."
he ikkid illo ikkim manayyep kalinu hayyad.
Yesus kristoos koddaayy betsiroos lel
(mati. 16,13-20; Luqaa. 9,18-21)
27 yesusenne soolleshayy paattaan huss se filiboos qisaariya kidamiyyu kapaash kiyyap aanen.
iyyaa paanaalle anniyaane Yesus,
"kat orrat aynu ani kidin?"
hekid soolleshayy kaassad.
28 iyyaa illo,
"orr shokku 'yewannis ahalisampayt' hekidin,
shakkan 'eliyaas' hekidin,
shakkan lamm,
'himampayya ila iyy shokku koddina.
' hekidin."
kiden immitaattiyen.
29 "inn illo aynu an kidin?"
hekid iyyaa kaassad.
betsiroos illo,
"att kristoosa."
kid immitaattiy
30 iyyat lamm "ikkim iyyaa ootaayy namass inlelin acac.
Yesus oot rakkotanne toxshayyet turaqatta lel
(mati. 16,21-28; Luqaa. 9,22-27)
31 Yesus soolleshayy kollisa hir,
meet nam rakkot lekit qeeddatta ikkim iyy fadusinnishshonne qimaayyaanne,
kaadayya suukamma Moohaatenne (qeesawaanne),
kollisampayya halitt muusetin tuffashama,
toya illo lashsh halpatt kanna tootalle sohatta iyy fadusnnishu iyyaa lel.
32 iyyat ishaama hin patapahiyy iyyaa lele.
betsiroos lamm Yesus haw allqap illo tusha hir,
"ass kida diiyyii!"
kid olle jiiad.
33 Yesus lamm mijir kid,
soolleshayy tooy illo betsiroosess,
"att seetsan,
an kapa allkiddii!
att heka namat qaapannin male,
amm heka Mooha qaapannikkishshamu!"
ikkid tush.
Yesus kanni antaass iyyaan nam qara fadammiy
(mati. 10,38-39; 16,24-28; Luqaa. 9,23-27; 14,26-27)
34 sekanna kuless Yesus siipanne soolleshayy ollin hemb illo iyyaa kide,
"nam an kanni anta fadiyyu et kiyaado ihaimu;
masqaletayyenno haisadu illo an kanni deyu.
35 nam kiyyatayyin hatatta fadiyyu dahenn kiyyatayy allpatinnina,
nam ootaawonne oot lel masmasuntat kiyyatayy allpatinniyu dahenn kiyyatayyenn hatannina.
36 namat et shorokum husslah dahenn akkadu illo nafsetayy allpatiyyo,
maana iyy koyna?
37 shoke namat oot nafseshayyet heriy ashshann kiyyu daatta fottina?
38 nam dalashot amaanteet daftenne juppampaya turi ananne lelaawun lilmaanniyu dahenn,
helpaan meet nam serka appayyetin hitaymiyya miillampaya olle deyyo iyyann lilmaannina."