oohama piss Yesus
(mati. 17,1-13; Luqaa. 9,28-36)
9
1 sekanna Yesus asset iyyaa kid,
"shaakketin inni lelin,
orr se ari ell ila karaddu,
iyyaan daamum Mooha irrot kaantin deyiyyo akka male,
raawa diinnina kiyy."
2 lashsh leh kanna Yesus betsiroosenne yayqoopenne,
yewannesenneeh iolle utet kaant qarop fayyad;
pissatiyy lamm iyyaa turi ooham.
3 uuwashayyenno haahisa haahitt;
nam husslaha qara uuwaat jiqiyu haka itap attassa fotta diininnu attaat.
4 essete muusenne eliyaas Yesus olle ishaamiyane iyyaa akkaaden
5 betsiroos illo yesusi kide,
"kollisampayt!
etin ari olann kid innu hedikk.
semmaalla taaset halpatt,
shakk hedess shakk muusess shakk eliyaas dihinu?"
6 soollet hin halpatt oot iyyaa ikkaan nahen maalla,
betsirooset iyyaan iyyat ishaaminu amm heupamu.
7 urrashshetanno deit iyyaa pat uuwashitt;
urrashshet se ilaashsh lamm nass,
"hin meetaaw antu hoxsanniyyu;
iyy qara dakayaa!"
kidiyyu dakaysamaad.
8 iyyaa essete iqudanne ikann tooyiyane,
Yesus pateesh amm nam pil heakkenemu.
9 helpaan iyyaa utet se qareett lekkanniyane,
Yesus,
"hak antu meet nam toxt ila sohanninoss,
hin inn akkiten nam lela diiyyaa."
hekid iyyaa acac.
10 lelayenno hedakayen illo mutsurooddu qalli qapaden.
hekoddu male "toxta ila sohatta kidota maana kida koddinan?"
kiden illo ollenn ishaamaden.
11 soolleshayyenno,
"kat kollisampayya halitt maanaas,
'eliyaas turqatta deya iyy fadusinnin' kidin?"
hekiden Yesus kaassaden.
12 iyyanno sedep iyyaa kid,
"shaakkenn,
eliyaas turass qattina deyina,
heikk pahinnina soorumina.
hekoddu male,
meet nam ikkim rakkot qeedattaanne tuffashamot iyyi fadusinniyyu,
hin tsaafam maanaap inni kinnaannin?
13 antu lamm sedepin inn kidin,
eliyaas sed tureesh hedey;
orrat lamm qum it ootaay tsaafant mittas hasaddoss qarkodden."
Yesus meet laaffot nayq qara kishshu diniy
(mati. 17,14-21; Luqaa. 9,37-43)
14 helpaan yesusenne soolleshayy halpatt,
soollet se hatt kapop mitaatene,
siip lek iyyaa kapi orqudqapam iyyaa akken;
kollisampayya halitt muusetenno soollet Yesus olle orshiittaalle kiyyan kida.
15 siipanno dahenn,
helpaan iyyaa Yesus akkene,
heshammaden illo nahaman innakkooden,
iyy kapop feelen,
paanussa iddehayen.
16 Yesus illo soolleshayyess,
"maana qara iyyaa olle orshiittin?"
kid kaassad.
17 otant siip sett ila lam nam shokku asset kid immitaattiyy,
"kollisampayt,
meetaaw iyy laaffot se nam tucusinnishun qapamennin hed kapop deyy;
18 helpaan it ihayyisho,
lahan qain,
iyyat illo rampashsh ikkapin kaffaarinnin,
ila ollin qumin,
ulli kokin.
antu illo ikkim laaffot sett qara sohashinninan soolleshayt kaassad,
iyyaa lamm amm hefottenemu."
19 Yesus illo sedep kid immitaattiy,
"inn dalashot amaantet dafte,
hak awametesin antu inn olle kallaannina?
hak awametesin inn duupannina?
intu meet settin an deyaa!"
20 iyyaanno meet settenn iyy kapop deyen.
laaffot oshshittet hin helpaan it Yesus akkite,
esseteeh meet sett lahin qaitt illo tsitsirusitt.
meet settenno hussallin kankallatta rampashsh ikkapin kaffaarisa hir.
21 Yesus lamm appa meet settet kaassad,
"baaq hin iyy hireeshsh maana kaysiyi" ikkid.
appa meet sett illo,
"meumayye hirad;
22 helpa leke ikasa apittanne haq ili kashine tonhedess,
et hedi fottanto,
innu yeyii illo innu qarqaarii" ikkid.
23 Yesus illo,
"et hedi fottanto kidimmu?
nam amaaniyoss heikk iyyass fottamiyan."
ikkid.
24 esseteeh appa meet setti sedep kid ullup,
"amaana amaaninkiyy male,
por antu amaana pushmaanniyyu ila lamm dahenn att an qarqaarii!"
25 Yesus illo,
siipat tunan iyy kapop deyyiyane akk;
sedep kid laaffot oshshittet sett tush,
"att laaffot dahhayetet,
nam tucusinnishshu,
ikkim meet sed qara sohannintu,
lakkiyya qarop mitaata diinnintosin hed acacin' kid tush.
26 laaffot oshshittet settenno nass kaanenn ulluft illo meet se tsitsirusitt kanna qara sohatt;
meet settenno qum pukkaatep kodd maalla orr lekess afa tooyep kinnad.
27 Yesus lamm hark meet settet qap illo errop ellashiyy,
meet settenno err ell.
28 helpaan Yesus tallop kale,
soolleshiyy "innu laaffot oshshittet sed sohashisa fotta diinninkinnu maana maalla?"
kiden haw iyy kaassaden.
29 iyyat illo sedep kid immitaattiy,
"laaffot sedep kishshu dinkamann [dama kapa duupattaann] male,
amm hepilin sohannishshamu."
Yesus oot rakkoshayyetenne toxshayyet lakkiyya lel
(mati. 17,22-23; Luqaa. 9,43-45)
30-31 yesusenne soolleshayy por sette hesohaden illo kelilan tarpen;
oot iyyat soolleshayy kollinniyyu maalla,
por se iyyaa ulla kiyyan ikkim namat ufnaanninoss amm hefademu;
sedep kid soolleshayyenno kolliy;
"antu meet nam hark orr qallessin tarpisamina daassamina;
iyyaanno an ikanninan.
hekoddu male,
et an ikayane lamm lashsh halptt kanna sohanninhina."
32 lamm soolleshayyess hin amm hekaltem;
ikkim iyyaa iyy inkaassanninessenno hehuuren.
iyy dahenn qara taw ayno?
(mati. 18,1-5; Luqaa. 9,46-48)
33 yesusenne soolleshayy qifirnaahomep deyen;
helpaan Yesus tallop kal kanna,
"inn paanaalle kishshane,
maana qarass orrshiittiten kat?"
hekid soolleshayy kaassad.
34 iyyaa lamm ullass rui kiden;
sedenno,
helpaan iyyaa paanaalle kiyyane,
oot iyyaa "innu ila nam dahetaynu qara taw ayno?"
kidan orrshiitten maalla kida.
35 iyyat lamm lahi lai kanna,
soolleshayy hundann lakka sett hemb illo,
"nam sinkitt kodda fadiyyu,
iyy nam dahenn kannaatt kiyyonne erhayt nam heikk kodda iyy fadusinnin" ikkid.
36 ukkannass lamm medda tinnax qeedd illo otanshaddu ili ellashshiy,
ikkettassenno qapad illo sedep iyyaa kid,
37 "nam meedda hinep kikkiyy ila iyy shokku mahhaawun qeeddanniyyu,
an qeeddannin;
nam an qeeddanniyonno dahenn,
anaah kodda male,
se an hitenno qeeddannin."
nam innu shiitta diinniyyu, innu olle kiyy
(Luqaa. 9,49-50)
38 yewannis yesusess,
"kollisampayt nam shokku mahhaytin qayy sohashshinniyon akkin illo oot iyyat nam innu olle kiyyu kodda diiy maalla,
dawrin."
ikkid.
39 Yesus lamm asset kid,
"nam mahhawun akkan nam shammusinniyu kodiyu illo lamm esseteeh iyaan nayq an qari ishaaminu oot iyyat kinnaatta diinninu maalla,
dawra diiyyaa.
40 nam innu shiitta diinniyyu dahenn,
innu olle kiyya.
41 shaakketin inni kidin,
oot inn heka kristoos kodditen maalla,
nam mahhaawonn haq kuppayya shakkanooh naf,
inni daanniyyu amm heriyayy dapinamu."
kohayt nami kodda qara illushatta
(mati. 18,6-9; Luqaa. 17,1-2)
42 "nam hin tittinnax an amaaniy ila iyy shokku patindapusinniyu,
daka ombash holmayy qudi hiddama,
iyyat pakatet ilop allkasham kid iyy hedikk.
43 semmaalla et harkaat patin hed dapusinniyo,
quurii allkashii;
harka lak qafnaatta por apitt se parpar liqqa diinniyo,
kehannamep kala kapa,
hark kumannat qafnaatta illo por kiyyat qallep kala hed hedikk.a [
44 kehannamet por se ulla juhunooddu toya diinniyyan,
apitt ulla liqqa diinniyyu,
kida.]
45 et lukkeshitt patin hed dapusinnishsho,
quurii allkashii;
lukka lakk qafnaatta,
por apitt se parpar liqqa diinniyo,
kehannamep kashama kapa,
lukket shoopaytet qafnaatta illo por kiyyat qallep kala hed hedikk. [
46 kehannamet por se ulla juhunoddu tooya diinniyyan,
apitt ulla liqqa diinniyyu,
kida.]b
47 settep lamm et ilshitt patin hed dapusinnishshu koddo,
qeeddii allkashii;
iinda lakk qafnatta illo kehannamep kashama kapa,
iilt shakkaah qafnaatta illo daamum Mooha qallep kala hed hedikk.
48 kehannamet por se ulla juhunoddu tooya diinniyyan,
apitt ulla liqqa diinniyyu,
kida."