orr purrisoot amm fadusinniyyamu
(mati. 19,1-12; Luqaa. 16,18)
10
1 Yesus ulla sohad illo paat se haq yoritaanos patin kiyyo ussa yihutaatep aan.
siip lekenno lamm ammannenno iyy kapi orqudqapamen.
iyyat iloo qum kollinatay mitt iyyaa kolliyy.
2 faraset ilanno karatiddu iyy kapop dehaaden illo iyy kap fada,
"ikkim namat dakusotayy purrinninu halitt qarass hedaassantemu kat?"
kiden iyy kaassaden.
3 Yesus illo sedep iyyaa kkid,
"muuset oot sedet maana inn acac?"
4 iyyaa lamm,
"muuset nam dakusotayy purrinniyyu,
tsaafa purreshadd iddayyu illo purriyu hekid" heikkien.
5 Yesus illo sedep kid iyyaa mitaatiyy,
"muuset maallla halitt sed inn tsaaf,
oot mutsuraann iij kodden maalla kida.
6 hekoddu male,
Moohot uuma hiraym qara diirtanne iskattet kod uum.
7 'sed minan namat appayyenne inkotayy alldiinnin illo dakusotayy olle senin,
iyyaa lakkaddun soha shakkanooh koddin'
8 semmaalla iyyaa sed kanneeshsh soha shakkanooh male amm lakkemu.
9 hin Moohot shakkanooh kod namat inreehinii."
10 helpaan iyyat tallop kale,
soolleshiyy lamm ammannenno,
oot ishaamanett Yesus qara kaassaden.
11 iyyat illo sedep kid iyyaa mitaatiyy,
"nam dakusotayy purrinniyyu illo iskattet pilt qeeddiyyu dahenn,
dakusotayy qarass nyaaurin.
12 settep lamm,
et iskattet irshaadd kela purritu illo appa pil olle aatunto,
nyaaurishsh."
Yesus meedda qor
(mati. 19,13-15; Luqaa. 18,15-17)
13 ikkim Yesus medda qari hark qapinos,
orrat meddan iyy kapop deyen.
soolleshiyy lamm orr sett tushen.
14 helpaan Yesus hin akkekuless,
hejiiad illo soolleshayy ass kid,
"oot daamum Mooha orr medda hinep kikkiyoss kodd maalla,
medda dawura diiyyaa,
he an kapop deyenii."
15 shaakketin inn lelin,
'nam daamum Mooha qum meeddaatep qeedatta diinniyyu,
amm apure daamum Mooha qallep kalinamu."
16 sekanna kuless meeddanett iikettop qeedd illo harkayy qari qap qor.
kodashshet hoxsattaanne daamum Mooha
(mati. 19,16-30; Luqaa. 18,18-30)
17 helpaan Yesus ulla sohad illo anta hire,
nam shokku iyyaa kapop feel,
iyy turi kilpan qullad illo,
"kollisampayt dikkallo!
kiyyat parpar akkattaass,
maana koda an fadusinnin?"
kid kaassad
18 Yesus illo sedep kid immitaattiy,
"maanaass iddikk ani kidin?
Mooha shokkooh male nam dikk amm hekiyamu.
19 acacadda heuftapa;
iyyaanno iyaan,
'ikasa diiyii,
arpaluma diiyii,
hasha diiyii,
maanyet eerpa kodda diiyii,
nami paasa diiyii,
appaytenne inkotayt serkiyii.
' kidiyy kida."
20 nam settenno asset iyyi kid,
"kollisampayt,
acacadda hin dahenn meumawon hir lushad."
21 Yesus lamm nam sett tooy hoxsaad illo ass kid,
"akkan shokkooh hedi hat;
aanii iyyaan att qaftu dahenn kashii illo hiyyayya dayyii.
shorokum moontalle akkanninta.
hooyii an kanni deyii."
22 helpaan nam hinett sed dakayekules,
oot iyyat shorokum lek qapu maalla,
miintayy ponnayy illo dappetin aan.
23 Yesus lamm iqudanne ikkannass tooy illo soolleshayy kide,
"shorohtass daamum Mooha qallep kalot rakkot ashshann kishsho!"
24 soolleshayyenno lelaayyenn heshammaden,
Yesus lamm lakkiyyaas sedep iyyaa kid,
"meeddoot!
daamum Mooha qallep kalot rakkot ashshann kishsho!
25 shorokitt daamum Mooha qallep kala kapa,
kaalass ura milmet qallin luumot hoshilaay."
26 soolleshiyy illo ikkaani shammattan,
"settekul aynu dina fottina?"
olli kikkiden,
27 Yesus lamm poraddoosh tooy illo,
"hin amm nam fottamiyanemu,
hor moohaass fottamiyan.
moohaass heikket fottamine."
ikkid.
28 betsiroos illo,
"toare,
innu heikketin allindiinn illo hed kanni antaalle kinn."
ikkid.
29 Yesus lamm asset kid immitaattiy,
"shaakketin inni lelin,
nam anannne lel masmasunt minann manayy shoke insharaddooyyanne anakasaddooyy shoke alawtaddooyy shoke inkotayy shoke appayy shoke meddoyy shoke ulayy alldiinniyu,
30 sapan sed qalle kannxarsama olle mannaanne insharaddaanne ankasaddaanne alawtaddaanne inkawaanne,
meeddaanne ula hark tseet qeeddannina.
sapan se deyiyyu qallenno kiyyat parparat akkannina.
31 hekoddu male,
orr hin lek turi qatt,
kann oorinninan;
hin kann ooriyy,
turass qattinan."
Yesus oot tooshayyet halpattiyya lel
(mati. 20,17-19; Luqaa. 18,18;31-34)
32 helpaan iyyaa paanaalle yerusaalemep antaalle kiyyane,
Yesus iyyaa turass qatt annin.
soolleshayenno sed minann heshammaden;
orr pil iyyaan iyy kanni anniyonno hehuuren.
iyyat lamm lakkiyaas hundann lakka set ikapop hemb illo sedep kid iyyaan iyy qari paina lel,
33 "toare,
ammann yersaalamepin annin;
ullass lamm meet nam kaadayya suukammaatenne kollisampayya halittatess tarpisamina daassamina;
iyyaanno horat toxtat qari quurinan.
orr ayhuta kodda diiyessenno tarpinninan daanninan;
34 siip ayhuta kodda diyyenno iyy qari beejjiyanninan,
ambush qari shuhanninan,
tolinan,
ikanninan.
hekoddu male lashsh halpatt kanna toxt ila sohannina."
he iyyaa kidd.
dinkam yayqoopenne heka yohannis
(mati. 20,20-28)
35 medda septiyoos,
yayqoopenne yewannis Yesus kapop dehaaaden illo ikkidene,
"kollisampayt!
iyyaan innu hed qara dinkamanninkinnu dahenn ikkim innu erkannintossin fadin."
36 iyyat illo,
"ikkimin maana inn erkanninoss faditen?"
iyyaa kid.
37 iyyaa lamm,
"serka daamumaayt qalle ikkim nam shokku miskittaayt qarass,
nam shokku lamm pihitoshayt qari lainninu innu kodii."
ikiden.
38 Yesus illo,
"iyaan inn dinkamannishan amm heufutanemu;
waallet rakkot se antu ukkinu,
ukka fottihintanemu?
ahalilaan antu ahalisaminu ahalisamihhintanemu?"
iyaa kid.
39 iyyaanno,
"heyye,
fottinhinna."
kiden.
Yesus illo "shaakket waallet se antu ukkinu ukkihintan;
ahalilaan antu ahalisaminonno ahalisamihintan.
40 hekoddu male,
miskittaawonne pihitoshawu qar laisot orr appaawu iyyaa dikkiyess male amm an iyyaa daanninamu" ikkid
41 soollet hin hatt hund helpaan iyyaa sed dakayene yayqoopenne yewannis olle jiiaden.
42 Yesus dahenn ikapop hemb illo sedep iyyaa kid,
"orr se peashisampayya siip kidam hempam siipaaddu irrotann piddin;
sinkiyyaaddonno iyyaa qarass hayyotum ikkim qapan heufutan.
43 inn kapa amm sedep kodda fadusinnishshamu.
hekoddu male inn ila nam ikkaan kodda fadiyyu erhayt inni koddu.
44 settep lamm nam inn qara tawunaatta fadiyyu,
aylet nam heikk koddu.
45 meet namatenno ikkim erhaytap erkanninu illo orr leki mashshiqa koddinu kiyyashayy daanninnoss dey male amm ikkim iyyi erkanninaness deyemu."
Yesus inda pertsemewos diniy
(mati. 20,29-34; Luqaa. 18,35-43)
46 sekanna kules Yesus soolleshayy olle sapara iyaarkotep dey.
helpaan iyyaa soolleshayenne siip lek olle saparaan qalle sohaden anniyyane,
pertsemewos,
meet tsemewos,
indamala,
paana kapi laiyy qasiyannin.
47 hin ullin tarpiyyu,
Yesus naasreetishsh koddaayy helpaan iyyat ufnaade,
"meet taawit yesusello!
tonhedess an jararahii!"
hekid ullupa hir.
48 orr lek,
"rui kidii!"
hekiden tushen;
iyyat lamm,
"meet taawit!
tonhedess an mutsuroodu!"
hekid dikkiy ullup.
49 Yesus illo ulli ell,
"iyy hembaa!"
kid.
iyyaanno indamalanettess,
"koddii kokkaadu!
sohadu!
Yesus hed hembine!"
ikkiden.
50 iyyat illo uuwaatayy allkash tor sohad illo Yesus kapop aan.
51 Yesus illo,
"maana ikkimin hed kodinoss fadin?"
kid kaassad.
indamalishsh settenno,
"kollisampayt,
akkan fadin."
ikkid.
52 Yesus illo,
"aanii,
amaanteshitt hed dinitte."
ikkid.
nam settenno esseteeh akka fott,
paanaallenno iyy olle aan.