Yesus serka kaanen yerusaalemep kal
(mati. 21,1-11; Luqaa. 17,28-30; yewa. 12,12-19)
11
1 helpaan yesusenne soolleshayy yerusaaleme dehaadene,
petefaakenne pitaanniyya kapa utet se tarr ekertada kidamishsho paiyene,
Yesus sedep kid soolleshayy ila nam lakk hit,
2 "paat se inn tureesh kiyyop aanaa;
helpa ulla paittane esseteeh ookka harret iyaan namat apure qari laisa diiy iyaan ulli hiddam akkintan,
furiyyaa illo arep indeyaa.
3 et namat,
'maanaass sedep kodin?
' inni kido,
'poldass fadusinnin,
ammann mitaattinnina hitina.
' ikkidaa."
4 iyyaa illo aanen ookkaan paana kapa man alti hiddam akken illo furiyen.
5 orr se ulli ell ila shakkan,
"ookka hin maana maalla furinnin?"
hekiden illo iyyaa kaassaden.
6 iyyaa illo qum se yesuus iyyaa lelep,
orr sett lelen iyyaa illo all iyyaa diiyen.
7 soolleshayyenno ookka harret settetenn Yesus kapop deyen.
uuwataddonno ookkaan pati afen Yesus illo qari laiyy.
8 orr lek uuwwataddu paanaalli afin.
orr shakkan lamm,
haarra qorayya iyyaan laappa qap qeqepin paanaalli afin kida.
9 orr iyy turi qattenno hin iyy kanni deyiyanno,
"hoosaayna!
iyy mahh poldatin deyiyyu,
iqoram!
10 daamum appaaynu heka taawit hin deyyu iqoram!
hoosaayna ele moontalless!"
kidaan ullupin.
11 helpaan Yesus yerusaaleme paiye,
man miilotatep kal illo iyaan man se kapeesh kiyy dahin tooy kanna,
oot lashsh poonnaatt maalla,
soolleshayy hundann lakk olle yerusaaleme sohad pitaaniyaap aan.
Yesus qoyr pelesetat ot
(mati. 21,19-29)
12 helpaan iyyaa parreshade pitaaniyaashsh mitaatiyane Yesus hetuff.
13 qoyr peleset se raad por sekaashsh akk illo,
"apure dalot uqqara kinnaanintamu kidan qoyr se kapop aan.
hekoddu male,
oot it helpaan peleset uqqalli dalishshu kodda diitt maalla,
lappa pateeshsh amm daloot uqqara heakkademu.
14 semmaalla Yesus peleset settess,
"sed kanneeshsh namat hed qara dalot indamin!"
heikkid.
iyyat sedep kidiyyo,
soolleshayyenno hedakayen.
Yesus man miilot talla orr kapiyaat all sohashshiyy
(mati. 21,12-17; Luqaa. 19,45-48; yewa. 2,13-22)
15 helpaan iyyaa yerusaaleme paiyyene,
Yesus man miilot altop fott,
orr se ulla kapiya kashiyonne orr se heranniyu kann arisa hir.
teekka kodashshet oohampayyaatenne sheedda orr se eleela kashiyotenno lahop allquqqupaappiy.
16 namat ikkim mehadda inhain illo man miilot sett altin intarpini dawr.
17 assetenno kid iyyaa kolliyy,
" 'manaaw siip dahenness man dinkamat kidamina!
' hekidant tsaafant inhinemu?
inn lamm pohot ponqampayyaatess koditen."
18 kaadayya suukamma moohaatene kollisampayya tampet muus,
iyyat sedep ishaamiyyo dakayen illo,
oot siipat dahenn kollilaayin shammanniyan maalla,
tura huuren.
semaaalla ikkim ashshann koda iyy ikasa fottinaness,
malla fadattaalle kiyyan.
19 helpaan lashsh poonnaatte kuless,
yesusenne soolleshayy saparaan qalle sohaden.
qoyr peleset se kokit
(mati. 21,20-22)
20 parreshade etikel iyyaa paanaalle tarpiyaane,
qoyr peleset sett hittinnay ollenn koki iyyaa akken.
21 betsiroos lamm ishaamaanett mashaoori,
iyyat illo Yesus kide,
"kollisampayt!
toare,
qoyr peleset se att ott hekoki!
22 Yesus illo sedep kid immitaattiy,
"Mooha amaanaa.
23 shaakketin inn lelin,
aynonno et mutsurooyy qalleett shurshura male iyyaan iyyat kidiyyu ikkim ikkaysaanninan amaanu illo,
utet sedess,
'sohadu pakatet ilop allihappamii!
' kido,
iyyass koddinta.
24 semmaalla iyyaan inn dinkamin kaassannishshan dahenn,
qum inn akkatteni amaanaa,
hin dahenn innass koddinan.
25 lamm,
ikkim appaann hin moontalle kiyyu naykunshayn all inn diinninoss,
innanno helpaan inn dinkam ellishshane,
et namat akkan shokkun inn miirayyu koddo,
all iddiiyaa. [
26 et inn nayqunt orr pil all iyyaa diitta diinnishshane,
appaann hin moontalle kiyyu juppooshayn amm all inni diinninamu."]a
kaassy oot hayyotum Yesuset dehad
(mati. 21,23-27; Luqaa. 20,1-8)
27 ammannenno lamm yerusaalemep deyen.
helpaan Yesus man miilot alta mimmitaataalle kiyyo,
kaadayya suukammaatenne kollisampayya halitt muusetenne qimaayyaanno iyy kapop deyen illo,
28 " att hin erkannishshu,
hayyotum hekannenne?
hin erkasaass,
hayyotum sed aynu hedi day?"
kiden kaassaden.
29 Yesus lamm sedep iyyaa kid,
"ananno kaassiy shokkoohin inn kaassannina.
et kaassiyaaw ani mitaatittane,
ananno ikkim antu hayyotum hekannenn sed erkanniyyu,
innassin lelina.
30 ahalila yewannis Mooha kapaamu,
kat nam kapa?
intu ani mitaattiyaa."
he iyyaa kid.
31 iyyaa illo sedep kiden ollin mariyaden.
" 'etin Mooha kapa.
' kidino,
'illo maanaass iyy amaana diitten?
' he innu kidina.
32 'ikkim iyy nam kapa?"
inkidiness oot ssiipat dahenn yewannis himamapayt shaakk iyy kidiyyan maalla,
he huuren.
33 semmaalla,
"amm henxufnamu."
hekiden immitaattiyen.
Yesus illo,
"ananno ikkimin hayyotum hekannen hin erkanniyyu amm inni lelinhinamu."
iyyaa kid.