paahnat peehampayya dihot woynetat
(mati. 21,33-46; Luqaa. 20,9-19)
12
1 ukkannass Yesus pahanatann iyy lela hir illo sedep kid,
"nam shokku dihot woynet dih.
patanno qaad,
qaaw woynet uqqalli jiipaatenno qosh,
woynet se uqqaraashsh lushassenno kawwashsha rahha soorum.
sekannakul ikkim dihot woynet sett kel sooruminan peehampayya dayy illo huss pilap aan.
2 helpaan woynet hin palhite,
ikkim dalot woynet settetin ideynaness,
peehampayyaan kapop ayleshayy hit.
3 peehampayyaan lamm,
aylet se qapen tolen illo harkaa patt hayyaden.
4 appa ul lamm lakkiyyaass aylet pil hit.
peehampayya lamm,
mashsh qara pappaqiyen illo deesayen hayyaden.
5 ukannassenno hepil hit;
iyyaa illo ikayyen.
settep lamm iyyat iyyaan lek hitenno,
shakkan hetolen,
shakkan lamm heikayen.
6 ammann iyaan hat,
meetaayy se iyyat hoxsaanniyyu hitaaha kida.
semmaalla 'meetaawu huurinan.
' kida qaapattaann muutayta qara meetayy shokkooh hit.
7 hekoddu male peehampayya,
'hin taymampaytaapa!
hooyaa innu all ikannu!
ulayyenno innoss koddina!
' he olli kikkiden.
8 meet se qapen illo ikayyen;
ul woynet qalle heel patin allkashen.
9 semmaalla appa ul woynet sett maana kodaay?
mashshayyess deyina,
peehampayyaanettenno allrawinnina,
ul woynet settetenno peehampayya pili daannina.
10 se matsaafa miilot qara,
'daka se man dihampayya alltuffaden,
daka kaysila man kodd.
11 hinenno erkama Moohaat;
indaannu turassenno shammot kodd.
' kidant tsaafant apure inn inwaarusinnemu?"
12 kaadayya orr ayhutet paahnat se Yesus lel,
it iyyaa akkinnishshu koddaadd oot iyyaa ishshaaken maalla,
iyy qapa faden makess;
hekoddu male,
oot iyyaa siip huuren maalla,
all iyy diiyen aanen.
kaassiyy oot tiiqot daattaat dehaad
(mati. 22,15-22; Luqaa. 20,20-26)
13 kaf farasetatenne orr herootis ila orr shakkan ishaamaayyin Yesus kap qeeddaass iyy kapop hitamen.
14 helpaan iyyaa deyenekuless,
"kollisampayt!
att tsillampayt koddaayt henxufn;
iyaan att nam tura huuran erkannishshu amm hekiyyanemu;
amm qariqatta erkannikkishshamu,
paana moohaatenno shaakketann kollinnin.
halittaaynu qara Daam roomaat tiiqot daattot hekiyyamu shoke adixinkiyyu?
daanninhinnamu shoke allindiinninna?"
heikkiden.
15 Yesus lamm uruurumaaddu ufnaad illo,
"maanaass an kap qeedda fadin?
intoonn kodashshet settin hooyaa,
an akkiyyaa!"
iyyaa kid.
16 iyyaa illo kodashshet setten iyy deyen.
iyyat lamm "kodashshet sed qara paahnat hin kishshonne mahh hin tsaafam hekop ayno?"
kid kaassad.
iyyaanno,
"heka Daam roomaat."
kiden.
17 Yesus lamm,
"semmaalla,
heka Daam daamass,
heka Mooha Mooha dayyaa!"
hekid.
iyyaa illo mitaattilaayyan ikkaan shammaden.
kaassiy oot toxt ila sohattat dehaad
(mati. 22,23-33; Luqaa. 20,27-40)
18 orr satuqet hin,
"toxt ila sohattot amm hekiyamu."
kidiyy Yesus kapop deyen illo sedep kiden iyy kaassaden,
19 "kollisampayt!
muuset,
'nam shokku et haypaat qeeddu illo medda haaya male qarin toyo,
insharaayy it dahalu illo ankasaayy se toy kanna mahh hembusiyu.
' hekid innu tsaaf.
20 ammann kolkolla tapp iyyaan ollin dalad kiyy.
ankasaaddu hin qart kodd haypaat qeedd illo medda haaya male qarin toy;
21 inshar iyy kanna kiyyu lamm,
iskattet sett dahal,
medda qara haaya male toy.
inshar lakkiyyaanno iskattet sett dahal.
22 sedep koddan immadaan tapp iskattet sett dahalen,
medda qara haaya male raawen;
iyyaa kanna lamm iskattet hin toxt.
23 kolkolaan tapp dahenn it qeeddene,
kat helpa toxt ila sohattaate hekanness aat koddinta?"
kiden iyy kaassaden.
24 Yesus illo mitaattiy iyyaa kide,
"inn sedep patandapishan,
matsaafa miilotanne irrot Mooha ufunaatta diittaayn maallan hinemu?
25 orr raaw et toxt ila sohanniyane,
qum hitaymiyya Mooha hin moontalle kiyyatep koddinan male,
amm orqeeddinanemu.
26 oot toxt ila sohattaat lamm,
hin Moohot apittanne huushsha ileeshsh muusess,
'antu Mooha aprihaamenne,
Mooha isaaqenne,
Mooha yayqoop;
' kid inn matsaafa muus qara inwaarusinnemu?
27 semmaalla Moohot,
Mooha orr kiyyat qapot male,
amm Mooha orr raawetemu.
inn lamm ikkaaness patan daften."
acac heikk qara tawu
(mati. 22,34-40; Luqaa. 10,25-28)
28 kollisampayya halitt ila nam shokku shiittaaddu dakay.
helpaan iyyat mitaattila Yesus iyyaan dikk koddaaddu akke,
Yesus kapop dehaad illo,
"acac se heikk qara tawu hekkanne?"
kid kaassad.
29 Yesus illo sedep kid immitaattiy,
"acac heikk qara tawu,
se 'israael!
dakayii,
moohaannu poldat,
Mooha shokkooh!
30 hedenno moohaayt poldaayt mutsuroott dahennenn,
nafseshayt dahennenn,
qaapayt dahennenn,
irroshayt dahennenn hoxsaadu!
' kidiyyu.
31 acac lakkiyyot,
se 'nam dahenn qum att ihoxsaannishshop hoxsaadu!
' kidiyyu kida.
acac,
acacadda hin lakk qara tawu amm hekiyyamu."
32 kollisampayt halittatenno asset Yesus kid,
"kollisampayt!
shaakket lelt;
'moohot shokkooh,
iyy pateeshsh Mooha pil amm hekiyyamu' kida lelaatt tsilloot.
33 semmaalla namat mutsurooyy dahennenn [nafseshayy dahennenn,]
qaapayy dahennenn,
irroshayy dahennenn Mooha hoxsaatta iyy fadusinnin;
settep lamm nam dahenn qum iyyat ihoxsaanniyyop hoxsaatta iyy fadusinnin.
laaqqaan doohiyanne dayy hepil Mooha dehassa qareell,
acacadda hin lakk lushatta tawa."
34 Yesus lamm kollisampayt halitt sett qalliqaapattan mitaattisaayy akk maalla,
"att amm daamum Mooha ketta hessekaattemu."
he ikkid.
sekkanneeshsh nam iyy kaassatta qim shokkooh naf amm hekiyamu.
kaassiyy se oot kristoosi dehaad
(mati. 22,41-46; Luqaa. 20,41-46)
35 helpaan Yesus man miilotate kollinniyyo sedep kid kaassad,
"kollisampayya muus,
ashshannass 'kristoos meet taawitpa.
' kidin?
36 taawit mashshayyess sinkuma laaffot miilotatenn,
'poldat,
poldaawoss,
hak antu olishshadaatt lukkaatt keli hedi kodinu,
miskittaawu qari laii.
' heikkid.
37 et taawit mashshayy 'pold' kidu iyy hembo,
ashshannass kristoos meetaayy kodda fottina?"
siip lekenno masmasuntann iyy qara dakayaalle kiyyan kida.
"kollisampayya halitt muus kela iilushatta"
(mati. 23,1-36; Luqaa. 20,45-47)
38 Yesus helpaan iyyat kollinniyyo asset kid,
"kollisampayya halitt hin uuwaat dedder uuwanniyy illo errall mimmitaatiyy,
kapiyaalle ikkim namat paanussa serka idehanninu fadiy qara illushadaa.
39 iyyaa man dinkam tallanno sheedda serka,
por hembantaatenno por serka akkatta hoxsaannin.
40 akkaatta maalla dinkamaddu derannin illo man iskatt se irishadaaddu qarin raawen tall damin.
semmaalla iyyaa qarass horat kaant quuramina."
dayy hiiyyaytetat
(Luqaa. 21,1-4)
41 Yesus saatsinet daayy man miilot minashsh laiyy illo siipanno saatsinet se qalli ashshann ikkim kodashshet kashiyan tooyaalle kiyy;
shorohotanno kodashshet lekit uqqalli kashin.
42 hiyyaytet shakk it irishadd qarin toyenno hedeyt illo santimet taamunet tinnax lakk,
sikkinnaap kishshu uqqalli kashsh.
43 Yesus lamm soolleshayy hemb illo sedep iyyaa kid,
"shaakketin inni lelin,
orr se are saatsinet sed qalli kodashshet kash,
qareell dahenn it tawnitt daatt,
hiyyaytet sed kida.
44 maana maalla,
orr shakkan dahenn shorokumaddu qareellaah dayyen.
it lamm hiiyyaytet kodditete qara hattisatta male iyyaan it qaftu dahin daatt."