Yesus allpaqisama man miilotat him
(mati. 24,1-2; Luqaa. 21,5-6)
13
1 helpaan Yesus man miilot talla sohattaalle kiyyo,
soolleshayy ila nam shokku,
"kollisampayt!
dakallaynenne manna hin,
ashshann iyaa sommumiyan,
are tooyii!"
heikid.
2 Yesus lamm,
"manna hin kakkaan akkikishshamu?
dakallayn dahenn alltiiqaminan,
daka daka qari dawam tiiqama male amm ulli lainamu."
kid immitaattiy.
dexema pold tureesh kann arsamaanne rakkot deyina
(mati. 24,3-14; Luqaa. 21,7-19)
3 helpaan Yesus man miilot mineeshsh utet ekertada qari laiye,
betsiroosenne,
yayqoopenne,
yewannisenne,
intiriyaas hawwass iyy kapop dehaaden illo,
4 "hin kat etanne koddinan?
lamm hin dahenn kodda dehaattaaddu maanaannin ishshaakinan?
intu innu lele."
kiden iyy kaassaden.
5 Yesus lamm sedep kid iyyaa mitaattiy,
"namat patinn inn dapususa tura illuushadaa.
6 orr lek,
'antu kristoos!
' kidinan mahhaawun deyinan,
orr lekenno patin dapusinninan.
7 et torat inn kapeesh kinnanniyu,
inn por sekanno ishaama tor dakayishane naha diiyyaa.
hin koddaaddu amm hatinamu,
hor muutaytot amm sanu hedehaademu.
8 siipat siip qarass,
daamumat daamum qarass sohannina;
por heikk ilassenno shilda hussatenne laaot koddina.
hin dahenn qum hirayta laashamunt haayat kida.
9 "innanno illuushadaa.
orrat horatass mooraallep inn dehanninan;
man dinkam tallassenno inn tolinan.
an minann peashisampayaanne daamada turop horat inn dehanninan.
sedenno ikkim maanyet ani koddintaness kida.
10 hin dahenn kodda tureeshsh lamm,
lel masmasunt siip husslah qara kiyyu dahenn lelama fadusinnin.
11 et inn qapan por horatatep inn dehaanniyane,
'maanan ishaaminna?
' kidan turqattaas inbaaquran.
helpaanette hin inn daasamiy ishaamaa;
maana maalla,
iyy ishaaminu laaffot miilot male,
amm innamu.
12 ankasanne inshar or tarpinnina daannina,
appaanno meetay toxtass tarpinnina daannina,
meeddanno lemmooddu qarass olshumin sohanninan ikanninan.
13 mahhaawu minann namat dahenn inn qar hittinnina.
hekoddu male,
nam hak muutaytaat duupattan kokkaad dinannina.
rakkot se yerusaalem qari deyintu
(mati. 24,15-28; Luqaa. 21,20-24)
14 et iyyaan nayq oshshiyya kodd por se iyyaa uila akkatta fadusisa diinniyyan ili ellan inn akkitane nam waarusinniyyu qallqaapadu!
helpaanette orr huss yihuta qalle kiyy utawa qarop allfeeladenii.
15 nam faattalle kiyyu man talla mehadda qeeddatta lahop lekkatta diiyyu.
16 nam ulalle kiyyonno,
uuwaat qeeddatta ikkanneesh mitaata diiyyu.
17 essete iskatt medda kardalle qapanne luukissotass,
pelawu!
18 hekoddu male ikkim hin helpa kashanate inkoddin dinkamadaa.
19 helpaanette baaquranne rakkot kaant Moohot husslah uumeeshsh hirite hak ammannet deya diitt,
ittureeshanno itap kishshu apure kodda diinnintu deyina.
20 Moohot lashshada hin allhummaisa diiy kid,
aynonno amm dina fottaayemu.
hekoddu male,
oot orr se pahisam maalla lashshada hin allhummaiyy.
21 "essete et aynonno,
'kristoos toare kiyy!
' shoke,
'todase kiyy!
' inni kidiyyo,
kap dakaya diiyyaa.
22 maana maalla,
eerpampaayaan,
'antu kristoos' kidiyyanne himampayya eerpampayya deyina.
et iyyaa fottamto,
orr se pahisam nafenno patin dapusisaass,
iyyaan nam shammusinniyanne ishaak erkanninan.
23 toare turassin qattiy inn lel,
sedeeshsh illuushadaa.
dexema Yesus kristoos
(mati. 24,29-31; Luqaa. 21,25-28)
24 "helpaanette,
rakkot sett kanna,
lashsh poorinnanninta,
lehaanno amm attumashayy akkinninamu;
25 iskaanno moontalle all yeinan,
irrampayya moontatenno shildinan.
26 helpaanette meet nam irrot kaantenne serkan urrashshetin deyiyyo orrat iyy akkinan.
27 iyyat hitaymiyyoyyanno hitina;
iyyaanno dind afureeshsh,
muutayta hussateshsh hak muutayta moontatess orr se iyyin pahisam orqudiqapinan.
paahnat sola peleset
(mati. 24,32-35; Luqaa. 21,29-33)
28 "paahnat qoyr peleset qara kollaa.
helpaan haarraayy soliyanenne lappa qara mulmuliyane,
essete helpa pon dehaataaddu ufunaannikishshan. a
29 settep lamm et hin dahenn koddiyan inn akkishshane,
helpaan meet nam uqqalli deyinu altatalle dehaattaaddu ufnaadaa.
30 shaakketin inni lelin,
hak hin dahenn koddinaness dalashot hin amm tarpintamu.
31 moontanne huss tarpinan;
lelaawu lamm amm tarpinamu."
dexema pold aynonno amm heupamu
(mati. 24,36-44)
32 "oot lashsh settetenne helpaanet appa pateeshsh hitaymiyya moontalletenno koddo,
meetanno koddo,
nam upu amm hekiyamu.
33 helpaan etanne ikkim koddinan amm heufutanemo,
dikkisadaa illuushadaa.
34 sedenno nam manayy alldiiyy illo huss pilap aan paahnaannin.
nam settenno aylammooyyass shokkushokkotaddo kaadum erkama dayy.
lushampaytanno ikkim qiminu lushinu acac.
35 semmaalla,
appa man helpaan iyyat uqqalli mitaattiyu amm heuftanemu,
qimaa illuushadaa.
sapapaass uldatayya kela,
shokke otant awaddatate,
shokke helpaan lukkalot iixiiyyo,
shokke etikel parrashot kela deyina koddinan.
36 inn peotalle kishshane paisa illo inn akka tura,
qimaa kokkaadaa.
37 qum antu inni lelep,
orr shakkanassenno dahenn,
'qimaa luushadaa!
' henkidin."