sulat op Yesus qari suladen
(mati. 26,1-5; Luqaa. 22,1-2; yewa. 11,45-53)
14
1 orr ayhutaatess serkila faasikaatenne heka laqqootat lashsh lakk hatte;
kaadayya suukamma man Moohaatenne kollisampayya halitt muus paana iyyaa yesusin qapnan illo ikanninaness mala dawattaalle kiyyan.
2 hekoddu male,
"ikkim siipat orrqarass insohanniness,
lashsh serkila qari kodda amm fadusinnishshamu" hekiden.
iskattet se Yesus shittotin roopit
(mati. 26,6-13; yewa. 12,1-8)
3 Yesus pitaaniya man simoon se turin payloodete kiyy.
helpaan iyyat dama dama laiye,
iskattet shakk fashkot daka se alpastsiros kidamiyyu ila soorumant,
shittot somm nartoos kidamishshu,
heriyatidd tsorin kishshonn,
deyt,
fashkot settenno pappaqitt illo shittot se mashsh Yesus qari tiiqit.
4 orr se ulla kiyyu ila shakkanaddu asset kiden jiiaden,
"shittot hin maanaass aypoti allpatin?
5 it tinaaret tseet halpatt qareell kashamin illo kodashshet hin hiyayya daassamaanemu?"
he oll kikkiden illo iskattet se tuuhen.
6 Yesus lamm asset kid,
"alldiiyyaa!
maanaass it rakusinnin?
it anass iyyaan dikk erkatt.
7 hiiyyaya helpa mitt inn olle kiyyaanninane,
helpa inn hiintane,
iyyaa qarqaara fottihintan;
antu lamm amm helpa mitt inn olle kiyyannihinamu.
8 iskattet hin iyyaan it fottitt hexerkatt.
ikkim mookaawu koddintoss tur qattitt dakinshawu shittootin roopit.
9 shaakketin inni lelin,
husslah qara por lel masmasunt sed ulli lelamiyyo dahenn,
hin it erkatt lamm itin qaapattaass lelaminan.
yihutot Yesus tarpisa daattaass sen
(mati. 26,14-16; Luqaa. 22,3-6)
10 soolleshayy hundann lakk ila yihuta asqorootishsh kidamiyyu,
Yesus tarpisa daattaass kaadayya suukamma kapop aan.
11 helpaan iyyaa sed dakayene,
hemasmasen illo kodashshet idaatta iyy dukayen.
iyyat illo Yesus tarpisa daattaass helpa dikk akkatta fada hir.
Yesus eetot faasikaat soolleshayy olle dam
(mati. 26,17-25; Luqaa. 22,7-14;21-23; yewa. 13,21-30)
12 lashsh se op laah faasika qaliyane,
serkila laaqqot lashsh hiraytaate,
soolleshiyy Yesus kapop dehaaden illo,
"eetot faasika damaass ikkimin aylop anninnu hedi dikkinninnoss fadin?"
kiden kaassaden.
13 iyyat illoo soolleshayy ila nam lakkess sedep kid hit,
"saparaallep aanaa illo nam harsan haq haiyy akkintane.
iyy kanni ooraa;
14 illo man se iyyat ullop kaliyop aanaa illo appa man settetess,
'kollisampayt,
por antu soolleshawu olle eetot faasika ulli daminu,
por kessumot ull haysanniyu ahayla?
hedi kidin' iyy kidaa.
15 iyyanno erra faattalle lak pald,
ulli afam dikkisam inni akkinnina,
ulli innu dikkiyyaa."
16 soolleshayy lakkenno ulla sohaden saparaallep aanen illo heikk qum se Yesus iyyaa lel qari kodden iyyaa akken illo eetot faasika sett ulli dikkiyen.
17 helpaan lashsh ponnaattekuless,
Yesus soolleshayy hundann lakk olle dey.
18 helpaan iyyaa eetot damiyyane Yesus,
"shaakketin inni lelin,
inn ila ishokku se ammann an olle eetot damaalle kiyyu an tarpinnina daannina" hekid.
19 iyyaa lamm ishaamayyin dappisaann,
"an koddinanemu?"
kidan shokkushokkotaddo iyy kakkaassaden.
20 iyyat illo sedep iyyaa kid,
"inn hundann lakk ila nam shokku,
iyy ammann an olle shomb sed qalle dama qeeddanniyyu kida.
21 meet nam qum it ootaayy tsaafant qarass toyina;
hekoddu male,
nam se meet nam tarpinniyyu daanniyoss pelawu!
nam hin et dalatta diiy kid iyyi hedikk.
eetot poldat
(mati. 26,26-30; Luqaa. 22,14-20; 1 qoro. 11,23-25)
22 iyyaa dama damiyyane,
Yesus laaqqot qeedd,
Mooha aypsad,
qall mooss illo soolleshayyess,
"hindaa,
hin sohaawu" kid illo iyyaa day.
23 walleetanno qeedd,
Mooha aypisad,
iyyaa dayy.
iyyaa illo dahenn walleet se qalle uken.
24 iyyat lamm sedep iyyaa kid,
"hin diikaawu,
heka kaka,
iyy se orri lekk maalla tiiqaminu.
25 shaakketin inni lelin,
hakin daamum Mooha qalle woynet awshittet ukkinoss,
woynet sed amm lakkiyya ukinhinamu."
26 helpaan iyyaa laalet laaladen kanna utet ekertada qarop fayyaden.
Yesus betsiroos ikkim iyy marmannu tureeshsh ulli lel
(mati. 26,31-35; Luqaa. 22,31-34; yewa. 13,36-38)
27 Yesus soolleshayyess kide,
"shinkaytinin dawina,
ikannina;
helemmaanno purjaajinan' hekidant tsaafamte;
dahetaynen all an diinnintan;
28 hekoddu male,
etin toxt ila sohado kelilaapin inn turin qattina annina."
29 essete betsiroos,
"et orr pil dahenn all hed diiyyan nafe,
amm antu all hed diinninhinamu" hekid immitaattiy.
30 Yesus illo,
"shaakketin hedi lelin,
aww awadd lukkalot lakkin iia turann,
halpattann an marmannint."
ikkid.
31 betsiroos lamm,
"et hed olle toya naf fadusinnishshu koddo toyinhina male,
amm hed marmanninhinamu!"
hekid qimiyy lell.
soollet se hattenno dahenn sedep kiden.
Yesus ketesemaaness dinkamad
(mati. 26,36-46; Luqaa. 22,39-46)
32 sekkanna por se ketesemaan kidamiyyop aanen.
Yesus illo soolleshayyess,
"antu ayteeshin annina dinkamannina inn ari laxa" kid.
33 betsiroosenne yayqoopenne yewannisennenno iiolle aan,
ulla lamm ikkaan dappisaanne baaquura hir;
34 illo,
"mutsuraawu dappet kaanten toxt qarin paen;
ari ella qimaa lushadaa" iyyaa kid.
35 iyyaa kapa jawshayi sekaad aan,
hussalli sunk illo,
et fottaminto,
helpa rakkot sett ikkim iyy qara alltarpintu dinkamad;
36 illo sedep kid,
"appaawollo!
dahenn hedess fottamiyane,
waallet rakkot sed an qara allsekayyii;
sekkapa qum hasaayt qari koddu male,
hasaawu kodda diiyyu."
37 helpaan iyyat soolleshayy halpatt se kapop mitaat deye,
hepeaden iyyat akk illo,
"simoone!
heppeattemu?
amm saatet shakkaah nafess qima lushatta hefottitemupa"?
kid betsiroos kaassad.
38 "ekkawsamaallep kala tura qimaa dinkamadaa.
laaffot shaakketass hedikkisatt,
soha lamm tashshampayya."
39 lakkiyassenno aan illo dinkam se iyyat tureeshsh dinkamad lakkiyya dinkamad.
40 ammannenno helpaan iyyat qaraashsh mitaat deye,
oot peot indaaddu tashshusitt maalla,
iyyaa pead qarass pai.
iyyaa illo akkan iyyaa immitaatinninan naf amm heupanemu.
41 halpattiyaassenno iyyaa kapop dey illo,
"sanu peot ila kishshan haysannimu?
sedeeshsh hekayt!
saatetin hepaitt!
toare,
meet nam hark juppampayya qalless tarpina daassamina.
42 sohadaa innu annu!
toare hin an tarpinninu daanninu,
hedehaad!"
iyyaa kid.
qapama Yesus
(mati. 26,47-56; Luqaa. 22,47-53; yewa. 18,3-12)
43 esseteeh helpaan Yesus sed ishaama qara kiyyo,
yihuta hin soolleshayy hundann lakk ila iyy shokku kodd dey;
iyy ollenno orr lek pillawanne holholla qapad kiyy.
iyyaanno kaadayya suukammaatenne kollisampayya halittatenne qimaayya kapa hitamen.
44 yihuta se iyy tarpinniyyu daanniyonno orr settess,
"iyy inn qapintan,
se antu dinkiyu kida;
iyy qimiyaa qapaa illo inxaanaa."
ikkid ishaak iyyaa dayy;
45 esseteeh dey,
Yesus kapop dehaad illo,
"kollisampayt!"
kid dink.
46 sekanna orr hin Yesus qapen.
47 orr se ulli ell ila ishshokku pillaw pushad illo erhayt suuka suukamma qara lapitt quur.
48 Yesus lamm sedep iyyaa kid,
"afa ewwa qapa deyishanep an qapa pillawanne holholt qapatten deetenemu?
49 lashshmin antu man miilot talla kollinniyyu,
inn olle kiyyo,
amm an heqqaftenemu.
hekoddu male,
hin maalla kodden,
lel matsaafa miilot ikkim kaysaanninoss kida."
50 soolleshayyenno dahenn all iyy diiyen feeladen.
51 hekoddu male,
kolkolt dank patt kiyyu halp ipati qapad Yesus kanni annin kida.
helpaan orr hin iyy qapene,
52 halp settenno allkash illo dank patt feelad passad.
arfayta turop Yesus dehayyen
(mati. 26,57-68; Luqaa. 22,54-55; 22,63-71; yewa. 18,13-14; 18,19-24) a
53 iyy lamm yesusenn man suuka suukammaatep aanen.
ulla kaadayya suukammaatenne,
qimaayyaanne kollisampayya halitt dahenn orqudi qapamen.
54 betsiroos lamm hak altat man suuka suukammaatess por sekaashsh Yesus kanni aan;
ullop luum,
erhama olle apitt kapi laiyy aasannin.
55 kaadayya suukammaatenne arfayta dahenn Yesus qari horat toxt quurusisaas maanyet fadaalle kiyyan.
hekoddu male,
amm heakkaadenemu.
56 orr lek eerpaass iyy qari maanyumen.
hekoddu male maanyetumaaddu orr patdap.
57 orr shakkan hesohaden illo sedep kidan eerpan iyy qari maanyetumen,
58 " 'antu man miilot sed,
se hark namatin diham,
allin paqinnina illo lashsh halpattalli hepil iyy hark namatin dihama diyy dihina.
' kidiyyu ishaamiyyo hendakayn."
hekiden
59 sedep hekiden male maanyetumaaddu orr pat dap.
60 sekkanna suuka suukammaatenno otanshaddu ilass ell illo,
"akkan shokkooh naf mitaatinnintomu?
orr hin kisset iyyaa hed qari dehanniyyan maaniya kat?"
kid Yesus kaassad.
61 Yesus lamm rux kid male,
amm akkan hemitaattiyemu.
suuka suukammaatenno,
"att kristoos,
meet Mooha se aypisametemu kat?"
hekid qaroor iyy kaassad.
62 Yesus illo,
"heyye,
anpa;
meet nam Mooha se irrot qapu kapa miskitt qari lae akkihhintan!
settep lamm iyyat urrashshet moontalletin qareett mitaatiyyu deyiyyo akkihintan."
hekid.
63 suuka suukammaatenno miiran uuwaatayy ipata kaai illo,
"maanyet pilt amm innu fadusinnishshamu?
64 toare,
lel otitta hin iyyat Mooha qari leliyyu hedakaytenpa.
kat maana inn paahnaannin?"
kid kaassad.
iyyaa illo dahenn kapa shokkoohann,
"toxt iyy fadusinnin!"
kiden qari woken.
65 orr shakkanaddu ambushsh iyy qari shuhatta hiren,
minanno marin illo,
"ikkim aynot hed daw him innu himii!"
kidan harkaaddu jiipannin dawin.
erhamaanno dawannishann iyyin aanen.
betsiroos Yesus marmad
(mati. 26,69-75; Luqaa. 22,56-62; yewa. 18,15-18;25-27)
66 helpaan betsiroos man suuka suukamma alta kiyyo,
iskatt erhama suuka suukamma koddit ila it shakk dey,
67 illo betsiroos apitt aasanniyyo akkit illisatt tooyit illo,
"hedenno Yesus nasiretshsh,
olle kishshipa."
ikkidit.
68 iyyat lamm,
"amm antu henxupamu;
hin att kidishshonno amm an kaliyanemu."
hekid marmad.
illo haarratalleesh sohade;
lukkalota iix.
69 erhaytet settenno betsiroos akkit illo orr se ulli elless,
"sedenno iyyaa ila ishokkupa!"
kidit lakkiyya ishaamitt.
70 iyyat lamm qaroor marmad.
iyyat jawhayy olade lamm,
orr ulli ell betsiroosess,
"oot att kelilishsh koddit maalla,
shaakketass hedenno iyyaa ila iyy shokku!"
he iyyi kiden.
71 iyyanno lamm,
"nam sed inn kidishan amm antu iyy henxupamu!"
hekid illo ippishaanne ashkatta hir.
72 esseteeh lukkalot lakkiyya iixi.
betsiroosenno lel se Yesus kide,
"lukkalot lakkin iia male,
halpattann an marmanninta."
ikkid iyy mashaoor,
iyyat illo qaydid pooy.