bilaatsoos turop Yesus dehaayen
(mati. 27,1-2;11-14; Luqaa. 23,1-5; yewa. 18,28-38)
15
1 etikel tuqqan kaadayya suukammaatenne qimaayyaanne kollisampayya halittatenne arfayta dahenn suladen.
sekanna kuless Yesus hidden inxaanen illo bilaatsoosi tarpiyen dayyen.
2 bilaatsoos illo,
"att Daam ayhutetatemu?"
kid iyy kaassad.
Yesus lamm,
"qum se att kiditepa" ikkid.
3 kaadayya suukamma iyyaan lekenn Yesus kasasin.
4 semmaalla bilaatsoos lakkiyaass sedep kid iyy kaassad,
"iyyaan lekin hed kasasaaddu,
tooyii!
kat iqara mitaatinnitotemu?"
5 hak bilaatsoos shammanninoss,
ammannenno Yesus shokkooh nafenn amm iyyi hemitaattiyemu.
Yesus qarass horet toxtat quuren
(mati. 27,15-26; Luqaa. 23,13-25; yewa. 18,39-40; 19,1-16)
6 bilaatsoos parpar kapa helpa serkila fasikaate orr hidam ila ikkim nam shokku iyyaa fursaminu kaassanniyane all iyyaa furinnin kida.
7 helpaanette orr peashshila daamum heka huss qari sohad,
nam ikayy,
man hidanatep kal kiyy.
iyyaa ilanno iyy parpaan kidamiyyu kiyy.
8 siipanno bilaatsoos kapop dehaaden illo qum iyyaa kollen mitt ikkim iyyaa kodinu iyy kaassaden.
9 iyyat illo,
"Daam ayhuta inni furisa fadikkishshanemu kat?"
kid iyyaa mitaattiyy.
10 iyyat maalla sedep kidenno,
kaadayya suukamma Yesus tarpisa daattaaddu,
maxashannumin koddaayy oot iyyat upu maalla kida.
11 kaadayya suukamma lamm ikkim,
"poraayy ilass parpaan innu furisamu!"
kidinan bilaatsoos kaassanninaness orr sesseyiyen.
12 bilaatsoos illo,
"kat se inn Daam ayhuta kidishshan ashshannin kodina?"
hekid iyyaa kaassad.
13 iyyaa lamm,
"alrahhii!"
kiden qarooren ullupen.
14 bilaatsoos illo,
"maanaasse?
nayqunt iyyat erkayy maaniyya?"
iyyaa kid.
iyyaa lamm,
"alrahhii!"
kiden lekiyen ullupen.
15 bilaatsoos illo orr se masmasusisa maalla kid parpaan furiy all iyyaa hayy;
illo Yesus litsootin kaypusiy kanna ikkim rahhaminu tarpiyy dayy.
wottaattarat Yesus qarass beejjiyaden
(mati. 27,27-31; yewa. 19,2-3)
16 wottaattarat yesusenn man peashisampayt altop aanen,
wottattar hatenno dahenn hemben;
17 uuwaat roomatenno uuwashiyen;
qoyqoyt quddetatenno maren,
mashshayy qari ihaayen illo,
18 "Daam ayhutatello!
andot hedi kodditu!"
kidin qari beejjiyattan iyyi shoomannin.
19 halittannenno mashshayy qara daddawin,
ambushshanno qari shuhannin illo qara beejjiyattannenno turi kilpin ishshoomannin.
20 helpaan iyyaa qara beejjiyaden kanna,
uuwaat se roomat pata allfuriyen,
illo uuwaatayy uuwashshiyen alrahha inxaanen.
rahhama Yesus
(mati. 27,32-44; Luqaa. 23,26-43; yewa. 19,17-27)
21 helpaan iyyaa anniyyane,
simoon qereenishsh,
appa alekisantirosenne appa rufoos,
paataalleeshsh saparaallep kaliyyo akken illo ikkim masqalet se Yesus uqqari rahhaminu hainninu ikkoomen.
22 sekanna yesusenn por se kolkoota kidamiyop aanen.
furilaayyanno "hilayyat mashsh" kida.
23 ikkim ukot woynet it suukaan kerpet kidamiyin lahant ukinu iddayyen;
iyyat lamm amm heqeeddademu.
24 sekkanna herahhen;
uuwashayyenno aynu,
aynu qeeddannina kidan hitsa qari kashaden olliqooten.
25 helpaan iyyaa Yesus rahhiyane etikel saatet halpatt kida.
26 dapat iyyat inkasasam ufnaytisaass tsaafa,
"Daam ayhuta" kidiyy tsaafam.
27 iYy olle ewwa lakken deyen,
shokku miskkittaayy qarass,
shokku pihitoshayy qari rahhen. [
28 sed minan him se,
"nayqisampayya olle diham" kidiyyu kaysaad.]a
29 orr ullin tarpiyyonno mashshaddu kilinkilisannin otin illo,
"hed se man miilot paqinnin,
lashsh halpatt dihiyyu!
30 intu ammann masqalet qara lekkadu illo idiniye!!"
kidan qara beejjiyaden"
31 paana sedenn kaadayya suukammaatenne kollisampayya halitt mashshmashshaddoss sedep olli kikkiden iyy qari deffeeqa lelen,
"orr pil hediniyy,
mashshayy lamm amm iddinisa fottiyyamu!
32 et iyyat kristoos,
Daam israaelet koddo,
intu ammann masqalet qara lekkadu,
innonno akkinu illo iyyin amaaninna!"
kiden.
orr se iyy olle rahhamenno iyy otin kida.
toxt Yesus
(mati. 27,45-56; Luqaa. 23,44-49; yewa. 19,28-30)
33 kallap saatet leheeshsh haka saatet tsinqotatess husslah qara dahenn poorinnat koddit.
34 helpaan it saatet tsinqot koddite,
Yesus,
"elohe,
elohe!
lama sepaqtani?"
hekid illo nass kaanin ullup.
furila lel settetenno,
"moohaawo,
moohaawo!
maanaass all an diitte?"
kida.
35 helpaan orr hin ull elli sed dakayene,
iyyaa ila orr shokku "toayte eliyaas himampayt hembin!"
hekiden.
36 iyyaa ila iyy shokku hefeel,
jarayt woynet nuuffan innaakk,
ikkim ukkinu shompoqqot qari kod,
Yesus kapi qap illo,
"ellaa,
intu eliyaas deya iyy lekkashshisaayyin tooyina" kid.
37 sekanna Yesus nass kaanenn ullup,
nafseshiyy qalle sohatt.
38 kaarrata man miilotatenno erraat haka lahat lakki qall kaaxam.
39 helpaan sinkitt tseet hin masqalet minaashsh ell,
yesuss ikkim ashshann toy akke,
"nam hin shaakketass meet Moohaat!"
hekid.
iskatt kolkota qara kiyy
(mati. 27,55-56; yewa. 19,25-27)
40 iskatt karaddu iyyaan por sekaashsh tooyyiyyanno ulla kiyyan kid;
iyyaa ila maariyaam mektelishshetanne maariyaam inkot yayqoop se tinnaxatenne hekat yoosanne ,
salomenno ulla kiyyan.
41 iyyaa iyyaan helpaan Yesus kelila kiyyo iyy kanni anniyanne erkama iyyi erkanniy kida.
settep lamm iskatt pil iyyaan lek yerusaalemep Yesus olle deyy kiyy.
mookama Yesus
(mati. 27,57-61; Luqaa. 23,50-56; yewa. 19,38-42)
42 helpaan lashsh ponnaatte oot it helpa dikkisatta sampata ayhuta koddit maalla,
43 essete arfayta ila iyy shokku yoosef kidamiyyu,
iyy serkisam,
armaatishsh deyy.
iyyat nam daamum Mooha irraxatetin lushanniyyu kida.
naha male bilaatsoos kapop dehaad illo dakint Yesus ikkim iyy daassamintu dinkamad.
44 bilaatsoos lamm,
"ashshann sedep deesso esseteeh toy?"
hekid shammad.
sinikitt tseet settetenno hembusiyy,
"shaakketass iyyat toyeeshsh heolademu?"
kid kaassad.
45 helpaan iyyat toxt Yesus sinikitt tseet sett qara dakayy kanna,
dakinshayy ikkim qeeddannos yoosefi dayy.
46 yoosef waalt qahan pidd illo pukka Yesus masqalet qara lekkiyy dikkiyy illo poosaan shilk ila qoshamalli haay.
daka kaanenno kapop katt illo poosaan kapin duh.
47 essete maariyaam mektelishshetanne maariyaam inkot yoosa,
aylas ikkim Yesus mooken tooya qara kiyyan.