Patamu so Meka-adwa a Paggumwang i Afu Jesus
2
Wawwayi, patamu so paggumwang i Afutam a Jesu Kristo anneno pammu-ammungantam a manafung sikwana, makilelawit kami sikwayu 2 a ammena siddarat a makungkur yo nonot diyaw onnu maburung nu maammuwan diyaw a dinumatangngin ino aw i Afu. Ammeyu kuruwan iyaw maski sapitan kepay yo korwan ira a inay e nepakaammuweno Espiritu i Dios, onnu sinapitmi onnu neturakmi. 3 Amme kayu mappailloku sikwara si maski sanna, se iyan a aw e ammenana gumumwang makiyad si dumatang ino sapi-sapitan a tiyempu na nelalot ingke a parrebeldeno tolayera sike Dios anna pappaddeno Sinaliwat a Tolay, antu yo meyannung si infiyernu.a 4 Iyatannangngeno baggina ingkepay anna kapakwannaneno amminan a mebilang a dios anna dayawan na tolayera. Mattuttud baggina tapenu mattangngal so Templu i Dios anna mappaammu-ammu a baggina i Dios. 5 Ammeyu kad madandam a netunduk sikwayu iyawera a kiya-kiyan sin anaak kepay sikwayu? 6 Anna ammuyu a ana maffuwad sitan a tolay takesi mappaddana baggina so tiyempu a pinili i Dios. 7 Se yo paimad a pakapangwa na maral e maangwa-angwen sitoye sito talubaggan. Udde sigga-imad iyaw makiyad si yo mattulya-tulyat e ammenana maari. 8 Anneno Sinaliwat a Tolay e mappaddana antu darallannana i Afu Jesus baggina si dundunnera. Makasinsilaw a dumatangnga i Afu Jesus e iyanna yo tamfut na Sinaliwat a Tolay. 9 Na paggumwang na Sinaliwat a Tolay e meantuna nu kasanna yo akakwan i Satanas. Usanna amminan a pakapangwa, pemunuwan ira, masiri a milagruwera, 10 anna kada garannud a maral a pangilloku a millaw so inoyera a nawawan. Nawawan ira gumafu se nammayera a manggam si kagakkuruwan anna mesalak ira. 11 Nabu neyannutna i Dios a maillokuwera anna kuruwandeno siri, 12 takesi amminan a amme mangurug si kagakkuruwan udde nanggam a mangwa si maral e makastiguwanna.Na Piniliyera i Dios Tapenu Matabbut
13 Wawwayiyera a iddu-iddukan i Afu, maumid kami nad a mappabalat sike Dios para sikwayu, gumafu se pinili nakayu i Dios so palungu a tolayera tapenu matabbut. Natabbut kayu megafu si Espiritu i Dios a manolay kayu a awan pakaliwatan anna megafu si angngurug diyaw si kagakkuruwan. 14 Pinili nakayu i Dios megafu si angngurug diyaw si Mapiya a Baga meafu sike Jesu Kristo a nebalaggomi sikwayu takesi makiballay kayu so kadayawan i Afutam a Jesu Kristo.
15 Kunnantu, wawwayi, ibali-balin diyaw a paddattan a kuruwan ino gakkurug a tunturu a netunturumi sikwayu mapasapit onnu si turakmi.
16 Sitoye, idasalmi a i Afutam a Jesu Kristo ingkepay anna i Amatam a Dios a nidduk sikwatam anna megafu si simpatna antu yo nangiyadda sikwatam si manayun a bannay anna mapiya a inanama. 17 Idasalmi a i Afutam a Jesu Kristo ingkepay anna i Amatam a Dios e bannayandeno nakam diyaw anna patuyaggan dakayu si kada mapiya a akwan diyaw anna sapitan diyaw.