Na Meka-adwa a Turak i Pablo so
Taga-Tesalonica
1
Ikkami a tallu, da Pablo, Silas anni Timoteo e matturak sikwayu a minangikkurug ira na taga-Tesalonica a meyannung sike Dios Ama anni Afu Jesu Kristo. 2 Idasalmi sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.Na Appabala-balat
3 Wawwayi, maumid kami nad a mappabalat sike Dios gumafu so inangwayu. Fustu lamang a akwammi iyaw gumafu se yo angngurug diyaw e mattuya-tuyag anneno idduk diyaw si siggattatan e madagga-daggan. 4 Nabu, ipannokalmi kayu so korwan a grupu na minangikkurug ira i Jesu Kristo so korwan a luga-lugar gumafu si pangiyattam diyaw anna pangitaddag diyaw si angngurug si amminan a pallupe-lupet anna paddiriyat diyaw.
Na Annunut so Pannuli i Kristo
5 Amminan iyawera a inangwayu si amminan a pallupe-lupet anna paddiriyat diyaw e antu yo pakaitan a fustu i Dios so pannunutna. Nabu, ipakaammunana i Dios a mepangngat kayu a tolenera so pattangngalanna gumafu se yo passufriyu e maipegafu si pattangngalanna. 6 Se gakkurug a fustu i Dios a padiyatanna inoyera a nappadiyat sikwayu. 7 Anna ikkayu a naburungan, pimemmakannaneno paddiriyat diyaw anna kunnapay sikwami nanu dumassagnga i Afu Jesus a maggabwat si langit bulunneno makapangwa a anghelnera. 8 Dumatangnga baggina si gumalla-gallayaf a afuy a kastiguwan inoyera a mammay a mangammu sike Dios anna inoyera a mammay a mangarasaw so Mapiya a Baga meafu sike Afutam a Jesu Kristo. 9 Makastiguwan irana si manayun a akkadaral anna mesina irana sike Afu Jesu Kristo anna so kadayawan ino pakapangwana. 10 Medemmuna iyaw so aw a pannulina takesi mapadayawanna baggina megafu so tolenera anna amminan a minangikkurug ira e malaggatna gumafu se nangurug kayu meafu so netundumi sikwayu. 11 Nabu, maumid kami a maddasal a duffunan nakayu i Diostam a manolay si mapiya si panggammanna sin pinili nakayu. Anna megafu si pakapangwana makwayu amminan a mapiya a gakkad diyaw anna aggangwayuwera gumafu si angngurug diyaw. 12 Idasalmi iyaw takesi mapadayawanneno ngan i Afu Jesus megafu sikwayu anna mapadayawang kayuna megafu sikwana. Mededemmu iyaw gumafu si simpat i Dios anni Afu Jesu Kristo.