Narang i Pablo si Dasal
3
Kauddiyanna, wawwayi, idasallan dakami takesi yo sapit i Afu e malan a mebalaggawna so naddadaruma a luga-lugar anna inoyera a makadingngag e dayawandana kakunna yo inangwayu. 2 Idasal diyaw pay a mesalak kami so mapara-paral anna maral a tolayera, se bakkan amminan e mangurug sike Jesus. 3 Udde matalakkan i Afu Jesus. Patuyaggannana anna imurannana kayu sike Satanas. 4 Dokal yo talakmi sike Afu Jesus patamu sikwayu a akakwan diyaweno nedundummi sikwayu anna ibali-balin diyawna a akwan. 5 Idasalmi sike Afutam a Jesus a igiyana yo nakam diyaw si idduk i Dios anneno mapasensiya a pàattam a naggabwat sike Kristo.Na Pappalán metulyat si Kinakayang
6 Iddu-iddukammi a wawwayi, megafu si pakandama i Afutam a Jesu Kristo, idundummi sikwayu a aroyuwan diyaweno makayang a minangikkurug ira anna ammera tuntulan ino tunturu a nakalakammura sikwami. 7 Se ammuyu a maawag a tuntulan dakami se amme kami makayang sin bulummi kayu. 8 Awan naarasomi maski sanna a maakkan a naggabwat sikwayu a ammemi napagan udde nattarabafu kami si gafi anna aw takesi amme kami a makadammat si yanya sikwayu. 9 Inangwami iyaw maski nu ana pakandamami a marang si maawagmi sikwayu takesi damayu a tuntulan yo akwammi. 10 Se maski sin bulummi kayu, nedundummi sikwayu a seanya yo ammena mattarabafu e ammena mangngan. 11 Sinapitmi iyaw sikwayu se nadingngagmi a ana korwan sikwayu a makayang mattarabafu anna makimete kayu so akkatolayeno korwan a tolayera. 12 Dundunammiyera anna tinabarangammiyera megafu si pakandama i Afutam a Jesu Kristo a neyaddana sikwatam a manolayera si mapiya anna mattarabafuwera si pakkatolera ingkepay. 13 Wawwayik, amme kayu matappag a mangwa-angwa si mapiya.
14 Nu wara ammena mangurug so sinapitmi sitaw a turak, umaroyu kayu sikwara takesi mapaatallannera. 15 Ammeyuwera ibilang a kapakwayu udde palanán diyawera a kakunna wawwayiyu.
Na Panguddi a Akkidyot i Pablo
16 Idasalku a i Afu na piya ingkepay e mangadda si piya so tolenera si amminan a tiyempu si amminan a pakaangwan. Na piya i Afu Jesus e ana sikwayu amminan.