Almaami'en e Lewinkooɓe
12
1 Inan innɗe almaami'en e Lewinkooɓe ƴuurdinɓe e Sorobabel ɓii Seyaltiyel e Yesuwa ley maccangaaku:Saraaya e Yeremiya e Isira
2 e Amaariya e Maaluk e Haatus
3 e Sekaniya e Rehum e Merimoot
4 e Iddo e Ginetoy e Abiya
5 e Miyamin e Ma'aadiya e Bilga
6 e Semaya e Yooyarib e Yedaya
7 e Salluu e Aamok e Hilkiya e Yedaya.
Kamɓe ngoni mawɓe almaami'en e sakiraaɓe muɓɓen ley jamaanu Yesuwa.
8 Ley Lewinkooɓe: Yesuwa e Binuuyi e Kadamiyel e Seraabiya e Yahuuda e Mattaaniya e sakiraaɓe muɓɓen ngoni ardiiɓe jimi yettugol Laamɗo. 9 Sakiraaɓe maɓɓe: Bakbukiya e Unni ɓeen ngoni darotooɓe na kucciti e maɓɓe wakkati ɓe njimata ndeen.
10 Yesuwa rimi Yoyaakim, Yoyaakim rimi Eliyaasib, Eliyaasib rimi Yooyad, 11 Yooyad rimi Yonatan, Yonatan rimi Yadduwa.
12 Inan innɗe almaami'en ardiiɓe cuuɗi ley jamaanu Yoyaakim:
Ley suudu Saraaya, wo Miraaya,
Ley suudu Yeremiya, wo Hananiya
13 Ley suudu Isira, wo Meesullam,
Ley suudu Amaariya, wo Yahuuhanan,
14 Ley suudu Meliki, wo Yonatan,
Ley suudu Sabaniiya, wo Yuusufi,
15 Ley suudu Haarim, wo Adna,
Ley suudu Maraayot, wo Helkay,
16 Ley suudu Iddo, wo Jakariya,
Ley suudu Gineton, wo Meesullam,
17 Ley suudu Abiya, wo Jikiri,
Ley suudu Miniyamin e suudu Mo'aadiya, wo Piltay,
18 Ley suudu Bilga, wo Sammuwa,
Ley suudu Semaya, wo Yonatan,
19 Ley suudu Yooyarib, wo Matenay,
Ley suudu Yedaya, wo Ujji,
20 Ley suudu Salluu, wo Kalay,
Ley suudu Aamok, wo Eber,
21 Ley suudu Hilkiya, wo Hasaabiya,
Ley suudu Yedaya, wo Nataanel.
22 Gilla jamaanu Eliyaasib e Yooyad e Yohanan, e Yadduwa faa hewti jamaanu Daariyus kaananke Persi, inɗe mawɓe cuuɗi Lewinkooɓe e almaami'en ina mbinndee. 23 Inɗe mawɓe ƴuwdi Lewi keddii na mbinndee ley dewtere kabaaruuji laamu faa hewti jamaanu Yohanan ɓii Eliyaasib.
24 Mawɓe Lewinkooɓe: Hasaabiya e Seraabiya e Yesuwa ɓii Kadamiyel e sakiraaɓe maɓɓe ina ndarii ina kucciti e maɓɓe fodde e pecce muɓɓen, ina njima jimi manooje e jettooje Laamɗo hono no kaananke Daawda, maccuɗo Laamɗo wiirunoo noon.
25 Reenooɓe dammbuɗe: Mattaaniya e Bakbukiya e Obadiya e Meesullam e Talmoon e Aakubu; ɓeen ndeenataa cuuɗi desirɗi nguurey gonɗi ɗakkol dammbuɗe Suudu Dewal Laamɗo. 26 Kamɓe ndaaranta gollal ngaal ley jamaanu Yoyaakim almaami ɓii Yesuwa taan Yoosadak e jamaanu Nehemiya goforneer e almaami Isira jannginoowo Tawreeta.
No iidi senugol kokuwol huɓeere Urusaliima waɗiraa
27 Wakkati iidi senugol kokuwol piiliingol Urusaliima waɗetenoo ndeen, Lewinkooɓe noddaa to ngoni fuu, ngara Urusaliima saabe waɗugol iidi ndiin e nder seyo e yettugol e jimi e senƴinde jamɗe e gaasi e geegineeji. 28 Yimooɓe ƴuuri leyɗe piiliiɗe Urusaliima e gure Netoofatiyankooɓe 29 e Bayti-Gilgal e leydi Geba e Asmawet sabo ɓe nyiɓani ko'e maɓɓe gure piilol Urusaliima. 30 Almaami'en e Lewinkooɓe ceni ko'e muɓɓen, ɓe ceni yimɓe heddiiɓe, de ɓe ceni dammbuɗe huɓeere ndeen e kokuwol piiliingol huɓeere ngool du.
31 Miin Nehemiya, ngaɗumi mawɓe Yahuuda ƴeenyi kokuwol ngool. Cendumi yimooɓe ɓeen pecce ɗiɗi. Wootere dilliri gere nyaamo dow kokuwol ngool, faro dammbugal Birgi. 32 Hoosaya e feccere mawɓe Yahuuda njokki gaɗa maɓɓe. 33 Almaami'en: Ajariya e Isira e Meesullam, 34 e Yahuuda e Benyamin e Semaya e Yeremiya, 35 ina tiigii luwe puufeteede na njokki ɓe. Caggal maɓɓe Jakariya ɓii Yonatan, Yonatan ɓii Semaya, Semaya ɓii Mattaaniya, Mattaaniya ɓii Mikaya, Mikaya ɓii Jakuura, Jakuura ɓii Asaafu; 36 e sakiraaɓe muuɗum Semaya e Ajariyel e Milalay e Gilalay e Maa'ay e Nataanel e Yahuuda e Hanaani ndewti ɓe. Ɓeen tiigii munkariiji Daawda maccuɗo Laamɗo. Isira jannginoowo Tawreeta oon ardii ɓe. 37 Ɓe ƴeeŋiri dammbugal Ɓuldude, ɓe ponndii ƴeenyirɗe huɓeere Daawda, ɓe njottii ƴeenyirde kokuwol ngool, ɓe paltorii dow wuro Daawda, faro dammbugal Ndiyam lettugawal.
38 Feccere yimooɓe jimi jettooje ɗiɗaɓerde ndeen du, ƴuuri junngo nano. Miin e feccere lenyol, miɗen njokki gaɗa maɓɓe. Min ndewi: suudu toowndu Duppirdu Buuruuje, Maadi Njaajundi, 39 dammbugal Efrayim, dammbugal Yesaana, dammbugal Liƴƴi, cuuɗi toowɗi indirteeɗi Hananel e Hemre, dammbugal Baali, faa min kewti dammbugal Reenooɓe. 40 Pecce yimooɓe ɗiɗi ɗeen fuu kawri dammbugal Suudu Dewal Laamɗo ɗoon. Miin e feccere mawɓe miɗen ngondi e maɓɓe. 41 Almaami'en: Eliyakim e Maaseya e Miniyamin e Mikaya e Eliyoonaay e Jakariya e Hananiya tiigiiɓe luwe puufeeteɗe; 42 Maaseya e Semaya e Eliyajar e Ujji e Yahuuhanan e Malkiya e Elam e Ejer na tawdaa e amin. Ndeen yimooɓe ɓeen ƴeewni, njimi. Ardiiɗo ɓe woni Yijraahiya.
43 Nyannde ndeen yimɓe fuu ngaɗiri sadakaaji keewɗi e seyo, sabo Laamɗo hokki ɓe seyo manngo. Rewɓe e sukaaɓe du ceyii. Seyo Urusaliima ngoon nanaama faa to woɗɗi.
Golle Almaami'en e Lewinkooɓe
44 Nyannde ndeen worɓe cuɓaa faa laatoo ndaaranooɓe cuuɗi desirɗi dokkal ko arti ɓenndude e jakkaaji e ngeɗuuji almaami'en e Lewinkooɓe, ko heɓa e gese piiliiɗe kuɓeeje, hono no winndiraa ley Tawreeta noon. Ndeen yimɓe Yahuuda ceyii sanne saabe gollal ngal almaami'en e Lewinkooɓe ngaɗata ngaal. 45 Ɓe ceyorii du ɗowtanaade jamirooje Laamɗo maɓɓe, e no ɓe ngolliri gollal senugol yimɓe. Tawi, yimooɓe e reenooɓe dammbuɗe ɓeen du ina njokki ko kaananke Daawda e ɓiyum Suleymaana njamirnoo. 46 Ley jamaanu kaananke Daawda e Asaafu mawɗo yimooɓe, ina woodunoo yimooɓe ardotooɓe jimi manooje e jettooje Laamɗo. 47 Wakkati Sorobabel e wakkati Nehemiya, nyannde fuu yimɓe Israa'iila na itta ngeɗuuji yimooɓe e reenooɓe dammbuɗe. Iɓe ittana Lewinkooɓe ko ɓuri senaade. Lewinkooɓe du ina ittana ƴuwdi Haaruuna.