Ester 1

Dewtere Ester

Hiiro weltaare kaananke Jerjes

1 Ɗum waɗii wakkati laamu Jerjes. Jerjes oon laamake dow leyɗe gilla leydi Indiya faa yotti leydi Etiopiya. 2 Wakkati majjum, tawi kaananke Jerjes na jooɗi dow jooɗorgal laamu muuɗum, ley huɓeere laamorde Suus mawnde. 3 Hitaande tataɓerde laamu makko, o waɗani hooreeɓe laamu makko e gollooɓe makko fuu weltaare mawnde. Inan tawaaɓe yeeso makko: konunkooɓe leyɗe Persi e Mediya, ardiiɓe e goforneere'en leyɗe tawaaɗe ley laamu makko fuu. 4 Weltaare ndeen waɗi balɗe 180. Wakkati majjum, o holli ɓe jawdi laamu makko ɗuundi e teddeengal makko manngal. 5 Nde wakkati oon faltinoo fu, o waɗani yimɓe tawaaɓe piilol laamordu makko, laatiiɓe fuu, hiiro manngo faa waali balɗe jeɗɗi nder galle laamorde ɗon. 6 Gude daneeje canyiraaɗe gaaraaji haabu e goɗɗe bulabulaaje kaɓɓondira e ɓoggi gaɗiraaɗi leppi ɗaatuɗi daneeji e leppi bojjitooji gaɗanaaɗi kootonɗe cardi de ɓilaa e bimmbeeje gaɗiraaɗe kaaƴe daneeje. Jooɗorɗe kaŋŋe e cardi njoƴƴinaa dow daɗɗo kaaƴe dime daneeje cehaaɗe. 7 Jarduɗe feere feere gaɗiraaɗe kaŋŋe dimo na kokkire cabijam kaanankooɓe mbelɗam ɗuuɗɗam. 8 Yimɓe fuu, njaɓɓora no fotirani ɗum'en. Kaananke yamiri gollooɓe muuɗum acca mono fuu yarira no weliri ɗum. 9 Wasti, dey kaananke du, waɗani rewɓe tawaaɓe ley galle laamordu kaananke Jerjes weltaare.

No Wasti oon mursiri lunnde muuɗum

10 Nyalaande jeɗɗaɓerde majjum, tawi ɓernde kaananke na weli sanne saabe cabijam. O noddi gollooɓe makko soortaaɓe, ɗum woni: Mehuman e Biijeta e Harabona e Bigita e Abagata e Jetar e Karkas. 11 O neli ɓe, ɓe noddana mo deekiiko Wasti wara ɗo makko, na hippii kufune laamu. Jerjes na muuynoo hollude ardiiɓe e yimɓe heddiiɓe fuu no ŋari deekum foti. Si goonga du, deekiiko oon na ŋarɗi sanne. 12 Ammaa Wasti jaɓaay waɗude ko nelaaɓe gorum mbi'i ɗuum. Saabe majjum, kaananke ɓerni sanne. 13 Ndelle o haaldi e saahiiɓe wonduɓe e makko, annduɓe kabaaruuji, sabo wakkati oon kabaaru jottiiɗo laamordu fuu na waddee yeeso annduɓe jamirooje e sariyaaji ɓeen. 14 Howruuɓe makko njeɗɗo, ɗum woni: Karasena e Setar e Aadimata e Tarsis e Meeres e Marsena e Maamukan, hooreeɓe laamu Persi e Mediya. Ɓeen ngoni heɓuɓe hoolaare makko, ɓuruɓe teddude ley laamu makko. 15 Kaananke Jerjes wi'i ɓe:

— Miin kaananke mi nelani deekam Wasti wara ɗo am, ammaa o jaɓaay. Ɗume sariya wi'i imo haandi waɗeede?

16 Yeeso kaananke e yimɓe muuɗum fuu, Maamukan jaabii wi'i:

— Ko deeka Wasti waɗi ɗum, wanaa aan kaananke tan o waɗi ko boni, ammaa o waɗii ardiiɓe e yimɓe leyɗe laamu maaɗa fuu ko boni. 17 Nde kabaaru ko fay dey kaananke jaɓaay yamiroore gorum ɗuum hewti rewɓe heddiiɓe fuu, kuyfinan goriraaɓe muɓɓen kam'en du. 18 Hannden pay, rewɓe tedduɓe ley laamu Persi e Mediya nanuɓe ɗum fuu puɗɗata waɗude hono noon. Ɗum riman mettorgal manngal nder ɓerɗe ardiiɓe laamu fuu. 19 Ndelle si nii kaananke yardake; deekum Wasti haɗee warude yeeso muuɗum faa abada. Ndeen kaananke filanee debbo ɓurɗo Wasti wooɗude, loomta lunnde muuɗum, laato dey kaananke, de ɗum tabintinee wo ɗum yamiroore laamiiɗo wootere e ley jamirooje Persi e Mediya nde fay gooto waawaa ittude. 20 Noon ɗum heddortoo, faa rewɓe ley leyɗe maaɗa, nanuɓe kabaaru majjum fuu, njaagoo goriraaɓe muɓɓen no laatorii fuu.

21 Haala kaan fotani kaananke, kam e ardiiɓe wonduɓe e muuɗum fuu. O jaɓi tindinoore Maamukan ndeen. 22 O neldi leyɗe ɗe o laami dow muɓɓen fuu ɓataakiiji. Ɗi mbinndiraa e sifa mbinndi muɓɓen e ɗemle muɓɓen. O yamiri jom ɓaade fuu, dawrana ɓaade muuɗum, wooɗi du, yimɓe muuɗum kaala ɗemngal lenyol muuɗum.