Nehemiya
Du'aare Nehemiya
1
1 Inan haalaaji Nehemiya ɓii Haakaliya.Hitaande noogayaɓerde laamu Artajerjes ley lewru Kisilewa, miin Nehemiya, miɗo tawa ley laamorde huɓeere Suus mawnde. 2 Ndeen gooto e sakiraaɓe am bi'eteeɗo Hanaani e yimɓe woɓɓe ƴuuri leydi Yahuuda, ngari to am. Ƴamumi ɓe kabaaru Alhuudiyankooɓe ƴuuruɓe e maccangaaku leydi Baabiila kooti, e kabaaru huɓeere Urusaliima fu. 3 Ɓe njaabii kam, ɓe mbi'i:
— Yimɓe ɓeen ina ngondi e torra mawɗo, iɓe kollee yawaara. Kokuwol piiliingol huɓeere Urusaliima ngool helaama, ommbirɗe huɓeere ndeen du mbulaama.
4 Nde nannoomi ɗum fu, njooɗiimi miɗo woya, ngaɗumi balɗe keewɗe ley mettorgal ɓernde, miɗo suumii, miɗo waɗa du'aare yeeso Laamɗo Toowɗo. 5 Mbi'umi:
Yaa Joomiraaɗo! Laamɗo Toowɗo, Laamɗo mawɗo, Laamɗo kuleteeɗo, kiɓɓinoowo amaana muuɗum to yiɗuɓe ɗum, jokkiiɓe jamirooje muuɗum. 6 Miɗo ŋaare kettindanoɗaa kam, ndaara kam, njaaboɗaa du'aare nde miin, maccuɗo maaɗa, ngaɗammi jemma e nyalooma saabe Israa'iilankooɓe maccuɓe maaɗa. Miɗo ŋaare njaafoɗaa hakkeeji amin, minen Israa'iilankooɓe. Miin e suudu baaba am, min kuyfini innde maaɗa. 7 Min celaay wadde ko boni, min njokkaay ko mbiiɗaa, min ndeenaay jamirooje maaɗa e tindinooje maaɗa e sariyaaji maaɗa, ɗi kokkuɗaa Muusaa maccuɗo maaɗa. 8 Miɗo ŋaare miccitoɗaa amaana mo ngaɗanɗaa Muusaa maccuɗo maaɗa; mbi'uɗaa: «Si on njokkaay ko mbiimi, mi sankitan on hakkunde lenyi duuniyaaru. 9 Ammaa si on njeccake ɗo am, on njogake jamirooje am, on njaɓi wadde ko mbiimi on ngaɗon ɗum fu, mi hawrondinan on. Fay si tawi on cankitaama njaaraɗon faa keerol duuniyaaru, mi hawrondinan on to tawaɗon fuu, de mi wadda on nokkuure nde cuɓiimi faa innde am teddinee.»
10 Wo kamɓe ngoni maccuɓe maaɗa, yimɓe maa ɓe kisinirɗaa e semmbe maaɗa mawɗo e baawɗe junngo maaɗa. 11 Yaa Joomiraaɗo! Hettina du'aare maccuɗo maaɗa e du'aawuuji maccuɓe maaɗa seyortooɓe teddinde innde maaɗa. Hokku maccuɗo maaɗa jaalagol hannden, waɗu o heɓa moƴƴere to kaananke o.
Tawi ley balɗe ɗeen, miin woni tiigiiɗo yardude cabijam kaananke.