No yimɓe ɓeen cegilorii tuubude
10
1 Nde Isira hofinoo yeeso Suudu Dewal Laamɗo ina du'oo, ina woya, ina haalta ko boni ko ɓe ngaɗi fu, jamaa Israa'iila, worɓe e rewɓe e sukaaɓe fuu ngari piilii ɗum ina mboya kamɓen du sanne. 2 Ndeen Sekaniya ɓii Yahiyel jeyaaɗo suudu Elam, haaldi e Isira, wi'i ɗum:— Min jambake Laamɗo meeɗen sabo min ndewlii rewɓe lenyi janani ley lenyi leydi ndi. Ammaa fay e noon jikke yaafeede ina ngoodani Israa'iilankooɓe. 3 Joonin min adidan amaana e Laamɗo meeɗen, min ndiiwa rewɓe ɓeen e ɓiɓɓe muɓɓen fuu hono no mbiiruɗaa e hono no teddinɓe jamirooje Joomiraaɗo tindiniri min. Ɗum laatoo hono no jamirooje Laamɗo meeɗen mbiiri noon. 4 Umma, sabo haala ka e junngo maaɗa woni. Inan minen du, miɗen njokki gaɗa maaɗa. Semmbinɗin hoore maa, de ngollaa golle ma.
5 Ndeen Isira ummii waɗi almaami'en e Lewinkooɓe e Israa'iilankooɓe fuu kunii mbi'i ngaɗan ko wi'aa ɗuum. 6 Isira ummii yeeso Suudu Dewal Laamɗo toon, naati ley suudu Yahuuhanan ɓii Eliyaasib, ammaa o nyaamaay, o yaraay sabo imo wondi e mettorgal ɓernde dow ko boni ko ƴuuruɓe e maccangaaku ngarti ngaɗi ɗuum. 7 Ndeen gooynaa wi'aa yimɓe leydi Yahuuda e huɓeere Urusaliima ƴuuruɓe e maccangaaku ngarti ɓeen fuu kawrita Urusaliima. 8 Wooɗi, wi'aa katin mo waraay ley balɗe tati fu, waɗetee ko ardiiɓe e mawɓe mbi'i ɗuum: Ko joomum woodi fuu teetetee, de wurtinee ley ƴuuruɓe e maccangaaku ngarti ɓeen.
9 Ley balɗe tati ɗeen, yimɓe Yahuuda e Benyamin fuu kawriti huɓeere Urusaliima, 20 lewru jeenayaɓurdu. Ɓe fuu ɓe kawriti ɓe njooɗii nder njaayri Suudu Dewal Laamɗo, iɓe ndiwna kulol saabe ko ɓe noddira ɗuum, wooɗi tawi ƴuwoonde du ina toɓa sanne. 10 Ndeen almaami Isira oon ummii darii, wi'i ɓe: On jambake Laamɗo, on ɓaŋii rewɓe lenyi janani, on ɓeydanii Israa'iila pelooje. 11 Ndelle joonin, sanaa kaaltanon Laamɗo Joomiraaɗo, mo maamiraaɓe mooɗon hakke mo ngaɗuɗon, de ngaɗon ko o yiɗi. Cenndon ko'e mooɗon e lenyi leydi ndi e rewɓe lenyi janani ɓe ɓaŋuɗon ɓeen.
12 Ndeen jamaa oon fuu ƴeewni wi'i:
— Ina tilsi min ngaɗa ko mbiiɗaa! 13 Ammaa yimɓe na keewi, wooɗi, inan joonin du, wo wakkati toɓo manngo. Saabe ɗuum min mbaawaa daraade ley njaayri hono ni. Gollal ngaal du wanaa gaɗeteengal ley nyalaande wootere maa ley balɗe ɗiɗi, sabo hakkunde amin yimɓe heewɓe ngaɗii ko boni. 14 Ndelle accu ardiiɓe min ɓeen ndaranoo min, de yimɓe gure amin ɓaŋuɓe rewɓe ɓeen, ngara to mawɓe e hiitotooɓe kuɓeeje muɓɓen, fodde wakkati mo kokkaa. Min ngaɗiran noon faa Laamɗo meeɗen itta tikkere mawnde nde tikkani min saabe bonanda mo min ngaɗi oon.
15 Yonatan ɓii Asaheel e Yahjiya ɓii Tikuwa tan calii waɗude noon. Meesullam e Sabetaay, Lewinkooɓe njokki gaɗa maɓɓe kamɓen du. 16 Ndeen ƴuuruɓe e maccangaaku ngarti ɓeen fuu ngaɗi ko mbi'aa ɗuum. Almaami Isira oon suɓii hakkunde ardiiɓe cuuɗi, winndi inɗe muɓɓen. O hawrini ɓe go'o lewru sappoɓurdu, faa ɓe ndaara no ɗum moƴƴinirtee. 17 Ley nyalaande go'aɓerde lewru go'aɓurdu, ɓe timmini moƴƴinde huunde fuu dow worɓe ɓaŋuɓe rewɓe lenyi janani ɓeen.
Inɗe worɓe ɓaŋuɓe rewɓe lenyi janani
18 Inan inɗe yimɓe cuuɗi almaami'en ɓaŋuɓe rewɓe lenyi janani:
Ley suudu Yesuwa ɓii Yoosadak e banndiraaɓe muuɗum wo Maaseya e Eliyajar e Yaarib e Gedaliya. 19 Ɓe ngaɗi amaana seedude e deekiraaɓe maɓɓe. Ɓe njaɓi, ɓe ngaɗii ko wooɗaa, de ɓe itti njawdiri ley baali maɓɓe, ɓe ngaɗi sadaka saabe hakke mo ɓe ngaɗi oon.
20 Ley suudu Imeer wo Hanaani e Jebadiya.
21 Ley suudu Haarim wo Maaseya e Iliyaasa e Semaya e Yahiyel e Ujjiyahu.
22 Ley suudu Pasahuura wo Eliyoonaay e Maaseya e Ismaa'iila e Nataanel e Yoojabad e Elaasaha.
23 Ley lenyol Lewinkooɓe wo Yoojabad e Simi e Kelaaya bi'eteeɗo Keliita e Petahiya e Yahuuda e Eliyajar.
24 Ley yimooɓe wo Eliyaasib.
Ley reenooɓe dammbuɗe Suudu Dewal Joomiraaɗo wo Sallum e Telem e Uri.
25 Ley cuuɗi Israa'iilankooɓe keddiiɗi ɗiin du, inan inɗe ɓaŋuɓe rewɓe ɓeen:
Ley suudu Paroos wo Ramiya e Yajiya e Malkiya e Miyamin e Eliyajar e Hashabiah e Benaya.
26 Ley suudu Elam wo Mattaaniya e Jakariya e Yahiyel e Abdii e Yarmoot e Eliya.
27 Ley suudu Jattu wo Eliyoonaay e Eliyaasib e Mattaaniya e Yarmoot e Jaabad e Ajiija.
28 Ley suudu Bebay wo Yahuuhanan e Hananiya e Jabay e Atalay.
29 Ley suudu Baanii wo Meesullam e Maaluk e Aadaya e Yaasuba e Se'al e Ramot.
30 Ley suudu Pahat-Mo'ab wo Adna e Kelaal e Benaya e Maaseya e Mattaaniya e Besaliilu e Binuuyi e Manasa.
31 Ley suudu Haarim wo Eliyajar e Yisiya e Malkiya e Semaya e Simeyon, 32 e Benyamin e Maaluk e Semariya.
33 Ley suudu Haasum wo Matenay e Mattaata e Jaabad e Elifelet e Yaramay e Manasa e Simi.
34 Ley suudu Baanii wo Ma'aday e Amram e Uuyel, 35 e Benaya e Badeeya e Keluhu, 36 e Waaniya e Merimoot e Eliyaasib, 37 e Mattaaniya e Matenay e Ya'asay.
38 Ley suudu Binuuyi wo Simi, 39 e Salamiya e Natan e Aadaya, 40 e Makiinadabay e Sasaay e Saaray, 41 e Ajariyel e Salamiya e Semariya, 42 e Sallum e Amaariya e Yuusufi.
43 Ley suudu Nebo wo Yaa'iyel e Mattiitiya e Jaabad e Jebina e Yaddaay e Yoo'el e Benaya.
44 Ɓee woni ɓaŋuɓe rewɓe lenyi janani, faa woɓɓe ley rewɓe ɓeen ndimanii ɗum'en.