Dewte Kaanankooɓe
Naywaaku Daawda
1
1 Kaananke Daawda naywii sanne. Fay nde o suddira cuddamaaje ɗuuɗɗe, poownata ɓanndu makko. 2 Gollooɓe makko mbi'i:— Eɗen kaani filanaade kaananke meeɗen surbaajo mo anndaa gorko faa wara wonda e muuɗum de waɗana ɗum haajuuji muuɗum fuu. Surbaajo oon na waala ɗakkol makko faa terɗe makko poowa katin.
3 Ndelle ɓe pilii surbaajo jom ŋari nder leydi Israa'iila fuu. Ɓe keɓi Abiisaga Sunamminke, ɓe ngaddani kaananke. 4 Abiisaga wo debbo jom ŋari sanne. O gollani kaananke, o ndaarani haajuuji muuɗum. Ammaa kaananke Daawda fukkodaaki e makko.
No Adoniya enndiri laataade kaananke
5-6 Wakkati oon, Adoniya ɓii Daawda mo Haagita rimani ɗum gaɗa Absalom, gorko ŋarɗuɗo sanne, mawninkini de na wi'a:
— Wo miin laatoto kaananke!
O heɓi torkooru e pucci e jokolɓe 50 doggooɓe yeeso torkooru makko. Ammaa abada Baabiiko Daawda felaay mo, ƴamaay mo ko saabi de imo waɗa noon. 7 O dawridi e Yo'ab ɓii Seruya e almaami Abiyatar. Ɓeen mballi Adoniya de ndaranii ɗum. 8 Ammaa almaami Sadok e Benaya ɓii Yehoyada e annabi Natan e Simi e Re'i e worɓe Daawda jom'en semmbe, fay gooto e muɓɓen jokkaay Adoniya.
9 Nyannde gomma Adoniya yehi to wi'etee hayre Sohelet ɗakkol ildude En-Rogel, hirsowi baali e na'i mawɗi e gorri payɗi. O noddi sakiraaɓe makko worɓe, ɓiɓɓe kaananke e worɓe Yahuuda tedduɓe gollanooɓe kaananke fuu. 10 Ammaa o noddaay annabi Natan e Benaya e reenooɓe kaananke, tawti sakiike makko Suleymaana.
11 Ndeen Natan wi'i Bati-Seba inna Suleymaana:
— Yalla a nanii Adoniya ɓii Haagita waɗitake kaananke de joomii'en Daawda faamaay naa? 12 Hettina, joonin miɗo yiɗi tindinde ma faa kisinaa yonkiiji mooɗon, aan e ɓiya Suleymaana. 13 Yahu to kaananke, mbi'a ɗum: «Joomam kaananke, yalla wanaa aan hunanii kam, miin korɗo maaɗa, mbiiɗaa wo Suleymaana laamoto caggal maaɗa, wo kanko jooɗoto dow jooɗorgal laamu maaɗa naa? Ko saabi ndelle de Adoniya laatii kaananke?» 14 Wakkati kaaldataa e kaananke ndeen, mi yottoto mi goonɗina haala maaɗa.
15 Wakkati majjum kaananke Daawda na woni ley suudu sabo naywii sanne, Abiisaga oon du na ndaarana mo. Bati-Seba yehi naatowi ley suudu toon, 16 leeƴinii yeeso makko. Kaananke wi'i mo:
— Ɗume kaajaɗaa?
17 O jaabii ɗum o wi'i:
— Joomam, a hunanake kam, miin korɗo maaɗa e innde Joomiraaɗo Laamɗo maaɗa, mbiiɗaa: «Wo ɓiya Suleymaana woni laamotooɗo caggal maaɗa, kanko woni jooɗotooɗo dow jooɗorgal laamu maaɗa.» 18 Ammaa joonin kaa, Adoniya laatake laamiiɗo, de aan joomam kaananke, a faamaay ɗum faa hannden! 19 Adoniya hirsii baali e na'i mawɗi e gorri payɗi ɗuuɗɗi, o noddi ɓiɓɓe maaɗa worɓe fuu e almaami Abiyatar e Yo'ab hooreejo sordaasiiɓe, ammaa o noddaay ɓiya Suleymaana gollanoowo maa. 20 Joomam kaananke, wo aan yimɓe Israa'iila fuu keɗii faa kollaa ɗum'en jeyɗo jooɗaade dow jooɗorgal laamu caggal maaɗa. 21 Si wanaa noon, nyannde aan joomam kaananke kawritoyɗaa e maamiraaɓe maaɗa fu, miin e ɓiyam Suleymaana, min laatoto hono waɗuɓe ko boni.
22 Wakkati Bati-Seba haaldannoo e kaananke Daawda ndeen, annabi Natan yottii. 23 Kaananke haalana ko annabi Natan wari. Natan naati, leeƴinii yeeso makko, 24 wi'i:
— Joomam kaananke, yalla aan yardii Adoniya laatoo laamiiɗo caggal maaɗa, loomta jooɗorgal laamu maaɗa naa? 25 Sabo hannden, o jippake o hirsowi ga'i e baali e gorri payɗi ɗuɗɗi, o noddii ɓiɓɓe maaɗa worɓe e hooreeɓe sordaasiiɓe e almaami Abiyatar. Ɓe fuu iɓe ngoni toon, iɓe nyaama iɓe njara yeeso Adoniya, iɓe mbi'a: «Kaananke Adoniya, mbuura!» 26 Ammaa o noddaay kam, miin e almaami Sadok e Benaya ɓii Yehoyada e ɓiya Suleymaana ɗowtaniiɗo ma. 27 Joomam kaananke, yalla aan fodii ɗum laatoroo noon, de a haalanaay maccuɓe maaɗa moy jooɗoto dow jooɗorgal laamu maaɗa naa?
28 Ndeen kaananke Daawda jaabii, wi'i:
— Noddanee kam Bati-Seba.
— Mi hunorake Joomiraaɗo buurɗo, Joomiraaɗo kisinɗo kam e ɓillareeji fuu; 30 laamnaa, mi waɗan ko kuniimi yeeso Joomiraaɗo Laamɗo Israa'iila ɗuum. Ɓiya Suleymaana laamoto caggal am. Wo kam loomtata kam dow jooɗorgal laamu. Wooɗi du, hannden pay ngaɗammi ɗum.
31 Ndeen Bati-Seba leeƴinii, hippii yeeso kaananke, wi'i:
— Wuuru faa abada, joomam kaananke Daawda!
No Suleymaana laatorii kaananke
(2 Kabaaruuji 29:21-25)
32 Kaananke wi'i:
— Noddanee kam almaami Sadok e annabi Natan e Benaya ɓii Yehoyada.
— Kawrondinon maccuɓe am, ɓe mbaɗɗina ɓiyam Suleymaana dow araawa am mbaaneyaa de njaaron mo ildude Gihon. 34 Ngaɗon almaami Sadok e annabi Natan njoora nebbam dow hoore makko, o laatoo kaananke Israa'iila. Ndeen puufon luwal, mbi'on: «Kaananke Suleymaana, mbuura!» 35 Caggal ɗuum njokkon gaɗa makko faa o wara o jooɗoo dow jooɗorgal laamu am, o loomta lunnde am. Mi tabintinii kanko laamoto dow Israa'iila e Yahuuda.
36 Benaya jaabii kaananke wi'i:
— Aamiina! Joomiraaɗo Laamɗo maaɗa tabintina haala ka. 37 Joomiraaɗo wonda e Suleymaana hono no wonndirnoo e maaɗa. O mawnina laamu Suleymaana faa ɓura laamu maaɗa aan joomam, kaananke!
38 Almaami Sadok e annabi Natan e Benaya e doomooɓe kaananke ɗum woni Karetiyankooɓe e Peletiyankooɓe, mbaɗɗini Suleymaana dow araawa kaananke Daawda mbaaneya ngaan de njaari ɗum ildude Gihon. 39 Toon almaami Sadok adi luwal keewngal nebbam ley Hukum Joomiraaɗo de joori ɗam dow hoore Suleymaana. Ɓe puufi luwal de yimɓe fuu ƴeewnii mbi'i:
— Kaananke Suleymaana, mbuura!
40 Ndeen jamaa oon fuu jokkii caggal makko, iɓe puufa cereeli, iɓe ceyo seyo manngo, iɓe peeko faa leydi dimmbii.
41 Adoniya e ɓe noddunoo weltaare ɓeen nani duko koon wakkati tilinoo nyaamude ndeen. Yo'ab nani duko luwal koon de ƴami wi'i:
— Ɗume woni duko ummiiko ley wuro ko?
42 Wakkati o haalannoo pay, Yonatan ɓii almaami Abiyatar yottii. Adoniya wi'i mo:
— Naatu sabo gorko tedduɗo hono maaɗa, na wadda kabaaru lobbo.
43 Yonatan jaabii Adoniya wi'i:
— A'aa, wanaa noon! Joomii'en kaananke Daawda waɗii Suleymaana laamake. 44 Kaananke neli mo kanko, e almaami Sadok e annabi Natan e Benaya e Karetiyankooɓe e Peletiyankooɓe. Ɓe mbaɗɗini mo dow araawa kaananke mbaaneya. 45 Almaami Sadok e annabi Natan du njoori nebbam dow hoore makko Gihon toon faa o laatoo kaananke. Ɓe ndilli toon iɓe ceyo iɓe peekoo faa galluure Urusaliima fuu na dimmboo. Ɗum woni duko ko nanoton joonin ko. 46 Suleymaana na jooɗii dow jooɗorgal laamu. 47 Katin du, howruuɓe kaananke ngarii na mbarkina joomii'en kaananke Daawda, na mbi'a: «Laamɗo mawnina innde Suleymaana faa ɓura innde maaɗa, mawnina laamu makko faa ɓura ngu maaɗa!». Ndeen kaananke hofii dow leeso muuɗum 48 de wi'i: «Jettooje ngoodani Joomiraaɗo, Laamɗo Israa'iila, kokkuɗo kam loomtoowo dow jooɗorgal laamu am hannde. O waɗii njiirumi ɗum e gite am.»
49 Ɓe Adoniya noddunoo ɓeen fuu ndiwni kulol. Ɓe fuu ɓe ummii ɓe cankitii. 50 Adoniya du huli Suleymaana, ummii doggi, nanngowi luwe hirsirde mooli. 51 Suleymaana humpitaa ɗum, wi'a:
— Adoniya na hule aan kaananke Suleymaana, sabo o nanngowi luwe hirsirde imo moolii, imo wi'a: «Kaananke Suleymaana hunanoo kam hannden ko ittirta yonki am miin maccuɗo muuɗum e kaafaahi.»
52 Suleymaana jaabii wi'i:
— Si wo o gorko ponnditiiɗo fu, fay gaasol hoore makko gootol saamataa e leydi. Ammaa si bonanda tawaama e makko, o maayan.
53 Ndelle kaananke Suleymaana neli worɓe njippinowa mo dow hirsirde toon. O wari o leeƴini yeeso kaananke Suleymaana. Ndeen Suleymaana wi'i mo o ummoo o hoota.