No Daawda limiri Israa'iila'en e Yahuuda'en
24
1 Wooɗi, wakkati gomma katin Joomiraaɗo tikkani Israa'iila'en. Saabe majjum o ummini Daawda laatoo luttinoowo ɓe, o waɗi faa Daawda limi yimɓe Israa'iila e Yahuuda. 2 Daawda wi'i Yo'ap e hooreeɓe sordaasiiɓe wonduɓe e makko ɓeen:— Njahee ley lenyi Israa'iila fuu illa leydi Dan faa yaha Beerseba. Limee yimɓe faa mi faama adadu maɓɓe.
3 Ammaa Yo'ap jaabii kaananke, wi'i:
— Laamɗo reene kaananke. Laamɗo Joomiraaɗo maaɗa ɓeyda yimɓe muuɗum cowe hemre, o waɗa ɗum ley jamaanu maaɗa (faa nji'aa ɗum). Ammaa joomam kaananke, ko waɗi aɗa yiɗi waɗude huunde hono nde?
4 Ammaa haalaaji kaananke ɗiin njaalii ɗi Yo'ap e hooreeɓe sordaasiiɓe ɗiin. Ɓe mburtii e yeeso kaananke faa ɓe njaha ɓe limowa yimɓe Israa'iila. 5 Ɓe peƴƴiti maayo Urdun, ɓe ndaaki horɗoore wuro Aro'er hakkunde naɗɗol ley leydi Gat, de ɓe njehi Yaser. 6 Ɓe ndewi ley leydi Galaad e ley leydi Hodisi. Ndeen ɓe ngari Dan-Ya'an, de ɓe njehi Sidon. 7 Ɓe ndilli toon ɓe njehi ngalluure reenoore wi'eteende Tirus e galluuje (e gure) Hiwinkooɓe e Kanaani'en fuu. Sakitii ɓe njehi Beerseba ley ladde leydi Yahuuda.
8 Ɓe njiiltii ley leydi Israa'iila fuu, ɓe ngaɗi lebbi jeenay e balɗe noogay, de ɓe ngarti Urusaliima. 9 Yo'ap hokki kaananke limgal yimɓe waawuɓe wolde: Israa'iila na woodi worɓe ujunaaje keme njeetato waawuɓe kaafaahi. Yahuuda du na woodi ujunaaje keme njoyo.
10 Caggal ko Daawda tilii e limgal yimɓe ɗuum, ɓernde mum sunii, wi'i Joomiraaɗo:
— Mi waɗii hakke mawɗo ley ko ngollumi ɗuum. Joonin Joomiraaɗo miɗo nyaage, ittaa feloore am miin maccuɗo maaɗa. Ko ngaɗumi ɗuum wo puuyndam mawɗam.
11 Illa nde Daawda umminoo beetee majjum ndeen, haala Joomiraaɗo wari to annabaajo bi'eteeɗo Gad, nji'oowo gollanoowo Daawda. O wi'i:
12 — Yahu haaldu e Daawda, inan ko Joomiraaɗo wi'i: «Miɗo hokke cuɓoɗaa gootel hakkunde sariyaaji tati ɗi carotomaami.»
13 Ndelle Gad yehi to Daawda, wi'i mo:
— Ɗume cuɓiɗaa? Rafo duuɓi jeɗɗi (tati) dow leydi maaɗa, naa doggugol e wayɓe ma lebbi tati, naa nyawu ndaaɓoowu balɗe tati ley leydi maa? Miiloɗaa, anniyoɗaa, de kollaa kam, faa mi jaaboo Joomiraaɗo neluɗo kam oon.
14 Daawda wi'i Gad:
— Miɗo woni ley ɓillaare luggunde. Sanaa min caama ley juuɗe Joomiraaɗo sabo yurmeende muuɗum na heewi. Ammaa mi yiɗaa saamude e juuɗe yimɓe.
15 Ndelle Joomiraaɗo neldi nyawu ndaaɓoowu dow Israa'iila illa beetee oon faa wakkati mo Joomiraaɗo wi'i. Yimɓe ujunaaje njeɗɗo maayi illa Dan faa yottii Beerseba wuro horɗooreyo. 16 Nde maleyka foortunoo junngo mum faa halka Urusaliima ndeen fu, Joomiraaɗo mimsiti, wi'i maleyka kalkoowo oon:
— Heƴii! Ittu junngo maa.
Wakkati oon maleyka Joomiraaɗo oon na woni to nokkuure ƴarorde Arawna Yebusiijo. 17 Nde Daawda yi'unoo maleyka kalkoowo yimɓe oon ndeen, wi'i Joomiraaɗo:
— Wo miin lutti waɗi hakke. Yimɓe ɓe kaa wo baali tan, ɗume ɓe ngaɗi? Accu junngo maa wara dow am e dow lenyol baabam.
18 Nyannde ndeen Gad wari to Daawda wi'i:
— Yahu darnan Joomiraaɗo hirsirde to nokkuure ƴarorde Arawna Yebusiijo toon.
19 Ndelle Daawda yehi waɗi ko Joomiraaɗo yamiri mo e hunnduko Gad. 20 Nde Arawna ndaarunoo, yi'i kaananke e yaadiraaɓe muuɗum na ngara to makko ndeen, o wurtii, o hippii e leydi, o sujidani kaananke. 21 O wi'i:
— Joomam kaananke, ko waɗi de ngarɗaa to am, miin maccuɗo maaɗa?
Daawda jaabii, wi'i:
— Miɗo yiɗi soodude nokkuure maaɗa ƴarorde faa mi darnana Joomiraaɗo hirsirde, faa nyawu ndaaɓoowu dow yimɓe nguun timma.
22 Arawna wi'i Daawda:
— Joomam kaananke, hooƴu ko njiɗɗaa fuu faa ngaɗaa kirsamaaji. Inan ga'i laatoo kirsamaaji buleteeɗi, inan leɗɗe ƴarorde gawri e leɗɗe kaɓɓirɗe ga'i du, ɗum laatoo leɗɗe yiite. 23 Ɗum fuu miɗo hokke, aan kaananke.
Arawna ɓeydi wi'i:
— Joomiraaɗo Laamɗo maaɗa jaɓa dokkal maa.
24 Ammaa kaananke jaabii Arawna wi'i, ɗum:
— Wanaa noon, mi siinii soorude ɗum e maaɗa. Mi hirsantaa Joomiraaɗo Laamɗo am buleteeɗi ɗi keɓumi ɓolum.