Dewtere Samuwiila Go'aɓerde
Rimeede Samuwiila
1
1 Ina woodunoo gorko jeyaaɗo wuro Ramatayim-Sofim wonngo to baamle Efrayim. Innde makko wo Elkaana ɓii Yeroham ɓii Elihu ɓii Tohu ɓii Suf, jeyanooɗo e lenyol Efrayim. 2 Imo joginoo rewɓe ɗiɗo. Inɗe maɓɓe Hanna e Paniina. Paniina ina woodunoo sukaaɓe de Hanna kaa walaa. 3 Hitaande fuu gorko oon na dillannoo wuro muuɗum faa yaha wuro Siiloa, faa sujidana Joomiraaɗo Jom Baawɗe fuu de hirsana ɗum kirsamaaji. Ina woodunoo almaami'en Joomiraaɗo toon, Hofni e Pinahas, ɓiɓɓe Eli. 4 Wakkati Elkaana oon hirsannoo ndeen, imo hokka debbo bi'eteeɗo Paniina e sukaaɓe mum mono fuu ngeɗu muuɗum teewu nguun. 5 De Hanna kaa, imo hokka ɗum geɗe ɗiɗi sabo imo yiɗi ɗum sanne fay si Joomiraaɗo waɗi ɗum dimaro. 6 Katin du nawliiko na heddii na torra mo faa mettina ɓernde makko sabo Joomiraaɗo ommbii ndimu makko. 7 Hitaande fuu nii yaarannoo. Wakkati mo Hanna yahata suudu Joomiraaɗo fu, nawliiko oon torran mo faa o woya, o nyaamataa du. 8 Goriiko Elkaana na wi'annoo mo:— Hanna, ɗume mboyataa? Ko waɗi a nyaamataa? Ko saabii de ɓernde maa na metti? Wanaa miɗo ɓurani maa ɓiɓɓe worɓe sappo naa?
9 Nyannde gomma nde ɓe tilinoo nyaamude e yarude ley wuro Siilo ndeen, Hanna ummii. Tawi almaami bi'eteeɗo Eli oon ina jooɗii dow jooɗorgal ɗakkol dammbugal suudu Laamɗo. 10 Hanna woyi ley mettorgal ɓerndem, haaldi e Laamɗo, 11 hunanii ɗum, wi'i:
— Joomiraaɗo Jom Baawɗe fuu, si a ndaarii mettorgal korɗo maaɗa, si a miccitake kam, si a yeggitaay kam miin korɗo maaɗa de kokkuɗaa kam suka gorko fu, miin mi hokkete aan Joomiraaɗo suka oon haddi nguurndam muuɗum fuu. Hoore makko femmbataake abada.
12 E ley ko Hanna heddii faa ɓooyi na waɗa du'aare to Joomiraaɗo ɗuum, Eli ina taykoo hunnduko makko. 13 Hanna ina haalda e ley ɓernde muuɗum, daande muuɗum nanataake, toni mum tan nyim-nyimtata. Eli miilake wo o culiiɗo 14 de wi'i mo:
— Ndey culitotoɗaa? Accu doro maaɗa!
15 Hanna jaabii, wi'i:
— A'aa, wanaa noon joomam. Wo mi debbo mo ɓernde mettunde sanne. Mi sulaaki, mi yaraay doro, de mi yuppan torra yonki am yeeso Joomiraaɗo. 16 Taa miiloɗaa korɗo maaɗa wo debbo jaasuɗo. Miɗo waɗa du'aare ley torra am e ley cunu am.
17 Eli jaabii wi'i:
— Yahu e jam. Laamɗo Israa'iila hokke ko ŋaariɗaa ɗum.
18 Hanna wi'i:
— Miin korɗo maa, miɗo halfini ma hoore am.
Ndeen o yehi o nyaami, yeeso makko du feertii. 19 Beetee law Elkaana e koreeji mum ummii, cujidani Joomiraaɗo de kooti wuro Rama. Joomiraaɗo du yeggitaay Hanna. E ley gondal makko e goriiko oon, 20 ɓooyaay de o reedi, o rimi ɓiɗɗo gorko. O inndiri ɗum Samuwiila sabo o wi'ii, «Mi ŋaarake Joomiraaɗo ɓiɗɗo oon.»
No Samuwiila waddiraa to Joomiraaɗo
21 Mawuuri majjum Elkaana yaadi e koreeji mum faa hirsana Joomiraaɗo kirsamaari ndi jeyi hokkeede hitaande fuu ndiin de o waɗana ɗum sadaka goɗɗo mo o hunaninoo ɗum. 22 Hanna kaa yahaay. O haaldii e goriiko, o wi'i:
— Wakkati suka oon entaa fu, mi yaaran mo to Joomiraaɗo, mi halfina ɗum mo. O wuura toon faa abada.
23 Elkaana jaabii mo, wi'i:
— Waɗu ko ɓuri wooɗude e maaɗa, keɗoɗaa ga faa o entee. Joomiraaɗo tabintin haala muuɗum.
Jonkaa debbo oon heddii wuro, muynini suka muuɗum gorko faa enti mo. 24 Nde suka oon entanoo fu o yaari ɗum faa to suudu Joomiraaɗo wonndu wuro Siilo, kam e ngaari tatiiri e feccere bootooru conndi alkama e sumalle cabijam. Samuwiila wo cukalel pamarel tafon. 25 Nde ɓe kirsunoo ngaari ndiin fu, ɓe njaari suka oon to Eli, 26 de Hanna wi'i:
— Joomam accaa hakke, tennyoraa hono no tennyorɗaa wo a buurɗo, miin debbo darinooɗo ɗakkol maaɗa ɗo ina haalda e Joomiraaɗo. 27 Mi ŋaarakeno Joomiraaɗo suka, de hokki kam ko ŋaariimi ɗum. 28 Ndelle miin du, mi hokkan Joomiraaɗo suka oon. O halfinaama Joomiraaɗo haddi nguurndam makko fuu.
Ndeen o sujidani Joomiraaɗo toon.