No Bo'as ɓaŋiri Ruttu
4
1 Bo'as yehi jooɗowii to dammbugal ngalluure ɗo jooɗorgal sarotooɓe woni. Wakkati oon fu, inan gorko dimɗinoowo mo Bo'as haalunoo haala muuɗum oon ina faltoo. Bo'as wi'i mo:— Hey! Yigo am, war njooɗoɗaa.
De gorko oon wari jooɗii.
2 Bo'as suɓii worɓe sappo hakkunde mawɓe ngalluure ndeen, wi'i ɗum'en:
— Ngaree, njooɗee. Ndeen ɓe ngari ɓe njooɗii.
3 Caggal ɗuum Bo'as wi'i gorko dimɗinoowo oon:
— Inan Na'omi ƴuuri leydi Mo'ab warti, de ina haaja soottude ngesa sakiike meeɗen Elimelek. 4 Miin miɗo yiɗi mi humpite ɗum yeeso jooɗiiɓe ley ngalluure e yeeso mawɓe yimɓe meeɗen. Si aɗa yiɗi soodude nga fu, coodaa nga. Ammaa si a haajaaka nga fu, paaminaa kam. Sabo gooto fuu waawaa soodude nga sanaa enen tan.
Ndeen gorko oon wi'i:
— Mi soodan nga.
5 Caggal ɗuum Bo'as wi'i katin:
— Nde cooduɗaa ngesa ngaan e junngo Na'omi fu, Ruttu Mo'abinkeejo, maayiraaɗo oon du laatotoo deeka, faa keɓanaa maayɗo oon donoowo ɗum, jeytoowo ngesa ngaan.
6 Ndeen gorko jeyɗo soodude nga oon wi'i:
— Si wo noon fu, mi waawataa, sabo miɗo hula halkude ndongu sukaaɓe am. Ndelle, mi hokkii ma laawol, aan hoore maa coodaa nga. Ammaa miin mi waawataa.
7 Ley jamaanu majjum, nder Israa'iila, si yimɓe ina njiɗi soottude naa wattitinde huunde fu, gooto maɓɓe ittan faɗo muuɗum, hokka ngo banndum oon. Ɗum laatotoo seede haala majjum timmii. 8 Wooɗi, gorko oon wi'i Bo'as:
— Soodu nga aan e hoore maa!
Ndeen o itti faɗo makko ngoon.
9 Bo'as wi'i mawɓe ɓeen e yimɓe wonɓe ɗoon ɓeen:
— On fuu wo on seede hannden, mi jaɓi e junngo Na'omi huunde fuu ko Elimelek e ɓiɓɓe muuɗum Kiliyon e Maalon njeynoo. Mi soodii ɗum to Na'omi. 10 Katin du, mi hooƴan Ruttu Mo'abinkeejo laatinooɗo dee Maalon oon laatoo deekam faa mi heɓana maayɗo oon donoowo, jeytoowo ngesa ngaan, taa innde mum moyte hakkunde sakiraaɓe mum e ley ngalluure meeɗen. Hannden, on fuu on ceedake ɗum.
11 Ndeen yimɓe tawaaɓe to dammbugal huɓeere ndeen e mawɓe wonɓe ɗoon fuu mbi'i:
— Ayyo, miɗen ceedii! Joomiraaɗo barkinɗin debbo naatoowo e suudu maaɗa oon. O laatoo hono Rahiina e Leya, kamɓe ɗiɗo ɓeen ngoni darnuɓe suudu Israa'iila. Laatoɗaa jom jawdi nder Efrata, innde maa du laatoo teddunde nder Baytilaama. 12 Joomiraaɗo hokke ƴuwdi keewndi e suka debbo oon. Wuro maaɗa du laatoo hono wuro Peres mo Tamar rimani Yahuuda!
No Bo'as heɓiri ɓiɗɗo e Ruttu
13 Bo'as hooƴi Ruttu, waɗi deekum. Joomiraaɗo barkinɗini mo. O heɓi reedu, o rimi ɓiɗɗo gorko.
14 Rewɓe Baytilaama mbi'i Na'omi:
— Jettooje ngoodani Joomiraaɗo, kokkarɗo ma hannden taaniyo dimɗinoowo suudu maa, balloowo ma. Innde makko laatoo teddunde ley Israa'iila! 15 Cukalel ngeel waylitan nguurndam maaɗa, ngel heyɗintinan duuɓi maaɗa, ngel jogoytee nder nayeewu maaɗa. Sabo wo esa debbo jiɗɗo ma sanne oon rimani ma ngel. Imo ɓurani ma worɓe njeɗɗo.
16 Na'omi adi ɓinngel ngeel, takki ngel e ɓernde muuɗum, bammbi ngel faa ngel mawni.
17 Wonndiiɓe makko rewɓe kokki ngel innde, mbi'i:
— Na'omi rimanaama ɓiɗɗo gorko!
Ɓe inndiri ngel Obet. Kanngel laatii baaba Yesa. Yesa du woni baaba Daawda.
Inɗe maamiraaɓe Daawda