No Ruttu waaliri ley koyɗe Bo'as
3
1 Nyannde gomma Na'omi wi'i Ruttu:— Suka am, ina haani mi filanee nokkuure nafoore ma. 2 Inan Bo'as mo ngollidannoɗaa e horɓe muuɗum oon, wanaa jeydaaɗo e meeɗen naa? Ley jemma o, o ƴarotoo sa'iiri makko to sokkirde. 3 Lootoɗaa, mbujoɗaa nebbam uurɗam, ɓornoɗaa kaddule maa lobbe, njahaa to sokkirde toon. Taa accu gorko oon anndite sanaa nde tilii nyaamude e yarude. 4 Si o yehi faa o fukkoo fu, ndaara wooɗa ɗo o fukkii ɗoon. Caggal ɗuum, ɓadoɗaa, cudditaa koyɗe makko, pukkoɗaa ɗoon. Kanko e hoore makko o holletee ko ngaɗataa.
5 Ruttu jaabii mo:
— Mi waɗan huunde fuu ko njamirɗaa kam mi waɗa.
6 Ruttu yehi to sokkirde ndeen, waɗi huunde fuu ko esum debbo wi'i ɗum. 7 Bo'as nyaami, yari, weltii, ummii, yehi fukkoyii ɗakkol joorde alkamaari muuɗum. Ndeen Ruttu du wari heese heese, sudditi koyɗe makko, de fukkii.
8 Hakkunde jemma, Bo'as diwni, de waylitii, yi'i inan debbo ina fukkii ɗakkol koyɗe muuɗum. 9 De wi'i ɗum:
— Aan wo a moy? O jaabii mo:
— Wo miin Ruttu, korɗo maaɗa. Miɗo ŋaare ndeenaa kam, sabo wo a jeyɗo rimɗinde kam.
10 Ndeen Bo'as wi'i mo:
— Joomiraaɗo barkinɗine, suka am. Joonin a holli suudu gorko maaɗa yidde mawnde, ɓurnde arandeere ndeen, sabo a filaaki jokolɓe talkaaɓe e jom'en jawdi fuu. 11 Jonle, taa hulu, suka am. Mi waɗan huunde fuu ko ŋaariɗaa kam. Sabo yimɓe ngalluure amin fuu ina anndi wo a debbo caahiiɗo, jom needi.
12 Ammaa, fay si wo goonga mi jeyɗo rimɗinde ma, ina woodi jeyɗo rimɗinde ma ɓurɗo kam jeydeede e maaɗa. 13 Hedda ɗo faa weeta. Si tawi jaango imo yiɗi rimɗinde maa fu, o rimɗinte. Ammaa si tawi, o yiɗaa fu, miɗo hunorii e innde Joomiraaɗo, miin mi rimɗinte. Waalu ɗo faa weeta!
14 Ruttu waali ley koyɗe makko faa fajiri, de ummii gilla weetidaay, gilla gooto fuu waawaa annditinde banndum. Sabo Bo'as yiɗaano fay gooto faama yalla Ruttu wariino ley sokkirde ɗoon.
15 Ndeen Bo'as wi'i Ruttu:
— Weƴƴitin saaya ka ɓorni kaan, de tiigoɗaa ɗum. Ruttu weƴƴiti ka, o etani ɗum kilooji alkamaari 15, o walli ɗum roondii, de o soƴƴii ley huɓeere.
16 Ruttu du hooti to esum debbo, oon ƴami ɗum:
— Noy ɗum laatorii, suka am?
— O hokkarii kam kilooji alkamaari 15. O wi'i kam: «Taa hootu to esa debbo oon junngo ɓolo!»
18 Na'omi wi'i mo katin:
— Munyu faa nanen no haala kaan sakitortoo, sabo gorko oon ŋootataa hannden sanaa tiloo e haala kaan.