No Ruttu golliri ley ngesa Bo'as
2
1 Na'omi ina wooduno gorko gomma jeydaaɗo e gorum Elimelek. Wo o gorko caahiiɗo bi'eteeɗo Bo'as, jom jawdi sanne.2 Nyannde gomma Ruttu Mo'abinkeejo oon wi'i Na'omi:
— Accu mi yaha ley gese, mi jokka taƴooɓe, mi suɓaa cammeeje keddiiɗe, si tawi won jaɓɓiiɗo kam.
Ndeen o jaabii, o wi'i:
— Yahu, suka am.
3 O ummii, o yehi ley ngesa, o jokki caggal taƴooɓe. Ɗoon o fuɗɗi suɓude ko taƴooɓe ɓeen keddi. Tawi du ngesa ngaan wo ngesa Bo'as, jeydaaɗo e Elimelek.
4 Ɗum neeɓaay sanne de Bo'as ƴuuri Baytilaama wari to taƴooɓe muuɗum, wi'i ɗum'en:
— Wo Joomiraaɗo wondu e mooɗon! Kamɓe du ɓe mbi'i mo:
— Joomiraaɗo barkinɗine!
5 Ndeen Bo'as ƴami mawɗo taƴooɓe muuɗum oon:
— Moy woni suka debbo o? Toy o jeya?
6 Mawɗo taƴooɓe oon wi'i:
— Wo o Mo'abinkeejo, mo Na'omi ƴuuridi leydi Mo'ab. 7 Nde o warunoo ɗo fu, o ŋaarii kam, o wi'i: «Yardanam si a njaɓi mi suɓa cammeeje keddiiɗe caggal taƴooɓe ɗeen.» Wooɗi, gilla o wari fajiri, ina famɗi ko o ŋootti, wo o gollan tan.
8 Ndeen Bo'as wi'i Ruttu:
— Suka am, hettidanan, taa njahaa katin nder ngesa goɗɗo, taa woɗɗaa e ngesa nga. Ammaa keddodoɗaa e horɓe gollanooɓe kam ɓeen. 9 Ndaaru wooɗa ɗo ɓe taƴata nder ngesa ngaan, de njokkaa caggal maɓɓe. Mi yamirii du taa taƴooɓe ɓeen meeme. Si aɗa ɗomɗii du, njahaa, njaruwaa to looɗe ɗe gollooɓe am ɓeen ƴoogi kebbini ɗeen.
10 Wakkati oon, Ruttu hofii yeeso makko, sujidani mo, wi'i:
— Ko saabii ngaɗanɗaa kam moƴƴere, de teddinirɗaa kam nii? Sabo wo mi beero tan.
11 Bo'as jaabii mo wi'i:
— Mi humpitaama ko ngaɗanɗaa esa debbo gilla maayde gora e no njoppirɗaa baaba maaɗa e inna maaɗa e leydi ɗo ndimaɗaa, de ngarɗa to lenyol ngol a anndaano arande. 12 Joomiraaɗo yoɓe moƴƴere nde ngaɗuɗaa ndeen. Wo Joomiraaɗo, Laamɗo Israa'iila, mo ndekuɗaa jikke maaɗa dow muuɗum oon hiɓɓina mbarjaari maaɗa!
13 Ruttu jaabii, wi'i:
— Joomam, mi heɓi moƴƴere yeeso maaɗa. Sabo a haalii kam haalaaji belɗi, a waaltini ɓernde am du miin korɗo maaɗa, tawi mi hewtaay fay gooto hakkunde horɓe maaɗa.
14 Nde wakkati nyaamndu warnoo fu, Bo'as wi'i mo:
— War ɗo keɓaa nyaama buuru seɗɗa. Cuuwaa ɗum nder cabijam lamminaaɗam. Suka debbo oon jooɗodii e taƴooɓe ɓeen. Bo'as adi gabbe ca'aaɗe hokki mo. Ndeen o nyaami faa o haari. O adi ko heddii ɗuum. 15 Caggal ɗuum, o ummii, o soƴƴii faa o suɓa cammeeje katin. Bo'as yamiri gollooɓe muuɗum ɓeen, wi'i ɓe:
— Accee o suɓa cammeeje fay nder ƴommbe, taa kaɗee mo. 16 Njoppanon mo du ƴommbe gonnduɗe e cammeeje caggal mooɗon faa o suɓa ɗe.
17 Ruttu nyalli ina suɓa ley ngesa ngaan faa laasara. Ndeen o tappi ko o heɓi ɗuum, ɗum heewi hanndeere mawnde. 18 O wakkii hanndeere ndeen o hooti Baytilaama to Na'omi, esiiko debbo. O holli ɗum ko o heɓi. O yaltini du kedde nyaamndu, o hokki ɗum.
19 Esiiko debbo oon ƴami mo, wi'i:
— Toy cuɓoyɗaa gabbe ɗee fuu hannden? Toy ngolloyɗaa? Joomiraaɗo barkinɗin neɗɗo teddinɗo ma oon.
Ndeen Ruttu haalani mo haala mo o nyalli imo golla ley ngesa muuɗum oon. O wi'i:
— Jeyɗo ngesa nga ngollumi e muuɗum hannden oon ina wi'ee Bo'as.
20 Na'omi wi'i esum debbo:
— Joomiraaɗo barkinɗin mo! Si goonga, Joomiraaɗo accitaay hollude mbooɗirka muuɗum to wuurɓe e to maayɓe fu. Ndeen o wi'i mo katin:
— Gorko oon wo sakiike meeɗen, wo gooto hakkunde rimɗinooɓe en.
21 Ruttu, Mo'abinkeejo oon wi'i esum katin:
— O wi'i kam du: «Aɗa waawii heddodaade e gollooɓe am faa ɗo ɓe taƴidi tayri am fuu.»
22 Ndeen Na'omi wi'i:
— Suka am, ɗum ina wooɗi. Heddoda e horɓe makko ɓeen, taa fay gooto waɗe ko boni saabe a yehi nder ngesa ngonnga.
23 Wooɗi, Ruttu yehi jokki caggal horɓe gollanooɓe Bo'as ɓeen, imo suɓa cammeeje faa ɓe timmini tayri sa'iiri e alkamaari fuu. Wakkati oon fu, imo wondi e esiiko debbo.