Dewtere Ruttu
No Elimelek e koreeji muuɗum eggiri Baytilaama
1
1 Ley jamaanu mo sarotooɓe ardinoo leydi Israa'iila, rafo waɗi ley leydi ndiin. Nde rafo ngoon sattunoo fu, gorko gomma jeyaaɗo Baytilaama ley leydi Yahuuda eggi wuro muuɗum kam e deekum e ɓiɓɓe muuɗum worɓe ɗiɗo, njehi koɗowi leydi Mo'ab. 2 Gorko oon ina wi'ee Elimelek, deekiiko du ina wi'ee Na'omi. Ɓiɓɓe makko worɓe ɗiɗo, gooto ina wi'ee Maalon, gooto du na wi'ee Kiliyon. Wo ɓe Efratinkooɓe, jeyaaɓe Baytilaama nder leydi Yahuuda. Ɓe njehi ɓe njooɗowii ley leydi Mo'ab.3 Ammaa nde ɓe ngonno toon ndeen, Elimelek, goroo Na'omi oon maayi, yoppidi ɗum e sukaaɓe worɓe ɗiɗo ɓeen.
4 Ɓeen ɓaŋi ɓiɓɓe Mo'abinkooɓe rewɓe. Gooto ina wi'ee Orpa, gooto du Ruttu. Ɓe njooɗii nder leydi ndiin ko waɗata duuɓi sappo. 5 Maalon e Kiliyon, ɓeen du ɗiɗo fuu maayi. Noon debbo oon mursiri ɓiɓɓe muuɗum worɓe ɗiɗo ɓeen e gorum fuu.
No Ruttu yaadiri e Na'omi Baytilaama
6 Caggal ɗuum, Na'omi nani Joomiraaɗo waɗanii yimɓe muuɗum moƴƴere, hokki ɗum'en nyaamndu. O ummii kanko e esiraaɓe makko rewɓe ɗiɗo ɓeen faa ɓe ndilla leydi Mo'ab. 7 O dilli nokku ɗo o wonnoo ɗoon, kanko e esiraaɓe makko ɓeen. Ɓe nanngi laawol maɓɓe faa ɓe koota leydi Yahuuda.
8 Ammaa dow laawol maɓɓe, Na'omi wi'i esiraaɓe muuɗum rewɓe ɓeen:
— Njehee, kootee to inniraaɓe mooɗon. Laamɗo waɗan on moƴƴere hono no ngaɗiranɗon kam, miin e maayɓe ɓeen ni. 9 Joomiraaɗo hokku gooto mooɗon fuu goriiyo e suudu ɗo heɓata powtiri. Ndeen o mucci ɓe faa o waynoo ɓe. Ɓe fuu ɓe mboyi e semmbe.
10 Ɓe mbi'i mo:
— A'aa! Min njaadan e maaɗa to lenyol maa.
11 Ammaa Na'omi wi'i ɓe:
— Sukaaɓe am coƴƴee to yimɓe mooɗon. Yalla miɗo waawi heɓude ɓiɓɓe worɓe faa laatanoo on goriraaɓe katin naa? 12 Njehee, kootee, sabo joonin mi naywani ɓaŋeede. Wooɗi fay si mbi'itiimi miɗo woodi jikke heɓude gorko du, de keɓumi mo ley jemma oo, ndimumi ɓiɓɓe worɓe katin, 13 yalla oɗon mbaawii munyande ɓe faa ɓe mawna naa? Yalla ɗum haɗan on ɓaŋeede naa? A'aa! Taa ngaɗee noon sukaaɓe am. Ko hewtii kam ɗum ina ɓuri ko hewtiiɗon ɗum naawude, sabo junngo Joomiraaɗo fiyi kam.
14 Ndeen ɓe puɗɗiti woyude e semmbe maɓɓe. Orpa muccii esum debbo oon, waynii ɗum de soƴƴii. Ruttu kaa, salii yoppude o.
15 Wooɗi, Na'omi wi'i katin Ruttu:
— Inan, sakiike maa debbo kaa soƴƴake to yimɓe muuɗum e to allaaji muuɗum. Aan du jokku o, kootaa wuro maaɗa.
16 Ammaa Ruttu wi'i mo:
— Taa doolɗan mi yoppe. Accu mi jokke. To njahataa fuu, toon njahanmi. To koɗuɗaa du wo ɗoon koɗanmi. Lenyol maaɗa laatoo lenyol am. Alla maaɗa du laatoo Alla am. 17 To maayɗaa fuu ɗoon maayammi, wo ɗoon uweteemi du. Joomiraaɗo e hoorem jukkoo kam jukkungo manngo si tawii goɗɗum feerejum ko wanaa maayde senndi kam e maaɗa.
18 Nde Na'omi yi'unoo no o siinirii jokkude ɗum fu, seli wi'ude o soƴƴoo.
19 Ndeen ɓe njokki laawol maɓɓe faa ɓe njottii Baytilaama. Nde ɓe njottinoo fu, ngalluure ndeen fuu ummii ina saaƴa. Rewɓe keddii ina mbi'aa:
— Wanaa Na'omi naa?
20 Na'omi jaabii wi'i ɓe:
— Taa inndiree kam Na'omi katin! Inndiree kam Kaaɗeefi, sabo Jom baawɗe haaɗini yonki am faa faltii. 21 Nde ndillannoomi wuro am wo mi neɗɗo keewɗo seyo, ammaa Joomiraaɗo wartirii kam e juuɗe ɓole. Ko saabii oɗon inndira kam Na'omi, sabo Joomiraaɗo jukkii kam, Jom baawɗeeji waddanii kam mettorgal ɓernde.
22 Noon Na'omi dilliri leydi Mo'ab, kam e Ruttu esum debbo, Mo'abinkeejo oon. Ɓe ngarti Baytilaama wakkati sa'iiria taƴetee.