No lenyol Benyamin wilitiri
21
1 Wooɗi, Israa'iilankooɓe ngaɗiino hunayeere ley Mispa, mbi'i:— En fuu walaa kokkoowo Benyaminkeejo ɓiyum debbo faa ɓaŋa.
2 Ɓe njehi Baytila, ɓe njooɗii yeeso Laamɗo, ɓe ƴepti daaɗe maɓɓe iɓe mboya bojji cattuɗi sanne faa kiiral naange. 3 Ɓe mbi'i:
— Laamɗo Joomiraaɗo Israa'iila, ɗume saabii de huunde nde waɗi ley Israa'iila? Ko saabii de lenyol gootol mooytaa ley Israa'iila?
4 Jaango majjum, ɓe ummii gilla beetee, ɓe nyiɓi hirsirde kaaƴe, ɓe ngaɗani Joomiraaɗo sadakaaji buleteeɗi e jeɗeteeɗi.
5 Ndeen ɓe ƴamondiri:
— Hakkunde lenyi meeɗen, lenyol ngole woni waraay ley kawrital ngal ngaɗuɗen yeeso Joomiraaɗo ngaal?
Ɓe ƴamonduri ɗum sabo ɓe ngaɗiino hunayeere mawnde, ɓe mbi'i neɗɗo fuu mo waraay kawrital gaɗungal Mispa yeeso Joomiraaɗo ngaal wo bareteeɗo.
6 Ɓiɓɓe Israa'iila njurmii sakiraaɓe muɓɓen Benyaminkooɓe, mbi'i:
— Hannden hakkunde lenyi Israa'iila, lenyol gootol halkii. 7 Haya, noy ngaɗeten de keɓanen worɓe heddiiɓe ɓeen rewɓe? Sabo en kunanake Joomiraaɗo mbi'uɗen en kokkataa ɓe ɓiɓɓe meeɗen rewɓe ɓe ɓaŋa. 8 Wooɗi ɓe ƴamonduri, ɓe mbi'i:
Nder lenyi Israa'iila, lenyol ngole woni waraay Mispa yeeso Joomiraaɗo?
9 Ndeen ɓe tawi walaa fuu ƴuuruɗo ngalluure Yaabes-Gileyat wari to kawrital ngaal. 10 Wakkati oon ɓe neli konunkooɓe 12 000 njaha toon. Ɓe mbi'i ɗum'en:
— Njehee mbardon yimɓe Yaabes-Gileyat ɓeen fuu kaafaaje, rewɓe e sukaaɓe du. 11 Inan no ngaɗoton: Gorko fuu tawaaɗo toon waree, debbo annduɗo gorko du fuu waree.
12 Nde ɓe njottinoo Yaabas-Gileyat fu, ɓe ngaɗiri noon. Ɓe tawi surbaaɓe 400 ngoni ɓe anndaa worɓe. Ɓe kooƴi ɗum'en, ɓe ngaddi to hoɗorde maɓɓe wonnde Silo nder leydi Kanaana.
13 Ndeen kawrital Isara'iilankooɓe nelani Benyaminkooɓe suuɗiiɓe to tefaare Rimmon ɓeen faa ndewrita e muɓɓen. 14 Caggal ɗuum Benyaminkooɓe ɓeen ngarti to gure muɓɓen. Israa'iilankooɓe kokki ɓe surbaaɓe jeyaaɓe Yaabes-Gileyat heddiiɓe ɓeen. Ammaa rewɓe ɓeen keƴaay faa mono fuu heɓa deekiiwo. 15 Lenyi Israa'iila keddiiɗi ɗiin njurmii Benyaminkooɓe saabe ko Joomiraaɗo itti lenyol gootol ley lenyi Israa'iila 12 ɗuum.
16 Caggal ɗuum mawɓe Israa'iila njooɗii ƴamondiri:
— Noy ngaɗeten? Toy keɓanten Benyaminkooɓe heddiiɓe ɓeen deekiraaɓe, sabo rewɓe Benyaminkooɓe fuu kalkaama?
17 Ɓe mbi'i:
— Tilaay heddiiɓe nder Benyaminkooɓe ɓeen keɓa ƴuwdi, taa lenyol ngool mooytee ley Israa'iila. 18 Ammaa enen, en mbaawaa hokkude ɓe ɓiɓɓe meeɗen rewɓe faa ɓe ɓaŋa. Sabo en ngaɗii hunayeere, en mbi'ii, kokkuɗo Benyaminkooɓe ɓiyum debbo fuu, wo kuɗaaɗo.
19 Ndeen ɓe mbi'i:
— Wooɗi, hitaande fuu ina woodi iidi Joomiraaɗo gaɗoowo ley wuro Silo faro soɓɓiire Baytila, lettugal laawol ƴuuroowol Baytila yaade Sikem, horɗoore Lebona.
20 Caggal ɗuum ɓe mbi'i Benyaminkooɓe ɓeen:
— Njehee cuuɗee ley gese cabiije, 21 ndaaron wooɗa. Si surbaaɓe Silo mburtake faa mbama fu, mburtoɗon ley gese cabiije ɗeen, mono fuu nanngana hoore muuɗum surbaajo, o laatoo deekum, hootida leydi Benyamin. 22 Caggal ɗuum, si baabiraaɓe maɓɓe naa sakiraaɓe maɓɓe ngarii faa kabdaa e amin fu, min mbi'an ɗum'en: «Ngaɗanee ɓe moƴƴere, sabo min keɓanaay ɓe rewɓe ley konu. Katin du wanaa onon kokki ɓe ɓiɓɓe mooɗon rewɓe ɓeen, ndelle on kalkaay hunayeere ndeen.»
23 Noon Benyaminkooɓe ngaɗiri. Ɓe nanngi woɓɓe hakkunde surbaaɓe wamooɓe ɓeen, mono fuu debbo gooto. Ndeen ɓe kooti leydi maɓɓe ndi ɓe ndonunoo, ɓe nyiɓitii galluuje maɓɓe, ɓe njooɗii e majje. 24 Wakkati oon Israa'iilankooɓe ndilli nokkuure ndeen. Mono fuu hooti to lenyol mum e to suudu muuɗum, nder leydi ndi roni.
25 Ley balɗe ɗeen ley Israa'iila fuu kaananke walaa. Ɗum saabii mono fuu ina waɗannoo ko weli ɗum.