Yoosuwa
No Yoosuwa loomtiri Muusaa
1
1 Caggal maayde Muusaa maccuɗo Joomiraaɗo, Joomiraaɗo haaldi e Yoosuwa ɓii Nuun, balloowo Muusaa, wi'i:2 — Maccuɗo am Muusaa maayii. Joonin umma, aan e jamaa oon fuu peƴƴitee gooruwol Urdun ngool faa naaton leydi ndi kokkammi yimɓe Israa'iila ndiin. 3 Nokku fuu ɗo koyɗe mon njaaɓi, mi hokkii on ɗum hono no aadiraniimi Muusaa ni. 4 Gilla ley ladde faa yottowoo dow baamle Liban faro soɓɓiire, gilla maayo wi'eteengo Efaratis, e leydi Hitiyankooɓe fuu, faa yottoo maayo Manngo faro gorgal maggo, fuu laatoo leydi mooɗon. 5 Haddu nguurndam maa fuu walaa darotooɗo yeeso maa. Mi wondan e maaɗa hono no ngondirnoomi e Muusaa ni. Mi woɗɗataako ma, mi yoppataa ma feere maa. 6 Semmbin hoore maa, cemmbinɗinaa ɓernde maa du, sabo e ardagol maaɗa yimɓe ɓeen ndonirta leydi ndi kunaniniimi maamiraaɓe muɓɓen mi hokkan ɗum'en. 7 Ammaa sanaa cemmbinɗinaa hoore maa, cemmbinɗinaa ɓernde maa du, ɗowtanoɗaa jamirooje ɗe Muusaa maccuɗo am winndani ma fuu. Taa selir nyaamo naa du nano, noon keɓirta mbarjaari nokku fuu to njahataa. 8 Taa dewtere Tawreeta ndeen woɗɗoo e hunnduko maa. Janngu nde jemma e nyalooma fuu, ɗowtanoɗaa ko winndaa ley mayre fuu. Noon ɓeydortoɗaa yaade yeeso, ko ngollata fuu barkinte. 9 Wanaa miin yamiri ma cemmbinɗinaa hoore maa, cemmbinɗinaa ɓernde maa du naa? Taa accu kulol nannge, sabo miin, Laamɗo Joomiraaɗo maaɗa miɗo wondi e maaɗa nokku fuu to njahataa.
10 Yoosuwa yamiri ardiiɓe jamaa ɓeen, wi'i:
— Njehee hakkunde jamaa oon, mbi'on ɗum'en: 11 «Moƴƴinanee ko'e mooɗon njooɓaari, sabo ɗo yaade balɗe tati on peƴƴitan gooruwol Urdun, faa naaton leydi ndi Laamɗo hokki on ndiin.»
12 Yoosuwa wi'i yimɓe lenyol Ruben e Gad e feccere lenyol Manasa:
13 — Miccitee ko Muusaa maccuɗo Joomiraaɗo yamiri on. O wi'iino on Laamɗo Joomiraaɗo mon hokkan on powtiri, o hokkan on leydi ndi. 14 Rewɓe mon e ɓiɓɓe mon e kulle mon njooɗotoo nder leydi ndi Muusaa hokki on faro lettugal gooruwol Urdun. Ammaa onon worɓe semmbiɗinɓe, waawɓe konu, jogiiɓe kaɓitirɗe fuu, ardoɗon sakiraaɓe mooɗon peƴƴitiron ngol ori ori. Mballon ɓe, 15 faa ɗo Joomiraaɗo hokki ɓe kamɓe du powtiri hono no hokkiri on ni, faa ɗo ɓe teeti leydi ndi o hokkata ɓe ndiin. Caggal majjum coƴƴoɗon onon du, ndawranon leydi ndi Muusaa maccuɗo Joomiraaɗo hokki on lettugal Urdun ndiin.
16 Ɓe njaabii Yoosuwa, ɓe mbi'i:
— Ko njamirɗaa min ngaɗa fuu, min ngaɗan. Min njahan nokku fuu to nelɗaa min. 17 Hono no min ɗowtoraninoo Muusaa e huunde fuu, noon min ɗowtorante aan du. Ko min ŋaarotoo tan woni, Laamɗo Joomiraaɗo maa wondu e maaɗa, hono no o wondirnoo e Muusaa ni. 18 Neɗɗo fuu luttuɗo jamirooje maa, mo ɗowtanaaki ko njamirɗaa ɗum fu, wo bareteeɗo. Ammaa aan kaa, semmbin hoore maa, cemmbinɗinaa ɓernde maa du.