Darnugol suudu seniindu
40
1 Wooɗi, Joomiraaɗo wi'i Muusaa: 2 Nder lewru go'aɓurdu, go'o mayru, ndarnaa nokkuure seniinde ndeen, ɗuum woni hukum hawrude kam. 3 Ndesaa keesuwal miccingol amaana ngaal ley toon, de kooƴaa lefol cenndungol ngool cuddaa ngal. 4 Ndeen nannaa taabawal ngaal ley toon, de ponnditaa gollirɗe maggal. Nannaa joƴƴinirde fitillaaji ndeen du, kuɓɓaa fitillaaji ɗiin. 5 Nannaa urirde waɗiraande kaŋŋe ndeen, ndesaa nde yeeso to keesuwal miccingol amaana woni toon, de ndarnaa wudere uddirde ndeen to dammbugal hukum toon. 6 Ndeen ndesaa sakkirde kirsamaaji buleteeɗi ndeen yeeso dammbugal hukum hawrude kam toon. 7 Ndesaa du heeɗo ngoon hakkunde hukum oon e sakkirde ndeen, ngattaa ndiyam nder maggo. 8 Ndarnaa kokuwol taliyaare ngool, ngol howa hukum oon, ndeen ngaɗaa wudere uddirde ndeen to narrugal maggol.9 Ndeen kooƴaa nebbam seningol, njooraa dow hukum oon e ko woni e makko fuu. Wo nii ceninirtaa hukum oon kam e gollirtirɗe mum fuu, ɗum fuu ɗum laatoo ko senii. 10 Katin njooraa nebbam dow sakkirde ndeen e gollirɗe mayre fuu, noon cenndirantaa kam nde, nde laatoo ko ɓuri senaade. 11 Katin njooraa nebbam dow heeɗo ngoon e joƴƴinirde maggo, ɗum laatoo ko senii.
12 Ngaddaa Haaruuna e ɓiɓɓe muuɗum dammbugal hukum hawrude kam toon, lootaa ɓe. 13 Ndeen ɓornaa Haaruuna kolte ceniiɗe ɗeen, njooraa ɗum nebbam ɗaam, o seninee faa o gollana kam gollal almaamaaku. 14 Ndeen ngaddaa ɓiɓɓe makko du, ɓornaa ɗum'en kolte muɓɓen, 15 de njooraa ɗum'en nebbam hono no ngaɗiranɗaa baaba muɓɓen noon faa naata almaamaaku. Senugol ngool tabintinan almaamaaku maɓɓe faa abada, kamɓe e ƴuwdi maɓɓe.
16 Muusaa waɗiri huunde fuu hono no Joomiraaɗo yamiri noon pay. 17 Ley hitaande ɗiɗaɓerde, lewru arandeeru, go'o mayru, ɓe ndarni hukum ceniiɗo oon. 18 Muusaa darni hukum oon, darni joƴƴinirɗe ɗeen, de watti leɗɗe darnirɗe hukum oon nder majje. O fali pale ɗeen, o darni bimmbeeje ɗeen. 19 O suddi gude ɗeen dow mayru, o feerti kuurgal ngaal du dow majje, hono no Joomiraaɗo yamirnoo mo noon.
20 Ndeen o adi alluuje miccingol amaana ɗeen, o watti ley Keesuwal Amaana ngaal. O watti cabbi ɗiin nder jawe maggal, o ommbiri ngal ommboode maggal. 21 Ndeen o nanni ngal ley hukum, o watti lefol cenndungol ngool faa ngol sudda ngal, hono no Joomiraaɗo yamiri mo noon.
22 Katin o watti taabawal ngaal nder hukum oon, o resi ngal gere soɓɓiire to yaasin wudere ndeen. 23 O resi buuru dow maggal, yeeso Joomiraaɗo, hono no Joomiraaɗo yamiri mo noon.
24 Ndeen o nanni joƴƴinirde fitillaaji ndeen du gere horɗoore, inde hucciti e taabawal ngaal. 25 O huɓɓi fitillaaji ɗiin yeeso Joomiraaɗo, hono no Joomiraaɗo yamiri mo noon.
26 Ndeen o nanni urirde waɗiraande kaŋŋe ndeen nder hukum oon, o resi nde yeeso lefol cenndungol ngool. 27 O wuli uurdi uurndi dow mayre, hono no Joomiraaɗo yamiri mo noon.
28 Ndeen o darni wudere uddirde dammbugal hukum oon.
29 O resi sakkirde kirsamaaji buleteeɗi ndeen ɗakkol dammbugal hukum oon. Ndeen o wuli dammuccere e gawri dow mayre, hono no Joomiraaɗo yamiri mo noon.
30 Ndeen o joƴƴini heeɗo lootorgo ngoon hakkunde sakkirde ndeen e hukum oon. O watti ndiyam nder maggo. 31 E majjam kanko e Haaruuna e ɓiɓɓe muuɗum lootirta juuɗe muɓɓen e koyɗe muɓɓen. 32 Nde ɓe naatoyta hukum oon naa du si ɓe ɓattoytoo sakkirde ndeen fuu, sanaa ɓe loota ɗe hono no Joomiraaɗo yamiri Muusaa noon.
33 Muusaa darni kokuwol taliyaare ngool, huuri hukum oon e sakkirde ndeen. O watti wudere uddirde narrugal kokuwol ndeen. Noon o timminiri gollal ngaal.
No teddeengal Joomiraaɗo heewiri hukum oon
34 Ndeen ruulde suddi hukum hawrugol Joomiraaɗo oon, teddeengal Joomiraaɗo du heewi joonnde ndeen fuu. 35 Muusaa waawaay naatude hukum oon sabo ruulde ndeen ommbii ɗum fuu, de teddeengal Joomiraaɗo du heewii hukum ceniiɗo oon.
36 Ley dillugol Israa'iila'en fuu, si ruulde ndeen toowtii dow, ɓe ndillan. 37 Ammaa si nde toowtaay, ɓe ndillataa, sanaa nyannde nde toowti. 38 Ruulde Joomiraaɗo ndeen ina woni dow hukum oon nyalooma fuu, de jemma fuu yiite ina woni ley mayre. Ley lenyol Israa'iila du, walaa fuu mo yi'aay ɗum e ley jahaale maɓɓe.