No kolte almaami'en ngaɗiraa
39
1 Ɓe ngolliri gaaraaji bulabulaaji e bojjitooji e boɗeeji coy, ɓe nyooti kolte gollirɗe ley nokkuure seniinde ndeen. Ɓe nyootani Haaruuna kolte ceniiɗe hono no Joomiraaɗo yamiri Muusaa noon.2 Ɓe ngaɗiri saaya ndeketeeka dow kaan e gaaraaji bulabulaaji e bojjitooji e boɗeeji coy e leppi ɗaatuɗi e kaŋŋe. 3 Ɓe ciiwi kaŋŋe oon faa selbi hono haako, ɓe ceeli ɗum, ɓe cewni hono gaaraaji, de ɓe kaɓɓidi ɗum e gaaraaji bulabulaaji e bojjitooji e boɗeeji coy e leppi ɗaatuɗi sanne. Ɓe canyiri ka nyeenyal. 4 To gereeji ɗiɗi ɗiin fuu, ɓe ngaɗani ka lefoy faa koy njokka dow balaaje, koy kaɓɓoo e makka. 5 Ɓe ngaɗani ka kaɓɓorgol canyiraangol nyeenyal. Kangol du ɓe canyiri ngol gaaraaji ɗi saaya kaan sanyiraa ɗiin, hono no Joomiraaɗo yamirnoo Muusaa noon. 6 Ɓe ngatti kaaƴe onikis nder tiigorkoy mooriraakoy kaŋŋe. Ndeen inɗe ɓiɓɓe Israa'iila nyenyaa dow majje hono no maande nyenyirtee noon. 7 Ɓe ngatti ɗe dow balaaje saaya ndeketeeka dow kaan, ɗe laatii miccinooje Israa'iila'en, hono no Joomiraaɗo yamiri Muusaa noon.
8 Ndeen ɓe ngaɗi basel ngel almaami haɓɓata dow ɓernde mum. Ngel sanyiraa nyeenyal hono no saaya ndeketeeka dow kaan sanyiraa noon, e kaŋŋe, e gaaraaji bulabulaaji e bojjitooji e boɗeeji coy e leppi ɗaatuɗi. 9 Ndeen ɓe cowi ngel nde wootere, njuuteefi maggel e njaajeefi maggel fuu poti, wo ɗum fiyande newre wootere. 10 Ndeen ɓe ngaɗi guurti kaaƴe dime nay dow maggel. Ɓe ngaɗiri guurtol aranol ngool hayre woɗeere coy wi'eteende sardiyus e oolde wi'eteende topas e huɗo heccoore wi'eteende emeral. 11 Guurtol ɗiɗaɓol ngool, ɓe ngaɗiri ɗum hayre huɗo heccoore wi'eteende malakit e siiwre wi'eteende safiir e ɗelkoore wi'eteende diyama. 12 Guurtol tataɓol ngool, ɓe ngaɗiri ɗum hayre woɗeere hono ndiyam gooro wi'eteende jasinti e nde ciifi leydi-leydiire wi'eteende agat e woɗeere wi'eteende ametis. 13 Guurtol nayaɓol ngool, ɓe ngaɗiri ɗum hayre huɗo heccoore seeɗa wi'eteende beril e raneere nde ciifi wi'eteende onikis e woɗeere seeɗa wi'eteende jaspa. Ɗe tummbaa wootere wootere nder moori kaŋŋe ɗiin faa ɗi njogoo ɗe. 14 Dow kaaƴe sappo e ɗiɗi ɗeen ɓe nyenyi inɗe ɓiɓɓe Israa'iila sappo e ɗiɗo ɓeen, ɗe laatii maande, dow hayre fuu innde gooto, ko hollata lenyi Israa'iila sappo e ɗiɗi ɗiin. 15 Ɓe ngaɗi ɓoggi ɓilduɗi. Ɓe ngaɗiri ɗi kaŋŋe dimo karraaɗo faa ɓe kaɓɓa basel ngeel. 16 Ɓe ngaɗi moori e jawe ɗiɗi. Ɓe ngaɗiri ɗum kaŋŋe, ɓe kaɓɓi ɗum to seraaji maggel dowuuji ɗiɗi ɗiin. 17 Ɓe ɓili ɓilduɗi ɗiɗi ɗiin e jawe ɗeen. 18 Ɓe kaɓɓi ɗe to tiigorkoy mooraakoy ngonukoy dow balaaje saaya ndeketeeka dow kaan faro yeeso. 19 Ɓe ngaɗi katin jawe kaŋŋe ɗiɗi, ɓe kaɓɓi ɗe e coɓɓuli basel ɗiɗi keddiiɗi ɗiin, heedde ley, hakkunde maggel e saaya kaan. 20 Ndeen ɓe ngaɗi katin jawe kaŋŋe ɗiɗi. Ɓe kaɓɓi ɗe sorde lefoy saaya njokkukoy dow balaaje kooy, faro yeeso makka, ɗuum woni faro dow to lefoy kooy kawrata e kaɓɓorgol makka toon. 21 Ɓe kaɓɓi ɓoggol bulabulawol to jawe basel gonungel dow ɓernde ngeel, de ɓe kaɓɓi ngol to jawe saaya kaan, heɓa ngol heddoo ingol haɓɓii dow kaɓɓorgol ngool, taa ngol sotta, hono no Joomiraaɗo yamiri Muusaa noon.
22 Ndeen ɓe ngaɗi saaya mbulabulooha. Ɓe ngaɗiri ka gaaraaji bulabulaaji tan. Dow makka saaya ngatteteeka dow kaan deketee. 23 Mbulabulooha kaan waɗanaa daande, de daande ndeen waɗanaa kommbol heɓa taa seekoo. 24 Ɓe ngaɗi faro ley saaya kaan alhaali ɓikkoy lekki rummaneehi. Ɓe ngaɗiri ɗum e gaaraaji bulabulaaji e bojjitooji e boɗeeji coy, mottaaɗi faa wooɗi. 25 Katin ɓe ngaɗi lenngi kaŋŋe dimo. Ɓe ngaɗi ɗi hakkunde alhaali ɓikkoy lekki rummaneehi kooy, ɓe piiltini ley saaya kaan. 26 Hakkunde alhaali ɓikkoy rummaneehi ɗiɗoy fuu, ɓe ngaɗi lennguru, ɓe piiltini ley saaya kaan, saabe waɗugol gollal almaamaaku, hono no Joomiraaɗo yamirnoo Muusaa noon.
27 Ɓe canyi leppi ɗaatuɗi mottaaɗi faa wooɗi, ɓe ngaɗani Haaruuna e ɓiɓɓe muuɗum forgooji ɓorneteeɗi ley ɗiin 28 e kufune almaamaaku e sarrahoy. 29 Katin ɓe ngaɗi kaɓɓorgol tuppiniraangol gaaraaji feere feere, ɗi leppi ɗaatuɗi e gaaraaji bulabulaaji e bojjitooji e boɗeeji coy, nyootiraaɗi nyeenyal, hono no Joomiraaɗo yamirnoo Muusaa noon.
30 Ɓe adi kaŋŋe dimo ɓe ngaɗi maande seniinde nanndunde e pinndi. Ndeen ɓe nyenyi haala dow mayre hono no maande nyenyirtee noon. Haala kaan woni: CENANIIƊUM JOOMIRAAƊO. 31 Ɓe ngaɗani nde ɓoggol bulabulawol heɓa nde haɓɓee dow kufune oon, hono no Joomiraaɗo yamirnoo Muusaa noon.
No suudu seniindu timminiraa
32 Wooɗi, hono nii ɓe timminiri suudu seniindu, ɗuum woni hukum hawrugol Joomiraaɗo. Israa'iila'en ngaɗi huunde fuu hono no Joomiraaɗo yamirnoo Muusaa noon. 33 Ɓe ngaddi to Muusaa ko ɓe ngaɗani suudu nduun fuu. Ɓe ngaddi hukum oon e gollirɗe muuɗum, ɗuum woni tiigorkoy e leɗɗe darnirɗe e leɗɗe pale e bimmbeeje e koyɗe jogiiɗe, 34 e kuurgal gaɗiraangal guri jawɗi bojjinaaɗi e kuurgal gaɗiraangal guri ɗaatuɗi moƴƴinaaɗi, e wudere senndunde nokkuure ɓurnde senaade, 35 e keesuwal miccingol amaana e cabbi maggal, e ommboode maggal (to hakke mooytetee), 36 e taabawal e gollirɗe maggal fuu, e buuru deseteeɗo yeeso Joomiraaɗo, 37 e joƴƴinirde fitillaaji waɗiraande kaŋŋe dimo, e fitillaaji joƴƴinteeɗi dow mayre, e gollirɗe mayre fuu, e nebbam majji, 38 e urirde waɗiraande kaŋŋe, e nebbam seningol, e ure buleteeɗe, e wudere uddirde dammbugal hukum oon, 39 e sakkirde nde njamndi mboɗeeri, e njamndi mboɗeeri canyaandi hono nanngirɗum liƴƴi e cabbi mayre e gollirtirɗe mayre fuu e heeɗo e joƴƴinirde maggo, 40 e gude kuurirɗe taliyaare ndeen, e bimmbeeje majje, e koyɗe jogiiɗe ɗe, e wudere uddirde narrugal taliyaare ndeen, e ɓoggi mayre e tiigorɗe mayre, e ko gollirtee ley hukum hawrugol Joomiraaɗo, 41 e kolte gaɗiraaɗe nyeenyal ɓorneteeɗe ley nokkuure seniinde. Ɗeen ngoni kolte ceniiɗe ɗe Haaruuna almaami oon e ɓiɓɓe muuɗum ɓornotoo faa ngaɗa gollal almaamaaku. 42 Israa'iila'en ngaɗi golleeji ɗiin fuu hono no Joomiraaɗo yamirnoo Muusaa noon.
43 Muusaa yi'i golleeji ɗi ɓe ngaɗi ɗiin. O tawi ɓe ngaɗii huunde fuu hono no Joomiraaɗo yamiri. Ndeen o barkini ɓe.